* قلت حكمة جديدة ( كلمتى "العمالة" و "العميل" هى الألفاظ الحديثة لكلمتى "الكفر" و "الكافر" ... فقط كان الطرد من الدين ثم أصبح الاقصاء من الوطن)
* حاسس بفرحة عظيمة جدا بسبب اشتراكى فى حملة صوتى مطلبى و تأثيرى على مسارها .. أجمل حاجة أن عندى أفكار و نشاط و الأفكار بتعمل تأثير ايجابى و بتساعد فى الشغل
* أعظم تلات حاجات شاركت فى تكوينهم و دورى فيهم يرضى ضميرى ناحية بلدى هما ( حزب الغد - اضراب 6 ابريل - حملة صوتى مطلبى )
الغريب ان اسراء و شادى كانوا معابا - أو انا كنت معاهم - فى التلات حاجات دول ... لازم أدور على حاجة رابعة عشان يبقى عندى بنط زيادة
و شباب صوتى مطلبى أكتر ناس مبسوط أنى اجتمعت بيهم فى فى مشروع قوى و عظيم زى ده
بالذات الواد باسم و الواد باسم لأن ده أول تعارف و احتكاك حقيقى بيننا
* لو ربنا ديمقراطى فأكيد أحمد سميح و اسراء و أحمد ماهر أكتر ناس حيبقى ليهم بيوت فى الجنة
* قابلت منتصر بالصدفة .. بحب الواد ده جدا رغم لسعانه و رغم انى بخاف من الناس اللاسعة .. بس برده بحبه ... شتمت شوبة فى أحمد شوشة صاحبه ... بس شكل الواد منتصر كان بياخدنى على قد عقلى و مصدق كلام شوشة أكتر ما مصدق كلامى
* اكتشفت فجأة انى مش مصلح الكون و مش كل كداب أو مريض أو مجنون أو متخلف يهاجمنى حرد عليه .. كفاية عليا أرد على الناس اللى بيعرفوا يختلفوا باحترام و حتى لو طلع كلامهم كله صح و كلامى كله غلط فهما أحسن من واحد يتفق معايا و هو كداب أو مش فاهم هو متفق معايا على ايه
* شعور فظيع بالوحدة
* شعور بحنين ناحية الحب .. أى حب .. الحياة مش مضبوطة من غير حب و هزار و فسح و انسجام و غيرة وو و .. لكن اهو بستهلك كل لحظة فى عمرى فى حاجة مفيدة عشان ما احسش بده
* عجوز اوى أنا .. عمرى الرسمى 25 سنة و عمر جسمى 35 و عمر قلبى 45 و عمر عقلى 55
* بحب كل الناس .. حتى اللى بشتمهم و بيحرقوا دم أهلى .. مش بحب أتعامل مع الأغبيا ولا اللى مخهم مقفل .. بس بحس انى بقدر اسامحهم بعد ما اهدى و ابعد عن سكتهم
* بقى عندى ثقة بالنفس تتيح ليا أنى افرض رأيى على الناس لو متأكد أنه صح و فيه مصلحة .. عملت الحكاية دى مرتين النهاردة .. مرة فى موضوع ايران و مرة فى موضوع الحملة
* الكلام ده هرتلة ,, مش عاوز حد يقراه .. بس مش بقدر أقاوم اغراء أن حد يقول أنه كلام كويس ,, مع انى لو قريته و مش انا اللى كاتبه مش حلاقى فيه غير جملتين تلاتة ليهم معنى و الباقى سخافات و نرجسية و جنون عظمة
* كمية الفساد الأخلاقى الموجودة بين المسيسين بتخلينى عاوز انتحر و أبطل شغل سياسة نهائى .. بس كمية الحماس و الذكاء الموجودة فى ناس تانية مسيسين برده ( حتى لو عندهم نفس الفساد الأخلاقى ده ) بتخلينى مدمن سياسة
اجتماع تحضيرى لحملة صوتى مطلبى بجد بجد .. اسراء بنت بألف راجل 30-6-2009
No comments:
Post a Comment