Monday, November 24, 2008

أنا ليه متفائل ؟



أولا : أنا مش متفائل عشان المفروض أبقى متفائل 

أنا عمرى ما بعمل اللى المفروض أعمله .. بالعكس لو حاجة كنت ناوى اعملها و ألاقيها مفروضة عليا بنفر منها و بكرهها 

فده بس توضيح عشان اقول أنى متفائل بموضوعية مش متفائل عشان لازم أبقى متفائل عشان أعرف اعيش 

و انا بتكلم عن مصر ,,, سيبك خالص من المستوى الشخصى لأن كله ممكن يضيع فى لحظة 

بس أولا لما أشوف عدد و مستوى و نوعية الناس اللى بيفكروا و اللى بيتعلموا التفكير جديد طازة فلازم ده يخلينى متفائل ..... كل يوم فيه شباب أكتر بتحس بأن فيه حاجة غلط حواليها و انها محتاجة تعرف الصح و محتاجين يدوروا على اجابات و يبتكروا حلول و يناقشوها و يطوروها رغم كل القبح اللى حوالينا 

صحيح احنا لسة ما حطيناش رجلنا على اول سلمة بس كل يوم بيخرج ناس جديدة بأفكار جديدة و رغبة فى التعلم 

صحيح التطرف بقى منتشر فى كل حتة و الهطل بقى سمة عامة للمصريين بس على الأقل مفيش ارهاب و قتل زى التسعينات و مفيش قمع و اعتقال زى الستينات و السبعينات ... واللى مساعد على كدة هو حرية وسائل الاعلام و سهولة انتقاد أى شخص 

بحيث أن المتخلفين عقليا بيكتموا تخلفهم عشان محدش يشاور عليهم و يفضحهم و حتى اللى بيبثوا التخلف و التطرف وسط الناس الصحافة و الاعلام و المدونات بدأت الى حد ما توازن معاهم و الحومة رغم كل مساوئها فهى بتحاول تتجمل و تدارى عيوبها 

و لاحظ أن كل مليون جنيه بيندفع عشان يخرب عقل شعب زى مصر و حضارته بيضيع و بيتلاشى مع شوية مجهود فى التثقيف و التنوير و التعليم 

متفائل لأنى اقتنعت بكلام مايكل نبيل و هانى الخياط و د.منال غيرهم لما قالوا ان كل ده عفن على السطح حيروح لوحده لما تقضى على المرض نفسه 
و المرض هو الديكتاتورية و العلاج هو الحرية 

متفائل لأنى مقتنع فعلا أن الجهل من الحاجات اللى لو ضاعت من الانسان صعب جدا يلاقيها تانى حتى لو فضلت عاملة له تشوهات طول حياته 

دلوقتى فيه حرية تعبير قوية جدا برغم انها لسة وافدة جديد على مجتمعنا بس قادرة مع الوقت و التراكم و الاصرار أنها تكسر أصنام كتير و تشيل جلخ كتير من عقول الناس 

كل يوم فيه جمعيات مجتمع مدنى و منظمات حقوقية و أحزاب تحت التأسيس بتتكون و بيدخل فيها أعضاء جدد عاوزين يعملوا حاجة لمصر و بيتخرج منها أعضاء قدام اتعلموا حاجة جديدة مكانوش عارفينها قبل ما يدخلوا ... و أكيد حتنفعهم و تنفع البلد لما يلاقوا أن مفيش طريق قدامهم غير المشاركة و التطوير بأى وسيلة 

كل يوم فى مصر فيه حركة بتتولد ضد القمع و الديكتاتورية و ضد الجهل و التعصب و ضد السطحية و الاهمال 

أكيد فيه ضحايا و أكيد فيه متكسبين بيلعبوا على كل الوجوه .. بس دى ضريبة لازم ندفعها مؤجلة من الأجيال اللى فاتت اللى عاشت و ماتت فى سكوت ...... أكيد فيه ناس بييأسوا كل يوم بس أكيد برده أنهم حيرجعوا تانى لأن مفيش طريق تانى غير لقدام 

متفائل لأن الهجرة مش بالسهولة دى .. والا كنا لقينا كل مثقفين مصر و فنانيها و علماؤها سابوها لبتوع التلات ورقات و بتوع الارهاب و للسلطة الفاسدة من ساسها لراسها يقسموها مع بعض و كل واحد ياخد له حتة يلعب فيها 

أحنا قاعدين على قلبكم و كل فلوس السعودية مش حترجع واحد للجهل تانى بعد ما يسيبه و كل صحفيين الحكومة و عساكرها مش حيقدروا يقنعوا واحد عرف حقيقة الفساد أن مبارك أو جمال مبارك قلبهم على البلد...... 

دورنا احنا أننا نخرج الناس من الجهل و الخوف اللى عاشوا فيه من عقود طويلة حتى لو دفعنا التمن و حتى لو دفعنا التمن غالى قوى 
======================= 
ملحوظة على جنب 
أنا لما قلت التمن غالى المرة اللى فاتت و ناس افتكرت أنى أقصد السجن فده مش حقيقى ... التمن اللى أقصده بتدفعه طول حياتك برة السجن ... بتدفعه لما تقص وقت كان ممكن تتسلى فيه او تبنى فيه مستقبلك عشان تعمل عمل تطوعى أو تساند مرشح فى انتخابات و تيجى الحكومة تهده لك فى لحظة 
أو حد ييجى يتريق عليك 
بتدفعه لما كل الناس اللى حواليك تبص لك باستغراب و ريبة و أحيانا نفور و خوف 
بتدفعه لما تتصدم صدمات قوية قوى فى رموز و آمال كنت حاططها قصاد عينك و معتقد أنها لا قبلها و لا بعدها 
أنا عمرى ما كنت أقصد السجن لما قلت ان التمن غالى 

و لسة مقتنع ان التمن كبير اوى بس برده مقتنع اكتر أنه لازم يندفع لو عاوزين نشوف مصر فى يوم من الأيام أحسن من دلوقتى 

من الآخر ..... على صوتك بالغنا لسة الأغانى ممكنة 
و كلام الأغانى مش كلام فى الهوا 

لسة السكة طوييييييييلة يا شباب ..... لسة بدرى على اليأس 

أحمد بدوى 
24-11-2008

No comments: