Sunday, February 14, 2010

ذكريات الزمن الجميل فى الفيس بوك

فاكرين الإز بتاعة زمان ؟ الإز دي من التراث الفيسبوكي العريق ،مايوعاش عليها غير العواجيز ال حضروا الفيس بوك في عزه أيام ما كان لسة إختراع

كان يكتب اسمك وبعده إز - كان انجليزي بس أياميها ، آه والله حضرت أنا الفيسبوك أيام ماكانت الأسماء انجليزي بس ولما عربوها الناس هاصت وقعدوا يقولوا إكتب اسمك بالعربي لغة القرآن و بتاع ، طب معملتوش انتو ليه فيسبوك عربي لما العربية دايساكو اوي

نرجع لموضوعنا

أيام ما اخترعوا الاستيتس دي - أيوة فعلا مكانتش في أول ما ظهر - كان يكتب اسمك وجنبه از

يعني أحمد بدوي إز ونقط بقي تقول فيها إز إيه

كانت الإز دي ملهمة وتخليك تفكر ،، أنا إز إيه أنا إز إيه ؟ و ترد بقي أنا إز جدع ، أنا إز مش فاضيلكو

ولما شالوا الإز زعلنا أوي وعملنا جروبات نطالب إدارة الفيسبوك ترجع الإز تاني
بس مارضيوش - طول عمرهم دماغهم ناشفة ، مفيش ديمقراطية

بس إحنا كمان مسكتناش وفضلنا فترة نكتب الإز من عندنا

برده انت تلاقي الجيل الجديد ستاتيوساته فكسانة كدة بعد ما خلوا سؤال وات إز إن يور مايند
سؤال رخم
الجيل القديم هو اللي أخد الخير كله

فيين أيام ما كانت البوكة بوكة يعني قبل ما يعربوها ويسموها نكزة ،آل نكزة آل ، فعلا ممكن نسمي الجيل ده جيل النكزة

زمان كنت تبعت البوكة للبنية من هنا تلاقي الدنيا اتقلبت ورسايل بقي وبتاع وممكن تلاقي أبوها دخل من بروفايل تاني وعمل عليك ريبورت عشان بتعاكس بنته

وممكن تلاقيها لو معقدة شوية باعتالك عالوول مهزآك

بوك إيه يا أستاذ أنت ال بتعمله ؟ أنت فاكر الدنيا سايبة ولا أيه

ولا الوول ... فين أيام الفن وول والسوبر وول ؟

كان الواحد بكتيره أوي عنده متين فريند يقوم باعتلهم عالفن وول إشي صور وإشي فديوهات

دلوقتي الجيل الجديد تلاقي الواحد من دول عنده 4000 فريند ويقولك أنا خايف أقفلهم خمستلاف لحسن يوقفوا بروفايلي
خمستلاف يا معفن ؟ هو انت ياض فيه خمستلاف بني آدم يعرفوك ؟

ولا لما طلعت إشاعة إن الفيسبوك حيبقي بفلوس ، الناس عيطت وأنا كنت خايف أوي علي صوري ونوتاتي

وعملوا برده نوتات وجروبات أننا مش داخلين عالفيس لو بقي بفلوس
مع ان أنا أظنه لوبقي بفلوس الناس مش حتسيبه برده

زمان الفيسبوك -أيام الرخص - كان براح ، تكتب فيه اللي علي مزاجك - زي التويتر كدة في العصر الحديث

قبل خناقات الملحدين والاسلاميين

أيام ما كان الجروب جروب بجد مش الجروبات الممسوخة بتاعة اليومين دول اللي شبه البروفايل

كان جروب علمانيين ونفتخر ده اختراع وقعدت سنة مثلا خايف أشترك فيه عشان السمعة و جروب مش عاوزين جمال مبارك كان مصيبة
كنا عاملين للجروب مجلس ادارة وحركات واجتماعات وكنا الجروب الوحيد اللي بيعمل شغل سياسة علي وول مصر

إيه ياخويا ؟ متعرفش إيه وول مصر دي ؟ أمال بيعلموكو ايه في كتب التاريخ ؟
وول مصر دي كانت صفحة زي فان بيج بس للمصريين وكانت لكل بلد صفحتها رسمي وماينفعش تشترك ف أكتر من صفحة

كان العيال عاملينها للتهييس والكورة وإحنا كنا بنقلبها سياسة

اتلغت خلاص دلوقتي ومابقاش فيه صفحة قومية تجمعنا زي زمان

كان الفيس ده اختراع
دلوقتي بقي أي واحد ميعرفش حتي يعمل إيميل عنده أكونتين تلاتة

وبقي خنقة بقي، كل كلمة تلاقي ناس تافهة قاعدة تحسبها وتحللها مع ان الدنيا أبسط من كدة

جيل ضايع جيل اللايك ده ، شوية شوية حيعملوا درجات تقويم من واحد لعشرة ، ماهو ده ال كان ناقص كمان



المقال والتعليقات على فيس بوك

No comments: