Friday, October 3, 2008

أبو الزغاليل

خلينى أتكلم بالمنطق من غير ألفاظ تضايق حد ... مش حقول أنه نصاب و أرزقى و ملوش دعوة ولا بالعلم ولا بالعلماء الحقيقيين اللى بيقضوا عمرهم فى البحث العلمى و الدراسة و التجارب و بيخرجوا بنظريات علمية تساهم فى ارتقاء البشرية و تزويد قدراتها على معالجة مشاكلها و استكشاف عوالم جديدة مكانتش موجودة قبل كدة

العلماء اللى عندهم حاجة مش موجودة عندنا اسمها التجرد العلمى .. و الموضوعية و الرغبة فى المعرفة و التقدم ... و عندهم استعداد يدفعوا ثمن الحقايق اللى بيتوصلوا ليها زى جاليليو و نيوتن و اينشتاين ابن سينا و ليوناردو دافنشى

ايه اللى حصل لده كله ؟ ... اللى حصل أن عالم أوروبى ( على حسب ما ذكره أبو الزغاليل فى افتكاسة جديدة )عمل أبحاث و خرج بنظرية جديدة أن أحجار الهرم من الطين المحروق فى درجة حرارة 900 درجة و كالعادة - ربنا يقطع له كل عادة - طلع علينا الأخ الدكتور زغلول النجار بأن دى معجزة قرآنية جديدة مذكورة فى القرآن و أن ده دليل أن الحضارة الفرعونية مبنية على الطين و أن ربنا خسف الأرض بالمصريين الكفار أتباع فرعون

المهم سيبك من كل ده خلينا نناقش النقط دى الأول :ء

أولا : كل ورقة بحث علمى فى العالم و كل نظرية و نتايج لدراسات بيبقى ليها رقم مسلسل و موثقة بحيث تسهل الوصول ليها و الاستعانة بيها و نقدها و تتطويرها و مناقشتها من بقية العلماء و طلاب البحث العلمى

هاتلى مرة واحدة ذكر العالم الموسوعى اللى بيعرف فى كل حاجة ( برغم أننا فى زمن التخصص -- آه هو كدة فعلا سابق زمنه بألف سنة لورا ) ذكر فيها مصادر موثقة حقيقية ..... موثقة بجد بحيث تقدر أنت كقارئ و مقتنع باللى هو بيكتبه و ليك حق النقد تقدر ترجع لها و تقارنها باللى هو كاتبه

الا حتلاقى مرة يقول لك ((علماء مسلمين من سوريا اثبتوا أنك لما تغطس الدبانة فى الشراب مش بتبقى مضرة صحيا !!!! )) و مرة (( جامعة فرنسية أثبتت ان الكعبة مركز الأرض )) و مرة (( أن لما الأمريكيين وصلوا القمر لقوه مشقوق نصين من عصر سابق و ما أعلنوش الكلام ده عشان يغطوا علينا )) مين العلماء دول ؟؟ فين أبحاثهم ؟؟ هو اطلع عليها امتى و ازاى ؟؟ فين الخطوات اللى نفذوها عشان يوصلوا للنتيجة دى ؟؟ طيب فين أصل الأبحاث دى عشان اطابقها بكلامك و أتأكد أنك نقلتها بأمانة من غير تحوير و لا تغيير ؟؟

يا عمنا البحث العلمى من شروطه أنك مش بتبقى محدد النتيجة قبل البحث والا تبقى نصاب و مزيف أو على أقل تقدير متحيز و المفروض أن العلم مفيهوش تحيز

أصلا الانترنت اتعمل عشان ربط مراكز البحث العلمى ببعضها لتسهيل التواصل بين العلماء و الباحثين

دى أول نقطة .. تانى نقطة .. طيب لو هو فعلا كلامه صحيح و مضبوط ....... ليه هو مش بيقنع العلماء الغربيين دول بأن نظرياتهم موجودة فى القرآن ؟؟ بحيث يسلموا و يبقوا جزء من الأمة الاسلامية و يفيدوها بأبحاثهم و نظرياتهم و يجيبوهم هنا فى قنواتنا الفضائية المجاهدة و المتقاتلة فيما بينها من أجل سبوبة الأعلانات الاسمية ... ليه مفيش ولا حتى مرة واحدة جه عالم غربى و أعلن أنه اقتنع أن بحثه تطابق مع القرآن بصورة واضحة بحيث أنه فعلا اسلم و آمن بالله ؟؟

هل أنت كقارئ مقتنع بأن العلماء دول كلهم عارفين أن الاسلام هو دين الحق و بيكتموا ده فى قلوبهم ؟؟ طيب هل أنت مقتنع أن فى العالم اللى احنا فيه ده ممكن حاجة زى كدة تستخبى ؟؟ .... هل ربنا ما هداش واحد بس من بتوع ناسا أنه يعلن فعلا أنهم لقوا أن القمر مشقوق ؟؟

طيب لو كلامه صحيح و كل حاجة واضحة بذاتها و بمنتهى السهولة كدة ليه علماء المسلمين ( زيه هو كدة ) ما اكتشفوش الأبحاث دى غير بعد ما توصل ليها العلماء الغربيين ما دام هى أصلا كحقايق موجودة عندنا من قبلهم ؟؟

ليه بنضطر نسرق مجهود الغربيين و ننسبه لينا لما هو العلم كله موجود فى القرآن قدام عينينا من ألف سنة و نص؟؟

عارف ليه ؟؟ لأن القرآن كتاب حكمة مش كتاب علوم و دراسات ولا فيزياء ولا جغرافيا ولا تاريخ ... و ربطه بالعلوم دى معناه حرمان الأجيال اللى جاية من أنها تفهمه بصورة أوضح طالما احنا ربطناه بنظريات و أبحاث كل يوم بتتطور عن اللى قبله و الجديد فيها بيحل محل القديم

بعدين سؤال مهم عن الفراعنة اللى هو غاوى يشتمهم فى كل كلمة و التانية ....... لما هما - زى ما بيقول النجار - كفرة و ربنا خسف بيهم الرض لأنهم اتبعوا فرعون .... طيب ليه بتوع السلف ليل و نهار بيؤكدوا أن الخروج على الحاكم و معارضته - ولو معارضة سلمية - ضد الدين و بتضيع الايمان ؟؟....... يعنى أنت بتطلب من المصريين القدماء فى عصر فرعون موسى أنهم يعارضوا فرعون و يؤمنوا بموسى ( اللى كان هدفه لأول الخروج ببنى اسرائيل من مصر و كان خطابه موجه مباشرة لفرعون مش للمصريين ) و بتطلب من المسلمين فى عصرنا أنهم كجزء من عقيدتهم يسمعوا كلام الحاكم الظالم

أى تضارب و تعاكس فى الكلام ...لا يمكن فهمه الا على اساس نظرية المصلحة و أبجنى تجدنى ........ ما دام كلامه بيصب فى سلخنا كمصريين من تاريخنا قبل الحضارة العربية الاسلامية يبقى حيقبض من اللى يهمه ده و يشجعه - اللى هو عاوزنا نبقى مرتبطين بجزء محدود من هويتنا عشان يستثمره فى الوصول للحكم - و ما دام حديث " خير جهاد كلمة حق عند سلطان جائر " ممكن يخسره فلازم ننساه و نعتبره كان لم يكن

طيب لما ربنا خسف بيهم الأرض فعلا طيب الآثار الضخمة دى ازاى فضلت موجودة و نجت من غضب ربنا ؟؟

ممكن نسأل السؤال الأهم و مش الأخير كمان ... ما مدى الفايدة المادية العائدة على المسلمين و غيرهم من البشر من أبحاثه العظيمة و نتايجها ؟؟ هل عالج مرض ملوش علاج ؟؟ هل اخترع اختراع أو ساهم فى أختراع ؟؟ هل أكتشف اكتشاف علمى يزود أفق البشرية بحيث تحل مشاكلها و تتغلب على مصاعبها ؟؟

يا ناس العالم وصل لتنزيل المطر بنسب معينة على مناطق معينة و وصل لتحديد حفريات الانسان البدائى و درسها و احنا لسة متخدرين و عايشين فى أوهام الانسان اللى طوله 60 ذراع و تسخير الجن و العلاج بحبة البركة

أفيقوا يرحمكم الله


http://www.new.facebook.com/note.php?note_id=29408863033&id=512682065&index=3
Post a Comment