Tuesday, February 2, 2010

حلمت امبارح إنى بطير

 Uploaded via Facebook Mobile
 
حلمت اني بطير ، كل مرة بحلم إني بطير بحس أنها أول مرة طيران حقيقية ومفيش ولا مرة عرفت إنه حلم ، وقبل كدة زمان أوي حصل إن كذا حلم ورا بعض كنت بتمرن علي الطيران بالتدريج ، كل مرة بتعلم أبقي أعلي و أحافظ علي توازني أكتر ومخافش من الطيران العالي ، كان أول تدريب في شارع بيتنا : أجري بسرعة وأفرد إيدي و أرفع نفسي في الهوا كذا متر و أنزل خفيف و بعد كدة بقيت يادوب أعدي فوق الأتوبيسات وكنت زمان أوي بحب بنت ساكنة في الدور التالت بطير لحد ما أقف قصاد شباكها عشان أطمن عليها

إنهاردة طرت علي شط البحر و كنت شايف المراكب وبقول سبحان الله و قابلت محمد عيد

أول مرة أكتب عن الطيران لأني لما بفوق بنسي التفاصيل بس المرة دي بكتب وأنا لسة مقمتش

لما بتكلم عن الطيران مش بييجي تاني ، بيعاقبني ، قبل كدة طرت أعلي حاجة فوق عمارة عالية أوي وخفت أنزل

كل مرة بحس انه شئ طبيعي ومش غريب ومبقاش عاوز أصحي

حلمت زمان بأن ميس أماني بتاعة الإنجليش بتاعتي لحد 3 ابتدائي اللي كانت بتقول لي يابططساية وقفت علي باب الفصل وكل الولاد دخلوا باب وأنا مدخلتش معاهم ودخلت باب تاني لوحدي

ده غير الراجل ال جالي في الحلم وهددني انه حيموتني فقلت له ماتقدرش ، ده الحلم بتاعي ولو موتني حتموت أنت كمان راح هرب
Post a Comment