Friday, May 15, 2009

كلام واحد ملخبط



الراجل القاضى اللى طلع حكم منع المواقع الاباحية يا اما متجوز يا اما مسلم نمر - ده لو افترضنا حسن النية فى الحكم و ماقلناش أنه مجرد مقدمة لاعطاء الحكومة المبرر الشرعى لمنع كل المواقع اللى مش عاجباها

العيال الصغيرة و الشباب اللى بتفرغ طاقتها الجنسية فى الفرجة على المواقع دى مش حيلاقوا مكان يفرغوا فيه طاقتهم مع انعدام فرص الجواز لأقل من سن 25 سنة - مع التفاؤل - و حيفرغوها فى العلاقات الجنسية الغير شرعية أو فى الشارع

زى كل مرة حييجى يكحلها حيعميها

*عن الموضوع*

http://bad-way.blogspot.com/2007/12/blog-post_11.html

==========

هى صدفة أن الفرق بين كلمة ( مرجعية ) و كلمة ( رجعية ) حرف واحد ؟

==========

عندما يعلو المنهج فوق الانسان .. يسقط المنهج و يسقط الانسان
واحد ملحد قال لى أنه لما فهم المبدأ ده بقى من أشد مؤيدى شعار الاسلام هو الحل

==========

اللعبة الخطرة بتبقى ضرورية لكسر الملل .. لكن لما يبقى الخطر نفسه حوار مكرر بيبقى ممل فى حد ذاته

==========

كل يوم أقول قربنا نوصل للقاع .. قربنا نوصل للقاع .. يا رب بقى نوصل للقاع .. بتمنى ده عشان عارف ان الوصول للقاع معناه بداية الصعود .... بس يبدو أن القاع أبعد بكتير مما أتخيل و أتمنى

==========

أنا كنت عاوز أعمل حاجات كتير قبل ما أموت .. من ضمنها اعمل كتاب فيه كل مقالاتى و اسافر كل قارات العالم و أشوف رئيس جى بانتخابات ديمقراطية فى مصر انشالله يكون اخوان .. بس دلوقتى عاوز أموت بسرعة و اقابل ربنا .. اكيد بعد الموت الدنيا مش مملة كدة .. دنية ايه ده مفيش دنيا اساسا




==========

تحذيرات كتير بتوصلنى عشان أبعد عن سكة ملحدين الفيس بوك .. طيب أنا قلت مليون مرة أنا مش ملحد .. و مش شايف ان الالحاد أمر منطقى لأن البرهنة على عدم وجود شئ غير مادى بادلة و ادوات مادية أمر ملوش معنى من الاساس .. ربنا خارج حدود المنطق و العقل و المادة و اثبات وجوده أو عدم وجوده بالمنطق و بالعقل و العلم المادى تضييع وقت

المسألة كلها مسألة احساس و بس و فى النهاية أنا بساند حرية التعبير و برفض قلة الأدب على كل المستويات و من كل الاطراف ,,, أنا محايد و بحاول أكون موضوعى و حفضل محايد طول الوقت

=========

محتاج جدا لحب فى اللحظة دى .. مفيش حب و مفيش معنى للحياة .. كل يوم شبه اللى قبله

=========

يمكن أنا بعيد عن السياسة و مش بقرأ جرايد ولا متابع اللى بيحصل فى البلد - بقول يمكن - لكن عندى سؤال للناس المتابعة كويس

حد سمع حاجة عن حركة ستة ابريل من ساعة ما طلعت غير الخناقات و البيانات و طرد الأعضاء و الاعتقالات فى المواسم ؟

أنا آسف لصحابى أعضاء الحركة المحترمين - و هما كتير و على رأسهم احمد ماهر - .. لكن حتى شباب من اجل التغيير اللى كنا بنقول عليها فشلت ( بسبب نفس الناس ال***يم اللى بيهبلوا دلوقتى ) كان نشاطها أعلى و أفيد من كدة بكتير

========

الانسان اللى بيبنى مشروعه الفكرى أو السياسى على نقطة واحدة محورية لازم يفشل لأن عنده نقص جامد جدا
العلمانية مش هى الحل ... الديمقراطية مش هى الحل .. حرية التجارة مش هى الحل... 

العلمانية و الديمقراطية و الفصل بين السلطات كلها مجرد قيم فى منظومة القيم اللى توصلت ليها البشرية خلال مشوار تطورها .. تتكامل القيم دى مع بعضها لمنع المرض الأخطر و أبو كل الأمراض .. الاستبداد

الاستبداد بكل أشكاله و أنواعه هو أس أى بلاء فى اى دولة
الاستبداد العسكرى - الاستبداد الدينى - الاستبداد الاقتصادى

العلمانية هى قيمة معنوية معنية فقط بمنع الاستبداد الدينى ... لكنها ملهاش دعوة بالاستبداد العسكرى أو الاستبداد الاقتصادى

العلمانية مجرد قيمة مجردة مش هى نهاية المطاف ولا الحل السحرى لكل مشاكلنا و تخلفنا المروع

لازم عشان نحل مشاكلنا نواجهها بدل تضييع الوقت فى المسميات و اللعب فى اللغويات

No comments: