مجموعة استغرابات عن ميليشيات البرادعى

بداية

النوتة دى انا بكتبها و عارف انها حتخسرنى صداقة ناس كتير مفترض انهم عزاز عليا
و عارف انها حتخسرنى اكتر على مستوى العمل العام لأن الدنيا فى الشغل ده متشبكة و كله بيحتاج لكله و مفيش حد بيقدر يستغنى عن حد

و اللى يزعل منك انهاردة بيشيل لك الزعل لبعدين لما تحتاج له و ينفض لك او يتخلى عنك

عشان كدة الناجح فى الجو ده هو اللى بيحافظ على صداقة الجميع ويدخل فى اقل قدر من الصدامات و انا قدرت لحد دلوقتى احافظ على النقطة دى لأنى بعرف ازاى اتجاهل السلبيات الصغيرة و أبص للهدف الأكبر اللى هو الحرية

بس انا واحد مخه جزمة و مبحبش اشوف غلط او استعباط و استعبط .. خصوصا لما يكون بيمس مستقبل ناس كتير اوى او بيدى مؤشرات زى الزفت فى مكان مفروض انه لسة متوسخش

انا لما شفت الدكتور ايمن غلط فى حاجة من وجهة نظرى كبيرة مسكتش و كتبت و الناس هاصت

و لما بشوفه بيعمل حاجة غلط صغيرة مش بسكت برده بس بدى لكل حاجة حجمها

لما كنت بشوف بياعين الدين بيستهبلوا كنت بتكلم و بقول بأعلى صوتى و لما مبارك و ابنه بيمارسوا هوايتهم فى الفساد بقول و مش بيهمنى

عامل فيها شريف ؟؟

حقى ... لحد لما أغلط يبقى حقك تحاسبنى و تنصحنى
لحد لما أغلط بسوء نية يبقى حقك تفضحنى و تمنعنى انى اضلل الناس

==================== نبدأ الاستغرابات و اللى شايفنى غلطان يرد و اللى شايفنى كداب يقول زى ما هو عاوز ============

الاستغراب الأول
=========

1- الأستاذ عبد الرحمن يوسف و المجموعة
المجموعة اللى كلها تقريبا أصحابى و زمايلى و زمايل الحبس كمان

المجموعة اللى منها باسم فتحى اللى كان بيتضايق اوى لما ايمن نور يكرم شباب 6 ابريل فى باب الشعرية و يعتبر ده استغلال من ايمن نور للشباب
و اللى منها اسراء عبد الفتاح اللى بعتت تكذيب للدستور و قالت فيه ان ايمن نور بيستغل اسمها عشان يلمع نفسه
و اللى منها ناصر اللى اتفصل من شغله عشان الفساد اللى موجود فى حزب الجبهة و وقف قصاد أسامة الغزالى حرب و شهاب

معلش يا شباب استحملونى 5 دقايق

أنا مستغرب يا جماعة اوى اوى من الصورة دى و مكانها و التعليق المكتوب عليها

http://www.elbaradei2011.com/arab/index.php?option=com_content&view=article&id=289%3A2010-02-24-21-08-38&catid=51%3A2010-01-15-19-07-50

ايه ده يا شباب ؟
فين رفضكم للشو الاعلامى ؟
فين رفضكم لاستغلال اساميكم ؟

و فين بالأولى رفضكم لاستغلال لاسم غيركم ؟

انا افهم ان الصورة دى مكانها بروفايلاتكو على الفيس بوك و مواقعكم الشخصية تحطوها و تفخروا بيها مع ذكرياتكم
لكن تتحط فى الموقع الرسمى للحملة ؟؟

مش شايفين ان ده اوفر شوية ؟ و قرب يبقى اعلان غير مدفوع الاجر ؟

و بمناسبة الاعلانات .. الاستغراب التانى
=====================

ده ايه ده ؟؟

http://www.elbaradei2011.com/arab/index.php?option=com_content&view=article&id=103%3A2010-01-08-15-15-20&catid=37%3Arokstories-samples

اعلان ولا مش اعلان ؟؟؟؟؟
الأستاذ عبد الرحمن الشاعر المعروف و منسق الحملة

هل محتاج للتعريف بيه انه يحط دواوينه بلينكاتها بالسى فى بتاعه الكامل على موقع الحملة ؟؟

هى دى حملة دعم البرادعى ولا حملة دعم عبد الرحمن يوسف ؟؟

هو ده التفانى و انكار الذات يا شباب ؟؟

طيب بنزعل احنا ليه لما مبارك و ابنه صورهم فى كل صفحة من الجرايد القومية ؟؟

و بنزعل ليه لما نلاقى جرنان الوفد بيغطى اخبار رئيس الوفد اكتر من اخبار البلد نفسها ؟؟

=================
الاستغراب التالت و الأهم
==========

ايه اللى حصل من شباب 6 أبريل عشان مايقابلوش الدكتور البرادعى ؟؟

طيب كل الشباب الناشطين اللى مشاركوش فى حملة البرادعى مقبول - حتى لو مش منطقى - انهم مايبقاش ليهم مكان ولا ميعاد لمقابلته و الكلام معاه بشكل مباشر مع ان ده حيخسره وجهات نظر كتير مهمة و مفيدة

طيب اللى اتحبسوا و اتبهدلوا و دفعوا من جيوبهم و وقتهم و صوتهم اتنبح عشان يساعدوا فى هدف شايفينه خاص بمصر كلها دول كمان ملهمش مكان ولا ميعاد للمقابلة ؟

بغض النظر عن المنظر السخيف لتنظيم المقابلات اللى بيفكرنى بمشهد دخول أئمة المسلمين على الخليفة التركى العثمانلى عشان يقدموا فروض الولاء و الطاعة و يخرجوا من غير ما يوجه لهم ولا كلمة

لكن ان يتم تجاهل شباب 6 أبريل و دعوتهم على استحياء و بالتضرر و التعامل معاهم من قبل زمايلهم بإستكبار فده منتهى منتهى منتهى الصلف و الغرور و قلة الذوق اللى فى الدنيا

أنا كنت نشرت الكلام ده فى استيتس امبارح لأنه وصلنى بشكل مبهم من كذا حد ... كتبته و انا فى ميكروباص فى رمسيس و قبل ما اوصل العباسية لقيت الناس بيكلمونى و بينفوا اى نية لده و ان دى اشاعات ملهاش اساس من الصحة

اتمنى يدخلوا هنا يقولوا ان ده محصلش

اتمنى ان يبقى فيه قدر من الشفافية تخلينا نشوف مين المسئول عن ده لو حصل و مين اللى بيروج الاشاعة دى لو محصلش
أتمنى لو كان حصل انه يكون خطأ غير مقصود يتم تصحيحه لأنه عيب اوى اوى اوى

================================
الاستغراب الرابع و الأخنق
================

ماهر يا ماهر
مش عاوز تتكلم و تقول على اللى حصل عشان ما يتقالش انك بتشق صف الاجماع الوطنى ولا ان انت بتلعب على مصلحتك

طيب و اخرتها ايه ؟؟

و الشباب بتوعك اللى جالهم احباط دلوقتى دول حتعمل فيهم ايه ؟ طيب دول عندهم حبة خبرة تخليهم يبلعوا اللى حصل و يحاولوا يكملوا شغل من غير ما يتهزوا اوى

طيب و الألوف اللى حيجيلها احباط من غير خبرة و حتبقى وكسة منيلة تخلى كل الناس تقول مفيش فايدة

ازاى تشوف غلط و تسكت ؟؟
عشان شوية توازنات فاشلة ؟؟

انت متأكد أكتر منى ان طريقة ادارة الموضوع بالشكل العصابى ده حتخرب الدنيا و ساكت

عارف ان أسلوب احنا بس اللى معانا توكيل حصرى للبرادعى و الباقى اعداء الوطن دى حتخسر البرادعى آراء كتير ممكن يسمعها فى الفترة الصغيرة اللى قاعدها فى مصر و تسمح له بادراك أكبر بالوضع الحالى و بفهم أعمق للخطوات المستقبلية اللى هو لسة مش محددها؟؟

انا مستغرب انت حتسكت لحد امتى ؟ .. و ايه معنى التوازن لو على حساب المصلحة العامة ؟

قول الحق و قول رأيك و قول اللى حصل .. حتخسر ايه اكتر من اللى خسرته ؟؟
احنا دايما بنقول الراجل الكبير ميعرفش حاجة و اللى حواليه هما الغلطانين
ده حقيقى المرة دى
طيب حنسكت برده ؟

========================
الاستغراب الأخير
==========

الناس اللى حتدخل تشتمنى عشان متضايق و محروق دمى من اللى بيحصل و بتكلم فى العلن و عاوزين الموضوع يتلم فى السكرتة

أنا مستغرب منكم اوى اوى اوى

مش انتم اللى بتطالبوا بالشفافية فى كل حاجة ؟

مش انتو اللى بتهاجمونى و بتتهمونى بالنفاق لو قلت ان أخطاء أيمن نور راجعة لحسن نيته و أنه بيرجح الجانب الانسانى على الجانب السياسى و ان اخطاؤه مش متعمدة ؟؟

دلوقتى بقى خالد بيقول خلى كل واحد يعيش الحلم شوية ؟

انا مستغرب كمان من اللى بيدافع عن الدكتور البرادعى

لأنى أصلا كالعادة مجبتش سيرته فى حاجة

الراجل مش هو اللى بيرتب التفاعلات حواليه ولا هو اللى بيختار مين يشوفه و مين ميشفهوش

انا بنتقد الناس اللى دفعت كتير عشان تعمل حاجة و فجأة نسيت كل اللى كانت بتنادى بيه
و فجأة بقت الدعاية الشخصية على موقع مفروض انه عام لمصر كلها امر عادى
و فجأة بقى زملاء النضال أشخاص غير مرغوب فيهم
و فجأة بقت الديماجوجية و التأليه هى المسيطرة على ردود فعلهم
و فجأة بقى شخص هو الحل الوحيد لمصر

أنا مستغرب من اللى بيحصل اوى و نفسى حد يطلع يفول انى كداب و ان كله ده محصلش ولا حيحصل و ان الناس دى - اللى هما صحابى - لسة بيدوروا على المصلحة العامة مش على مصالحهم الخاصة

أتمنى