سألت نفسى أنا ليه بحب الفيس بوك ؟ ... لقيت الاجابة عشان بخاف من الوحدة
قالوا عن عمر بن عبد العزيز : ... ان صلح الرأس فليس على الجسد بأس
و قالوا عن مبارك : السمكة تفسد من رأسها و السلم بيتكنس من فوق
الناس دى غلط ... الرأس بيتغير و يموت و بييجى غيره ... الحاكم لابد له من موتة تاخده سواء كان كويس أو وحش ... الشعب هو اللى مش بيموت ... لو أسست حاكم كويس فى شعب جبان فالشعب حيخضع للحاكم السئ بعد موت الحاكم الكويس .... لازم الشعب يبقى كويس و حر عشان يجبر الحاكم - كل حاكم يبقى كويس
التطور سنة الحياة .. لازم نفهم ده عشان نفهم الحياة
فكرت فى الانتحار من كتر الملل .. عارف أنى غالبا حموت نفسى فى يوم من الأيام لما يبقى عندى الشجاعة الكافية .. جملة قريتها عجبتنى ... الواحد بينتحر عشان يحس بالراحة .. لكن الاحساس نفسه لازم له حياة
بحب ناس كتير اوى من اصحابى بحس انهم مش ملوثين ولا مصلحجية ... الواد منتصر بحس أنه قلبه طيب اوى رغم كل الهيصة اللى بيعملها .. خلاخيلو طيب اوى و مثقف لكن بيبقى نفسى أنه يكون نشيط اكتر من كدة عشان يعمل تغيير .. يمكن بحس انى بحقد عليه عشان وصل لسلام أنا مش عاوز أوصل له
زعلت اوى لما فهمت أن اسماعيل النجار بيهاجم أيمن نور عمال على بطال و بسبب و من غير سبب كمساندة لجمال مبارك و ربطت ده بشغله فى روز اليوسف ...... زعلت لأنى صدقته لما قال أنه محايد و حسيت انى عبيط و زعلت لما حسيت أنه عليه ضغط كبير مخليه بيطلع طافة سلبية طول الوقت برغم امكانياته الكتير
هانى أنور بيحبنى بطريقة غريبة .. الواد ده قلبه نقى بصورة مبهرة .. بجد لما واحد زى هانى يحبنى و يحترمنى فده مؤشر قوى ليا أنى برغم كل حاجة لسة انسان كويس
الحب ؟ ... بقى بالطلب و التوجيه بعد ما كان سبارك مفاجئ بيفرحنى .. حاجة محبطة
أ.مصطفى سالم ... مش قادر أشبع من الراجل ده
فى دماغى مليون خطة عشان استغل طاقات الناس اللى أعرفهم فى حاجات ايجابية كتير تغير البلد .. نشاط صحابى بتوع 6 ابريل و ثقافة صحابى التنويريين و علاقات سميح و ابداعات هاملت و مش عارف ايه كمان ...... بس فى الآخر كلها بتقف عند مرحلة الكلام و بس ..... فهمت ازاى الديكتاتور بيفتكر أنه فعلا حيصلح أحوال البلد لأنه بيفتكر أنه قادر أنه يوظف كل واحد فى مكانه الصح
عاوز أسيب شغلى و حياتى و أتفرغ للثورة الخيالية اللى عايش جواها ... عاوز أبقى نبى ... الأنبيا أشكال و ألوان ... بس ما أظنش كان فيه نبى تخين و قصير و بنضارة قعر كباية
لا يأس مع الحياة ولا حياة مع اليأس ...... اد ايه الكلمة دى كنت بقولها من غير ما احسها ..... بس لو حطها دعاة التغيير و التقدم و الحرية قصاد عينيهم حتفرق معاهم و مع البلد جدا
فيه حاجة كبيرة فيا اتغيرت .... بقيت كل ما افكر اكتب لنفسى زى زمان ألاقى نفسى غصب عنى بفكر فى اللى حيقرا كلامى و ألاقى نفسى مش تلقائى ولا حر زى زمان ... حاجة تحزن
بحس ان فيه ميت عين حترصد اللى بكتبه .. و فيه من المية دول خمسمية بيدوروا على غلطة فى كلامى عشان يعملوا خناقة و يطلعونى مبفهمش ... أنا عمرى ما ادعيت أنى بفهم أحسن من أى حد تانى
عجزت اوى ... بقيت كل ما أقرا موضوع مهم ألاقى انى ليا رأى فيه .. أحيانا بحس انى فقدت القدرة على الاندهاش و انى جربت كل حاجة ولو فى الخيال .... و هو ده السبب اللى حنتحر عشانه بعد 30 سنة
زعلت عشان مكسبتش فى مسابقة أنا ليه ليبرالى .. لأنى كنت شايف أن فيه شخص معين كسب من غير استحقاق و مش هو اللى كتب موضوعه .. بس بعد كدة فرحت عشان اللى كسبوا أغلبهم صحابى و فيه منهم واحد على الأقل أنا اللى شجعته عشان يدخل المسابقة و يكتب و يكسب .. و فرحت جدا أنه كسب و قلت المهم ان فيه خطوة ايجابية اتعملت و حتشجع ناس أكتر تكتب و تتكلم
مينا كان عنده حق برغم ان كلامه ضايقنى ... أنا فعلا فى دوامة و صراع مش بيخلص و مش عارف آخد خمس دقايق أراجع كل حاجة من أول و جديد
بدأت أكره ناس كنت حبيتهم لفترة .. أنا بطبعى مؤدب .. ساعات بقل أدبى بس بيبقى ده الاستثناء ... مش بحب اللى قاعدة التفاهم عنده هى قلة الأدب .. عاوز أكتب يافطة .. لو عاوز نفضل اصحاب خليك مؤدب
عاوز أقرا كتب كتير ,,, بس بخاف من الوحدة ,,, رجعت كدة لأول سطر .. ادخل نام
========
ملحوظة . احتمال كل شوية أدخل ازود حاجة بدل ما اكتب نوتة جديدة
No comments:
Post a Comment