Monday, August 30, 2010

تضحيات الدكتور البرادعي

مكنتش حابب أتكلم عن الموضوع ده تجنبا لزعل أصدقاء مهمين بالنسبالي لكن لما حد يقارن بين د.سعد الدين ابراهيم ود.البرادعي ويبقي فيه تلميح بال"تضحيات" اللي قدمها د.البرادعي واللي مكانش مضطر أنه يقدمها فضروري أسأل

البرادعي مكانش مضطر لإيه بالضبط:

1-يستقيل من وظيفته الدولية ويرجع مصر لما لقاها محتاجة له عشان يقود التغيير ويواجه النظام بثقله الدولي

2-يلغي زياراته الخارجية بعد ماساب وظيفته ويفضل في مصر عشان الدعوة للتغيير

3-يلف محافظات مصر ومؤسساتها نقابات وأحزاب ونوادي كل يوم عشان يقنع الناس بالوقوف ضد الظلم

4-يشارك في جمع التوقيعات علي البيان بنفسه ويشارك في الوقفات الإحتجاجية ضد النظام ويستحمل التعب عشان مصر

معلش برغم اختلافي الشديد مع خطوة توقيع د.سعد لبيان تأييد جمال مبارك لكن ده لا يجعلني أتناسي تضحيات حقيقية قدمها سعدالدين ابراهيم من سجن وتشويه سمعة وطرد من بلده لأنه كان من أوائل الناس اللي ضربت النظام ضربات واقعية موجعة ودفع تمنها

وفي الآخر ونتيجة لوقوف د.سعد في مواجهة الآلة الإعلامية القذرة للنظام في وقت ماكانت مسيطرة سيطرة مطلقة وليها مصداقية عالية فهو حتي بخطوة زي التوقيع علي بيان تأييد جمال مبارك مش حيسبب ضرر كبير لأن شعبيته ومصداقيته ضعيفة جدا وملوش تأثير علي الناس مقارنة بتصريج زي تصريحات كتير للدكتور البرادعي بتخدم أهداف النظام بحسن نية برده لكن ضررها بينتج من المصداقية العالية اللي حصل عليها الدكتور البرادعي ...

---------

تحديث وتوضيح أكتر للسؤال

سؤالي اللي محدش عاوز يجاوب عليه .. ايه هى التضحيات اللي عملها الدكتور البرادعي ومكنش مضطر يعملها؟؟

أنا شخصيا مش شايف أن سؤال زى ده فيه اهانة بأى حال من الأحوال

السؤال هدفه أن الكلام يبقى فيه موضوعية ومحدش ييجي يدعي حاجات محصلتش ويتكلم عنها كأنها بديهيات

و كأن زيارة البرادعي لمصر كل فترة وظهوره في وسائل الاعلام تضحية مفروض نشكره عليها !

الراجل له شعبية ودور في التغيير ماشي  .. بس ليه ننسب له حاجات محصلتش ؟ خصوصا ان اللي بيقوموا بده هما نفسهم اللي بيقولوا طول الوقت أنهم ضد الشخصنة ؟
Post a Comment