الموضوع ببساطة ان أنا غلطت غلطة كبيرة و كنت فاكر ان خالد كساب ممكن يساعدنى بس طلعت غلطان …….ولولا ان الموضوع خلص خلاص من أساسه وراسه و رجله مكنتش كتبته
أول رسالة للدستور: Fri, 1 Sep 2006 12:24:05
(((((إلحقنييييييييييييييييى
يا خالد يا أخويا حبيبك (اللى هوا أنا ) واقع فى مشكلة عاطفية مش عارف أقولك ايه ؟عشان مش طالباها تريقة بس -باختصار- اللى حصل ان فى بنت قابلتها على النت من اسبوعين تقريبا و لقيت فيها كل المواصفات اللى نفسى فيها - طبعا حتقول ده عيل مراهق - بس أنا بنى آدم عقله كبير و بعرف أميز مش حقولك حبيتها بس شخصيتها شديتنى ليها و فى حاجات كتيرة مشتركة بيننا … هى رفضت تقابلنى و رفضت تدينى رقم موبايلها قلت مش مشكلة مسيرنا برضه نتقابل و آدينى بكلمها على المسنجر و خلاص …عارف حتسأل فين المشكلة؟ المشكلة جاية أهى ركز معايا : من خمس ست أيام بطلت تدخل على المسنجر بعت ليها خمس ميت ايميل ما ردتش و أنا قلقان عليها ليكون حصلها حاجة … طبعا حتسألنى و أنا مال أهلى بالدوشة دى أقولك يا سيدى هى وأنا بنحب نقرا الدستور و هى وأنا برضه بنحب نقرا الصفحة بتاعتك ((تخيل!!)) و من ساعة ما اختفت لقيت الحل الوحيد انى أوصلها عن طريقك (( ويا بخت مين وفق راسين فى الحلال )) كل اللى أنا طالبه منك تكتبلى كلمتين بس تقولها<<< يا م .س. أحمد بدوى قلقان عليكى موت كلميه طمنيه عليكى لحسن دا آرفنا فى الجرنال و بيهدد بالإنتحار عن طريق مشاهدة القناة التالتة و الامتناع عن قراية الدستور >>>
يا خالد يا عسل والنبى متنفضليش لأن دى البنت اللى طول عمرى بحلم بيها و أوعدك لو ربنا كتب لنا نتجوز أسمى أول واد أجيبه خالد و التانى أسميه كساب )))))))))))))
—————————————————————————————–
طبعا الكلام ده كان من فترة قريبة و أنا عارف انه تسرع منى و غباء بس معلش … دفعت تمنه و اتعلمت منه برضه
————————————————————————————
ماتم نشره فى الدستور بتاريخ الأربع 6 -sep-2006 :
يا خالد يا أخويا حبيبك (اللى هوا أنا ) واقع فى مشكلة عاطفية - باختصار - اللى حصل إن فيه بنت قابلتها على النت من أسبوعين تقريبا و لقيت فيها كل المواصفات اللى نفسى فيها - و شخصيتها شدتنى ليها و فيه حاجات كتير مشتركة بيننا .. و أدينى بكلنها ع المسنجر وخلاص .. من خمس ست أيام بطلت تدخل على المسنجر بعت خمس ميت إميل ما ردتش و أنا قلقان عليها ليكون حصلها حاجة .. طبعا حتسألنى وأنا مال أهلى بالدوشة دى أقولك يا سيدى هى وأنا بنحب نقرأ الدستور و هى و أنا برضه بنحب نقرا الصفحة بتاعتك " تخيل !!" كل اللى أنا طالبه منك تكتبلى كلمتين كلمتين بس تقولها يا م . س . أحمد بدوى قلقان عليكى موت كلميه طمنيه عليكى لحسن داآرفنا فى الجرنال .
يا خالد يا عسل والنبى متنفضليش لأن دى البنت اللى طول عمرى بحلم بيها و أوعدك لو ربنا كتب لنا نتجوز أسمى أول واد أجيبه خالد و التانى أسميه كساب )))))))))))))
————————————————————
رد خالد باشا :
————————————————————
عودى يا هاميس بدوى فى انتظارك
- بص ياعم (أحمد) مبدئيا كون إن ولد يحب بنت .. فدى أجمل حاجة فى الدنيا كلها .. ولكن .. أخشى إنك تكون محدوف لأكثر من سبب .. إزاى الواحد يحب بنت مش بيبص فى عينيها و هى بتكلمه .. مش .. بيتابع انقباضات شفايفها فى المرحلة التى تسبق البوسة مباشرة .. إزاى تقضوها إنتو الاتنين ع المسنجر .. و فى الآخر تقولى عايزين تتجوزوا .. بص ياعم أحمد .. عايزين تتجوزوا من ع الماسنجر .. إشطاط .. بس ماتعيطوش لو خلفتوا فى الآخر "لاب توب" صغير .. ساعتها بقى ممكن أعرف حتسمى اللاب توب "خالد" ازاى ؟!
————————————————————————————-
مش حقول تأثير الكلام ده كان ايه سواء عليا - أنا استاهل - أوعلى البنية المسكينة اللى مكانتش بتحبنى ولا حاجة و فوجئت بالكلام السخيف ده و حست بالاهانة بسببى و اللى زود الموضوع بالنسبة لى لما لقيت واحد المفروض انه صاحبى … صاحبى اوى … بيتصل بيا من مرسى مطروح مخصوص عشان يشمت فيا و يتريأ ………… المهم رديت على الكاتب الكبير خالد كساب :
——————————————————————————-
تانى رسالة للدستور wed, 6 Sep 2006 01:13:54
خالد كساب - حكلمك من غير ألقاب عشان انت دماغك أكبر من كدة - الكلام ده ليك انت مش للجرنال .
أولا ألف شكر يا معلم انك نشرت الموضوع بتاعى بتاع المرة اللى فاتت " يا هاميس عودى بدوى ف انتظارك "
بس كان عندى ملحوظة : أنا الصراحة ارتبكت لما قريته لأن الموضوع كان خلاص اتصلح و رجعنا نكلم بعض تانى - على المسنجر برضه - أنا عارف انك مش أسامة منير بس ياريت تسمع للآخر و الإيميلات بتاعة البنات مش حتطير استنى شوية .
كنا بنقول ايه ؟ آه المشكلة مش فى الموضوع خالص دلوقت المشكلة بقت فى الcomment اللى انت كتبته …. حضرتك بتتريأ عشان بقولك بكلم بنت على المسنجر و معجب بيها و بتاع و بتقولى لما تتجوزوا تجيبو لاب توب …. الكلام ده انت قصدك بيه تهزر أو تتريئ أو بتنصح عامة الشعب انهم ميحبوش بالطريقة دى ……. براحتك ده جرنالك أو مش جرنالك لأ ده رأيك و انت حر فيه بس أنا عايز أقولك ان مش كل الناس زيك … بيتعرفو على دى و يحبو دى و يسيبو دى … مش كل الناس عايشة حياتها على مزاجها
فيه ناس زيى كتير و يمكن أغلبية كمان عايشين الحياة من برة .. فرجة بس … عليييييك نووووور زى بتوع فيلم ثقافى كدة مش عارفين يعملوا حاجة بجد و لا يحبوا بجد و لا يعيشوا بجد فبالراحة عليهم شوية مش حتبقى الدنيا خانقاهم و انت بتتريا عليهم و عمال تديهم فى نصايح صدقنى كتير منهم حيكرهوك أو يكرهو عيشتهم
على فكرة أنا مش بتكلم عن نفسى أنا شخصيا متقبل ان يبقى فيه ناس عايشة دور البطولة و ناس كومبارس و ناس متفرجين .
أنا ميهمنيش دور البطولة بس مش عايز أبقى من المتفرجين و بحاول أحشر نفسى بين الكومبارس و بحاول كمان أخد انشالله دور صامت فى المسرحية المملة اللى عايشينها دى .
أنا مقلتش ان احنا - أنا والبنت دى - حنتجوز على المسنجر … أكيد كنا حنتقابل و أبص فى عنيها و أمسك ايديها و اشم البارفان اللى حطاه … سيبك من موضوع البوس ده خالص … بس أكيد برضة انى مكنتش حقدر أقابل انسانة زى دى فى الواقع قبل ما أقابلها على المسنجر على الأقل أبقى عارف شخصيتها عاملة ازاى و أعرف لما أقابلها ايه اللى حيخليها مبسوطة… بتقرا ايه و تسمع مين ……. عارف ليه لأنى زى أغلب صحابى و صحاب أخويا و أغلب الولاد اللى أعرفهم معرفوش بنات قبل كدة … عارف بيبقى الحل انه يفضل طول عمره كدة لحد ميتجوز جواز صالونات و يقولك الحب ييجى بعد الجواز و يرضى بقسمته و ده النوع الموظف زى أغلب الأبهات أو الحل التانى انه يقضيها صياعة و حريم ( كلمة أنا بكرهها ) و الحب بيبقى حاجة عبيطة بالنسبة للعالم دى اللى بيدور ف الآخر على واحدة ممشيتش معاه عشان يتجوزها .
بس انا بحاول أكون مختلف أنا بدور على حب يكون بجد مش الحب بتاع بعد الجواز ده - أنا عارفك زمانك بتقول و أنا مالى بالعالم المعقدة دى بس اهمد شوية قربت اخلص الكلمتين المحشورين فى زورى - أنا بحاول ألاقيه و احتمال أعيش طول عمرى من غير ما أوصله بس فيه احتمال يسيط انى ألاقيه . على المسنجر .. فى المدونة اللى عاملها - على فكرة حزعل منك أوى لو مدخلتش عليها و كتبتلى تعليق رخم من بتوعك -.. فى اى حتة بس المهم انى بدور على الحب و بدور على انسانة أرتبط بيها عن حب و عن تناسب
و مدام الموضوع دخل فى ارتباط زى ماأنا عايز يبقى مينفعش الحب بس لازم يبقى فيه تناسب كمان مش حقدر أستحمل أحب واحدة بعدين تطلع بتكره القراية أو مخها صغير
لازم قبل ما أحب عينيها و صوتها أحب شخصيتها و أنا عارف ان الشخصية فى الواقع بتختلف كتير عن النت بس مهما كان الأختلاف فالأساس بيبقى موجود الأساس اللى مش ممكن أوصله فى الحقيقة غير بالصدفة .
يا ريت يا خالد متبقاش قاسى أوى على الناس
وأنا مش زعلان منك و بجد مستني رأيك فى المدونة بتاعتى :
عشان يمكن هى دى تكون وسيلتى الوحيدة انى مبقاش متفرج
سلااااااام
—————————————————————————————
و هو طبعا معبرنيش خالص ولا فى المدونة ولا فى الجرنان……. ده حقه طبعا
طبعا بعد كدة الموضوع اتهد من أساسه و م . س. بالرغم من اننا اتفقنا نبقى صحاب بعد ماأعتذرتلها على الهبل اللى عملته مشفتهاش تانى تقريبا من يوميها و الموضوع اتقفل بالضبة و المفتاح
اتعلمت ايه ؟
حاجات كتييير … مينفعش أبقى متسرع و أى انسانة أكلمها يبقى ده حب الحب محتاج حاجات كتير تانية … اتعلمت ان خالد كساب ميعرفش حاجة عن الناس و عايش ف دنيا لوحده و ياويل اللى يقع تحت ايده و مش حسمى واحد من ولادى خالد ولا التانى كساب … اتعلمت ان الصاحب ممكن ينصحك زى ماهانى عمل أو يواسيك زى ما اسلام عمل بس ميشمتش فيك … دى متبقاش صحوبية دى تبقى مهلبية أو عقدة و شنيطة و الله الغنى ياعم
اتعلمت الصبر لو كنت استنيت يومين بس كنا رجعنا نتكلم تانى و لو كنت من الأول عندى صبر كنت وصلت للى أنا فيه دلوقت من غير وجع قلب
المهم ان كلام خالد كساب مطلعش صح فى الآخر بس مش حينفع أقول ليه دلوقت مش عايز أبقى متسرع لازم كل حاجة تستقر الأول
طب ايه اللى خلانى أكتب ده كله و أفضح نفسى تانى ؟
اولا : درس للى حيموتوا و يحبوا زيى انهم ميتسرعوش و يبقى عندهم صبروربنا كرييييييييم
ثانيا : عشان صحابى يعرفوا اللى حصل و أصعب عليهم شوية
ثالثا : عشان عمنا خالد و القراء بقوا بيضربوا بيا المثل فى العلاقات العاطفية الفاشلة و ابقوا اقروا الدستور بتاعة امبارح 21 sep 2006
رابعا : عشان هى لازم تعرف و مينفعش حاجة زى دى تتحكى فلو خلتها تقرا البلوج تانى هى مش بتحب تيجى فى مكتوب كتير تبقى تقرا الكلام ده و تعرف الحقيقة المرة
No comments:
Post a Comment