Sunday, February 14, 2010

نصف ساعة مع عمال الكتان

العمال غلابة
محمود سامى قاللى دول معتصمين فى مكان قريب بس مكنتش أعرف فين
ياما سمعت عنهم بس معرفش تفاصيل القصة
دايما بقول لنفسى لو مسكت كل قضية من قضايا الاعتصامات دى مش حتخلص
دى البلد كلها معتصمة

قال لى تعالى نروح نشوفهم و نتكلم معاهم .. برده اللى سمع من الإعلام غير اللى بيسمع بنفسه
رحنا دورنا شوية لحد ما لقيناهم قصاد العمارة اللى فيها مركز الأندلس

لقينا الناس نايمين فى الشارع .. فارشين كراتين على الأسفلت و نايمين عليها
و حواليهم شوية عساكر أغلب من الغلب .. أضعف من عساكر الشطرنج
و ضباط بكروش قاعدين على ترابيزة يشربوا قهوة و يضحكوا منهم ناس من أمن الدولة

قعدنا مع كام واحد لقيناهم صاحيين و أتكلمنا معاهم
حكوا لنا

الشركة اتباعت لمستثمر سعودى
و السعودى اداها لواحد مصرى يسرقها
قاللك خصخصة
بس دى مش خصخصة ... دى سرقة علنى
المصرى عنده شركات بتاعته فى اسكندرية .. سرق العربيات بتاعة الشركة و نقلها لشركته فى اسكندرية
وقف الإنتاج و وقف الحوافز و قاللهم احنا قطاع خاص ملكوش علاوة و الناس استحملت
بقى يتعمد يوقف الانتاج عشان يخسر الشركة عشان يبيعها بأضعاف أضعاف السعر اللى اشتراها بيه
لأن تمن الأجهزة و الأرض لوحده أعلى بكتير جدا من اللى دفعه

الناس اعتصمت فى الشركة
قام الريس ربنا يخليه و يطول فى عمره طلع فى الأخبار و قال أن الموضوع اتحل و الناس عشان بتحب الريس فضت الاعتصام

بس فوجئوا ان مفيش حاجة اتحلت !!

عضو النقابة بتاعهم اتفصل .. شوبير طلع بعدها بيومين قال دول أهل بلدى و انا كنت معاهم و مشاكلهم كلها اتحلت
بس العجيب أنهم بيقولوا عمر شوبير ما جالنا ولا شفناه .. ده كداب زى الريس بتاعه

و احنا بنتكلم جت عربية اسعاف خدت واحد منهم و مشيت ... قالوا ده تعبان من العشا عنده الزايدة - احنا كنا ساعتها الساعة 3 بالليل !!
و قالوا ان كل شوية تيجى عربية تشيل حد منهم لأنهم من يوم الحد نايمين فى الشارع فى التراب و البرد ومحدش ساعدهم غير حاجة اسمها (تضامن) جابت لكل فردين بطانية

و قالوا كمال أبو عيطة و كذا حد من بتوع كفاية جم حاولوا يساندوهم بس الأمن منعهم يصلوا معاهم الجمعة و مانع التصوير
انا كنت بصور فى السكرتة عشان محدش يقول لى ممنوع
بس محمود طلع أجدع منى و أخد الموبايل ودخل وسط الناس اللى نايمة صورهم و مش هامه

المدير الجديد بيقولوا ولع حريقة فى قسم من أقسام الشركة عشان يتهمهم بأنهم مخربين .. و من ساعتها الأمن المركزى معسكر هناك
الناس قالوا انهم مصممين على استمرار الاعتصام لحد ما ياخدوا حقوقهم

و انا حسيت ان مقدار الوعى السياسى اللى عندهم أعلى بكتير من أغلب بغبغانات وسط البلد و بغبغانات الفيس بوك - اللى انا منهم - اللى حافظين كلام الكتب و بيرددوه بمناسبة و من غير مناسبة .. لدرجة انى اتكسفت أسأل الراجل اللى كان بيكلمنى عن مستوى التعليم اللى خدوه لأن ناس كتير معاهم شهادات عالية و مناصب سياسية كمان و معندهمش الوعى اللى عند الراجل اللى اتظلم و اضطر يبات فى الشارع عشان يشيل الظلم من عليه

و أكيد حتلاقى بغبغان منهم يدخل يقول الاستثمار و السوق الحر و الليبرالية و هو مش فاهم ان اللى بيحصل ده سرقة و تخريب بقصد النهب مش ليبرالية ولا منافسة حرة ولا تجارة

المهم ... أنا عندى فكرة مش عارف مين ممكن يوافق عليها

بكرة بعد حلقة العصف الذهنى اللى حنعملها فى مقر الغد حقترح على الناس أننا نروح نتضامن مع العمال و نتكلم معاهم

الناس مش عاوزين مننا حاجة أصلا و كل اللى ممكن نقدمه أننا نعرف مشكلتهم و نساند قضيتهم و لو بالكلام

مين يحب ييجى معايا ؟
عربية الاسعاف


حيتم تعديل النوتة بعدين بس مستعجل دلوقتى
Post a Comment