أرفض انتخاب محمد عبد الحى عضوا بالهيئة العليا للغد للأسباب الآتية

قام الزميل الكاتب محمد عبد الحى بنشر مقال على الفيس بوك بعنوان "انا ليه نزلت انتخابات الهيئه العليا ف حزب الغد" و قد قمت بالرد عليه فى مجموعة ردود رأيت أن أنشرها فى مقال واحد مجمع حتى أحتفظ بها للمستقبل

و برغم حساسية موقفى كمرشح فى نفس الانتخابات الا أن دخول الأستاذ محمد على مقعد الكبار و دخولى على مقعد الشباب يعفينى من الكثير من الحرج حيث كل منا مرشح على منصب مختلف ولا شبهة لمنافسة بينى و بينه و إنما رأيى أبديه كعضو عادى حزب الغد

يمكن قراءة نوتة الزميل محمد عبد الحى هنا
http://www.facebook.com/note.php?note_id=382168747828

وسأكتب ردودى هنا مباشرة

<أولا يا محمد تقبل تحياتى على شجاعتك فى دخول انتخابات العليا فى حزب الغد بعد كل الهجوم اللى هاجمته للحزب ووصفه فى أكتر من مقال بأنه دكانة و نصبايةو عصابة فاسدين و فشلة

و ده من كلامك
========

اتمنى أن كل الأحزاب الموجوده تولع بجاز و نستريح منها و كفايه الخراب و العبط السياسى ألى عملوه ف البلد و جايين بعد كده عايزيين يخدو من المواطنين مرتبات شهريه طب ليه و علشان أيه هما اصلا أضافو للجيل بتعنا ايه علشان نصرف عليهم مستشفى السرطان أو أطفال الشوارع أو شقق للمتضررين من الكوارث أولى بكل مليم من الكدابين المنافقين بتوع الأحزاب ف مصر

قايمه بالأحزاب الفاشله ف مصر و عددهم 24 حزب فاشل :
منهم

حزب الغد

Mohammed Abd El Hai
عيب يا عمر أنت عايز بتوع الأحزاب يزعلو منك أنت عايز تضيع منهم السبوبه ألى بيعملوها من الأحزاب

المصدر
http://www.facebook.com/note.php?note_id=50432887828

-----------------------------------------------------------

ثانيا : أنا مش حقدر أديك صوتى ولا أقتنع أنك شخص ليبرالى أصلا لأنك ببساطة لا تؤمن بالرأى الآخر و بتوصم أى حد بيعارض رأيك بأنه مريض نفسى و معمول له غسيل دماغ

---------------
و ده برده من كلامك

طبعا فيه شويه بنى أدمين مش هايعجبهم الكلام ده نتيجه لخضوعهم لعمليات غسيل مخ أو عندهم مشاكل نفسيه ف تقبل أراء الأخرين
---------------

و كأن رأيك هو الصواب المطلق و أى رأى مخالف ليك يبقى جنون و مرض نفسى!!!

و بالتالى أنا مش مقتنع أنك شخص ليبرالى يصلح ليكون قيادة حزبية فى حزب مفروض أنه ليبرالى أو بنحاول بكل طاقتنا نخليه ليبرالى و مفيش أى دليل أنك فى حالة توليك منصب حزبى أنك تكون أكثر ديمقراطية و تقبل لآراء الآخرين من أى حد بتنتقده من قيادات الأحزاب فى أى حزب

المصدر
http://www.facebook.com/note.php?note_id=328882807828

========

ثالثا : بغض النظر عن هجومك عن الغد - اللى هو رأيك و انت حر فيه طبعا - لكن أنت كلامك متناقض الى أبعد الحدود

مرة تقول أن الحزب كان مؤسسى فى 2005 و بس(مع ان 2005 كانت فترة لا تسمح أصلا بحدوث انقسامات بسبب سرعة الحركة فيها ) و أنه بدأ التخريب و الانقسام فيه مع تولى السفير ناجر الغطريفى لقيادة الحزب

من كلامك
جه موضوع حبس الدكتور ايمن نور و ساعتها مسك سياده السفير ناجى الغضريفى رئاسه حزب الغد و الصراعات بدأت داخل الغد

ما تبقى من القيادات و اعضاء الهيئه العليا كل واحد عمل لنفسه جبهه و انقسم الحزب لعده جبهات

أنا جتلى فتره اتخنقت من الغد بسبب الصراعات و ألى بيتم استخدام الشباب فيها فقولت اقلل نشاطى ف الحزب و ده كان ف اول 2007


=========

و مرة تانية فى موضع تانى خالص بتقول ان الحزب كان شغال كويس و أن أيمن نور هو اللى خربه لما خرج من السجن !!!

------

والناس ديه ملهاش غير هدف واحد هو الشهره ثم الشهره ثم الشهره و كتير منهم جتلهم الفرصه انهم ينجحو وفشلو فشل مقصود

و اوضح مثال على كده أيمن نور و ألى عمله ف حزب الغد أول ما طلع من السجن بوظ الحزب ليه منعرفش روحو أسألوه

المصدر
http://www.facebook.com/note.php?note_id=328882807828
========

و أنا معنديش أى مشكلة أن ده يبقى رأيك و نختلف أو نتفق عليه ... لكن المشكلة فى أن الآراء المتناقضة دى لا تدل على قدرة على اتخاذ قرار واضح ولا وجود رؤية محددة عندك

ياريتك كنت ثبت كلامك على رأى واحد كنا نقدر نختلف عليه

------------------

رابعا : أنت بتقول

-------
و ده ألى خلانى اقرر انى أدخل انتخابات الهيئه العليا لحزب الغد انا بعتبرها فرصه للأصلاح الغد الموجود دلوقتى مش ده الغد الى بهرنى ف بدء حياتى السياسيه
======.


طيب أنا كعضو عادى فى الحزب مش شايف فى اللى انت قلته أى مبرر يخلينى أنتخبك

مش شايف فيك حرص على الحزب و استمراره و سمعته
ومش شايف قدرات خاصة أو معرفة علمية تخلينى أنتخبك من بين كل المرشحين ال80
ولا تاريخ سياسى قوى فى 5 سنين

والأهم أن مفيش أى برنامج اصلاحى ناوى تطبقه لو اختارك أعضاء الجمعية العمومية كعضو هيئة عليا

يعنى انت شايف و بتقول ان الغد حزب زبالة و خربان و منقسم و مسخرة و مصنوع لمصالح فردية

و بتقول ان الحل هو مأسسة الحزب و أنا متفق معاك تماما فى النقطة دى

.. لكن المشكلة ان انت مقلتش انت لو بقيت فى الهيئة العليا ايه اللى حتغيره فى الحزب و ازاى حتحوله لحزب مؤسسى ؟؟
ايه قدراتك التنظيمية اللى تؤهلك لقيادة أو حتى المشاركة فى تحويل حزب فاشل الى حزب ناجح ؟؟

يبدو لى هنا أن شعار المؤسسة هو الحل لا يختلف فى أى شئ عن شعار الاسلام هو الحل اللى طالما اعتبرناه سراب للضحك على الدقون .. فلا برنامج لتطبيقه ولا آليات ولا خبرات سابقة عندك فى هذه النقطة


فى النهاية تقبل احترامى و اختلافى معاك فى الرأى و أرجو الرد بهدوء و من غير اتهامات من نوعية اتهامات الاتحاد الاشتراكى كما ينبغى لمثقف و كانت ليبرالى و أرجو لك انتخابات نزيهة و تمثيل مشرف يحكم عليه أعضاء الجمعية العمومية لحزب الغد