تسامحوا يسامحكم الله

المقال الأصلي والتعليقات على فيس بوك

أحادية التفكير مشكلة مزمنة عندنا ... كل واحد بيشوف نفسه بس و بيبص من منظور واحد بس ... يعنى الأحادى بيقيم كل الناس على حسب مقياس واحد بس .. مقياسه هو اللى بيعتبره مركز الكون

يا اما معانا يا اما ملكش وجود أساسا

لو الاحادى ده اسلامى المنظور حيشوف كل الناس يا اما مسلمين أبرار يا اما كفرة بيحاربوا الاسلام .. كل الأرض يا أرض كفر يا أرض ايمان

لو الأحادى ده منظوره اقتصادى ليبرالى حيشوف كل الناس يا اما ليبراليين رأسماليين يا اما عالم حقيرة برة حساباته

أحادية الرؤية معجزة فى حد ذاتها لأنها مستحيلة الحدوث فى الواقع لأن كل حاجة متنوعة قصادنا .. لكنها مع ذلك موجودة فى عقول البشر بطريقة عجيبة زى المرض

المصيبة التانية بقى هى الثنائية ... يعنى الانسان ذو التفكير الثنائى ده بيحط كفتين بس قدامه ... أنت يا اما يمين يا اما شمال

يا اما شيوعى مناضل يا اما رأسمالى مستغل

يا اما أهلى يا اما زمالك

يا اما معايا يا اما ضدى

يا اما مسلم يا اما مسيجى

يا اما ملحد يا اما جاهل

يا اما ملاك يا اما شيطان

يا اما قومى يا اما صهيونى

القطبية الثنائية دى مشكلة مدمرة اكتر من مشكلة الأحادية لأنها مريحة أكتر ... أى حد يختلف معاك يبقى أكيد تبع الطرف التانى اللى فيه كل العيوب

مفيش احتمالية فى الفكر الثنائى وجود طرف تالت رافض الطرفين المتصارعين ولا طرف رابع متقبل الاتنين ولا طرف خامس بيحاول يبقى وسط بينهم ولا طرف سادس ما يعرفش الطرفين دول مين أساسا

الحياة مش كدة ... الحياة مش ضيقة الأفق زى ما ناس كتير بتتعامل معاها

الحياة متنوعة لدرجة مستحيل العقل البشرى يحصرها

التنوع فى الأنغام هو اللى بيخلق الموسيقى الجميلة و لو الموسيقى كانت نغمة واحدة كانت بقت ملهاش معنى

التنوع فى الألوان هو اللى بيخلق الجمال فى عيوننا و لو العالم أبيض و أسود بس مكناش حسينا بجماله

التنوع فى الأفكار و المعتقدات و المبادئ هو اللى بيخلق ثراء يستمتع بيه العقل و هو اللى بيدفع الدنيا كلها لقدام

الأحادية غباء صريح لأنها بتعجز صاحبها عن التعامل مع الآخر

و الثنائية غباء مزدوج لأنها بتخدع صاحبها و تصور له أنه أرقى و أفضل حد فى الدنيا و فى نفس الوقت بتصور له عدوه على أنه قوى جدا ( لأنه بيشوف كل الناس المختلفة معاه فى صف عدوه )

التنوع سنة من سنن الله فى الكون .. و كل ما زاد فهم الانسان للتنوع و تسامح مع الأفكار المخالفة لأفكاره و تقبل الناس المختلفة معاه كل ما ازداد حكمة و رقى و استفادة من وجوده فى الدنيا

===================

مواضيع متهيألى أنها ذات علاقة :

الحكمة ضالة الانسان

http://www.facebook.com/note.php?note_id=10232828033

أن تصير انسان

http://www.facebook.com/note.php?note_id=33709208033

احنا و هما

http://www.facebook.com/note.php?note_id=19822158033

الليبراليين اللى بجد

http://www.facebook.com/note.php?note_id=10807748033

المسلمين جابوا جون

http://www.facebook.com/note.php?note_id=37155758033

شك يشكك فهو دبوس

http://www.facebook.com/note.php?note_id=30964978033