Friday, May 1, 2009

نكتة تانى أسبوع .. احنا اللى صهيننا ع الصهاينة




المرة دى ما سمعتهاش بنفسى .. واحد صاحبى حكاها لى
----------------------------------
فى اجتماع لحركة سياسية مصرية يشترك فيها عدد من التيارات السياسية المصرية اللى مصر ابتليت بيهم


كان النقاش حوالين السفر للخارج و المنظمات اللى بتسفر شباب السياسيين لتدريبهم على العمل السياسى السلمى و التغيير الديمقراطى



و كان طبعا من ضمن الحاضرين اخواننا اياهم اللى كل علاقتهم بالسياسة شوية كتب أغلبها عن نظرية المؤامرة و بقيتها عن الزعيم الملهم اللى لولا أنه مات من زمان كان زماننا وصلنا الفضاء ( ورا الشمس يعنى ولا مؤاخذة )



المهم واحد من أخواننا اياهم كان حيطق له عرق و هو بيتهم المنظمة اللى عارضة أنها تسفر مجموعة من الشباب للتدريب على حسابها بأنها منظمة صهيونية امبريالية عميلة مؤيدة لاسرائيل و كمان اتهم الشباب زمايله أعضاء الحركة بأنهم عملا عشان قابلوا أيمن نور و أسامة الغزالى حرب و ده ذنب دونه خرط القتاد ( ألا هو ايه ده؟ ) طبعا من وجهة نظره



عاااادى .. ياما خدنا الناس دى على قد عقلهم و مش بنحطهم فى اعتبارنا أصلا لو حبينا نشتغل سياسة و نعمل تأثير مش تنظير



المشكلة أن واحد صاحبنا كان حسن النية أوى و فاكر انهم بيتكلموا بجد و بيتناقشوا بحق و حقيقى و ما يعرفش أنهم تربية الزعيم الملهم اللى مكانش له ولا معارض - برة السجن - فقام طلب الكلمة و عرض بيان مطلعاه المنظمة دى فى حرب غزة اللى فاتت و بتدين فيه العدوان الاسرائيلى على الفلسطينيين



النكتة بقى أن أخونا اللى كان حيطق له عرق اتنطر من الكرسى و قال البيان ده صهيونى ...... طب ليه يا عم الحج ؟؟ ....... قال لك عشان ما دام المنظمة دى بتدين اسرائيل يبقى بتعترف بيها و بكدة تبقى منظمة صهيونية


آه يا ولاد الـ ........ 

أحمد بدوى
1-5-2009

2 comments:

TheRiLi said...

بربك يا رجل ؟!!!! هل أنت متأكد من أنك بخير ؟؟

TheRiLi said...
This comment has been removed by the author.