Sunday, June 28, 2009

حوار صحفى عن علقة التضامن مع ايران

- أستاذ أحمد ... يا ريت تحكى لنا اللى حصل .. القراء متشوقين لحلقة جديدة من مغامراتك مع النظام المصرى

-- طيب انا راجع مهدود .. حنام عشان عندى بكرة الصبح شغل و لما أرجع ابقى أحكى

- لأ حاول تحكى لنا فى عجالة .... الأول ايه اللى وداك وسط البلد انهاردة ؟

-- كنت رايح أقابل صديق ليا و نروح مع بعض عرض مسرحى فى مسرح الهناجر

- الله !! .. مش مفروض كان فيه وقفة احتجاجية ضد اللى بيحصل فى ايران ؟

-- أولا وقفة انهاردة و وقفة يوم الخميس كانت تضامنية مع الشعب الايرانى مش احتجاجية ضد النظام الايرانى لأننا لا نمتلك الضغط على الحكومة الايرانية و كل ما نملكه هو ابداء التعاطف و التأييد للانتفاضة الشعبية الايرانية ضد التزوير و ضد القمع الحكومى

- يعنى كانت فيه وقفة أهو

-- دى وقفة تضامنية اعلن عنها د.أيمن نور يوم الأربع اللى فات و كانت خاصة بحزب الغد و أنا مكنتش ناوى أحضرها خالص

- واحدة واحدة طيب ..... منين وقفة خاصة بحزب الغد و منين مكنتش ناوى تحضرها و منين حضرتها و بتقول انضربتم ؟ يا ريت تفهمنا

-- يوم الخميس اللى فات مجموعة من الشباب الليبراليين من أحزاب و مؤسسات مدنية مختلفة كانوا قرروا عمل وقفة تضامنية مع الشعب الايرانى ...... و قبل ما تسأل ليه و اشمعنى ايران شوف اللينك ده
http://www.facebook.com/note.php?note_id=91996118033
المهم .... كان فيه ناس من اللى مفروض يحضروا الوقفة اعترضوا على حضور الدكتور أيمن عشان محدش يقول أن هو اللى منظمها أو داعى ليها ....... و ساعتها أنا وافقت وجهة النظر دى عشان أنا عارف أنه لو دعينا كل قيادات الأحزاب و المنظمات الليبرالية محدش حييجى غير أيمن نور و ساعتها حيتقال أنه هو اللى منظم الوقفة
و ده حيخلى فيه شقاق يحصل بينه و بين بقية دعاة التغيير

و أنا شخصيا شايف أن من أهم أهداف حركة التغيير الليبرالية فى مصر فى الفترة الجاية هو أن المشاركين فيها يشيلوا الحساسيات بينهم و بين بعض و تبقى فيه بينهم ثقة متبادلة


الدكتور أيمن أعلن أن حزب الغد حينظم وقفة تضامنية خاصة بالحزب يوم السبت و أنا اعتبرت أنه عمل كدة عشام محدش يبقى له حجة فى أنه يطلب عدم حضوره
من وقفة يوم الخميس


- لحظة .. مش معنى حضور أيمن نور لكل الأنشطة اللى بتعملوها أنه بيلمع نفسه على حسابكم ؟

-- لأ ... ببساطة شديدة .. ده
سياسى بيطرح نفسه كبديل مدنى عن الوريث المنتظر و من حقه أنه ينشط و يتحرك و من السفه الشديد جدا أنك تلوم اللى بيتحرك و بيجتهد و ما تلومش اللى قاعد فى بيته أو قاعد فى قصره و ملوش علاقة بالشارع ... متهيألى أى سياسى ناجح فى الدنيا ( عبد الله جول أو أوباما مثلا ) كان حيتحرك و ينشط بنفس الطريقة و أعتقد أن كلنا نتمنى يبقى كل نشاط ليبرالى فيه مجموعة كبيرة من قيادات الأحزاب الليبرالية و المفكرين و لو أى حد فيهم حضر ماحدش حيزعل منه

- طيب كمل اللى حصل ... مكنتش عاوز تحضر وقفة النهاردة ليه ؟

-- الوقفة التضامنية بتاعة يوم الخميس كانت ضعيفة و سيئة للغاية و عدد الحضور كان ضعيف فى حدود 20 واحد بس- منهم بالمناسبة 3 من معتقلين 6 أبريل و عدد كبير من ناشطين فى أحزاب ليبرالية مختلفة و فى حملة صوتى مطلبى ... يعنى ناس شغالة على تغيير الواقع جوة مصر بجد مش ناس قاعدة على البورصة بتشيش زى ما ناس صحابنا بيقولوا
أنا اعتبرت أن الوقفة بتاعة الخميس فشلت جزئيا بسبب اعلان د.أيمن عن تنظيم وقفة يوم السبت ( ندا سلطانى تم اغتيالها يوم السبت الماضى بالمناسبة) و قررت كنوع من الاحتجاج أنى لا أعلن عن الوقفة دى ولا أحضرها

- طيب ايه بقى اللى حصل ؟ معلش سهرناك معانا شوية

-- ولا يهمك ... أنا رحت وسط البلد على أساس نتقابل هناك حسب ما اتفقنا ( صديقى ده حتى كان فاكرنى ححضر الوقفة دى و أنا قلت له لأ احنا نروح المسرحية أحسن ) و نطلع سوا على الهناجر

اتصلت بصديقى لقيته مش بيرد فرحت الشروق اشتريت كتابين صغيرين و برده لقيته مش بيرد فطلعت استناه فى مقر الغد المحروق - مكتب أيمن نور

- مش ملاحظ أن الموضوع ده كدة خيالى شوية ؟ ايه اللى طلعك المقر غير لو ناوى من الأول تحضر الوقفة

-- أنا مش بكذب و صديقى اللى بتكلم عنه أظن أنه مش حيمانع يشهد على كلامى و هو راجل محترم جدا و أكيد تثق فى كلامه أكتر ما تثق فى كلامى

بعدين احساس بالقوة ملوش حل و أنت ماشى وسط كومة الضباط و العساكر اللى واقفين على باب عمارة الغد و مش خايف منهم و لا كأنهم موجودين

طلعت المقر لقيت أحمد عبد الجواد - اللى اتقبض عليه بعد كدة - بيقول لى الدكتور سأل عليك و عاوزك تروح له على مقر شارع شريف بس روح له من غير ما حد ياخد باله
فى شارع شريف .. قبل التحرك بلحظات

أنا كنت عارف أن غالبا الدكتور ولا سأل عليا ولا حاجة و أن أحمد بيقول كدة عشان أروح بس نزلت من المقر و مشيت شوية ناحية ميدان عبد المنعم رياض عشان أركب تاكسى و أروح الحفلة بس لقيت لسة بدرى أوى

- الساعة كانت كام و الحفلة كانت الساعة كام ؟

-- المسرحية كانت تبدا 8:00 و الساعة كانت لسة 6:30
بعد كدة الشيطان لعب فى دماغى و قال لى ياض ما تروح الوقفة كلها حتبقى نص ساعة بالكتير و بعد كدة على 7:30 تزوغ و تركب تاكسى على المسرح عدل

- عملت ايه لما رحت شارع شريف ؟

-- رحت لقيت الدكتور أيمن واقف فى الشارع مع مجموعة من الناس أعرف منهم كام واحد و منهم واحد اسمه كريم كنت أنا اللى دخلته الغد من 5 سنين بس حبقى أحكى قصته بعدين
سلمت عليه و وقفت مع الناس شوية نتكلم
بعد كدة ظهر مجموعة من الكروش البيضا و اللاسلكى اللى بتجرى علينا من آخر الشارع - شوية رتب ملهاش لزمة نهائى

- ها و حصل ايه بعد كدة ؟

-- أيمن نور قال يلا بينا نتحرك خليهم يخسوا شوية و فعلا مشينا كلنا ناحية طلعت حرب

- طيب ايه اللى مشاك معاه ؟

-- قلت ياواد حنقف شوية فى طلعت حرب و أزوغ بعدها ... خصوصا و أنا متأكد أنهم مش حيقدروا يعملوا له حاجة عشان بيخافوا من الصحفيين و كدة
المهم ... مشينا مجموعة مش كبيرة اوى ... خمسين واحد أو أقل أو أكتر ناحية طلعت حرب

و قبل قهوة ريش كدة بشوية فوجئنا بكردون أمن مركزى قفل الشارع و هجم علينا من قدام و كردون تانى من ورا و حاصرونا فى النص

- قبضوا على حد ؟

-- لأ .. أنا نسيت أقول أن أول ما اتحركنا كان جالنا تليفونات أن شادى و بلال و صفا و مشيرة و عبد الجواد حاولوا يقفوا فى الميدان و اتسحلوا و انضربوا و ركبوهم عربية ترحيلات

- و بعدين ؟

-- لما حاصرونا العساكر شبكنا ايدنا فى ايدين بعض و الدكتور قال للضابط بتاعهم أنتم عاوزين ايه ؟ ... احنا ماشيين فى الشارع و ده حقنا ولا ده كمان ممنوع ؟

- و الضابط قال ايه ؟

-- لأ بقى مش فاكر بالتفاصيل .. هما اتفقوا أن احنا نطلع المقر مقابل أن يتم الافراج عن الخمسة المقبوض عليهم بس فاكر كويس لما أيمن قال للضابط مش أنا اللى تاخدوا من عندى حد و أنا معنديش حاجة أخسرها و الضابط وعد أنهم حييجوا على طول

.. بصينا لقينا بلال واقف على الرصيف فى مدخل محل بيتبيض و عينه وارمة و الدكتور نده له عشان ييجى معانا لكن بلال ما اتحركش
بلال دياب

"من أجل ندا .. من أحل الحرية"

و فهمت منه بعدين أنه كان واقف فى المحل عشان البوليس ما يقدرش يدخل يجيبه من جوة لسبب قانونى الصراحة مفهمتوش ... بس واضح أنه كان فعال لأنهم ما قبضوش عليه

المهم حاولنا نتحرك ناحية بلال عشان نجيبه معانا و هنا بدأت قلة الأدب

اللى حضر مظاهرات 2005 حيبقى عارف كويس أسلوب العصر الشهير اللى بيستخدمه الأمن المركزى ..... العساكر بيلفوا حوالينا و يقوموا ضاغطين علينا بكل قوتهم عشان يخنقونا فى النص
صورة من جريدة الدستور
http://dostor.org/ar/content/view/25849/1/

حتلاقينى سادس واحد من تحت و العسكرى اللى جنبى أول عسكرى أطير منه البيريه


- عملتوا ايه بعد كدة ؟

زقيناهم و زقونا و أنا اتفعصت فى النص ( كل ده و أنا ماسك شنطة الشغل و لابس بنطلون أبيض و سمعت صويت من واحدة كانت معانا و بتقول أنها حامل

- كان ايه دورك فى المدعكة دى طيب ؟

-- أنا عملت حركة كوميدية جدا بس معبرة ... العساكر كانوا مشبكين ايدهم فى بعض و وشهم مكشوف لو ضربت واحد على وشه مش حيعرف يتحرك ولا يرد الضربة .. لكن لأنى ما أقدرش أضرب عسكرى غلبان على وشه بقيت أشيل الطقية من على دماغ العسكرى و أطوحها بعيد ناحية الناس اللى بتتفرج

و رميت تلاتة طواقى و أتمنى يكونوا ضاعوا .. أى رخامة و خلاص

بعد كدة سحلونا على الرصيف لحد باب العمارة و سابونا نطلع المقر و فوق قلنا اننا حنعتصم لحد ما المقبوض عليهم يطلعوا و من هنا كنت ببعت الستيتسات اللى صحابى قروها

و منعونى بعد كدة من الخروج و ضاعت عليا المسرحية

- هو ده "نضال" بقى فى نظرك ؟

-- يا سيدى الفاضل .. احنا كل اللى عملناه أننا مشينا فى الشارع .. من حق أى مواطن مصرى أنه يمشى فى شارع مصرى

و لما الأمن يمنعنا من ده يبقى أكيد الأمن و النظام اللى بيحرك الأمن خايف من حاجة

بالمناسبة أنا أصبت قبل كدة بأزمة قلبية و عمرى 20 سنة فى انتخابات مجلس الشعب 2005 لما واحد من أتباع موسى مصطفى موسى كان داخل انتخابات مجلس الشعب و سلط واحد من البلطجية بتوعه و ضربنى علقة فى وسط الشارع و جات لى الأزمة بعدها لأنى ما قدرتش أرد له الضرب و الاهانة

و كل زمايلى فى الشغل و أهلى عارفين أن صحتى ضعيفة جدا و أى مجهود ممكن يهدنى فى السرير ايام بحالها و كان حيحصل لى كدة النهاردة فعلا لولا ستر ربنا

- طيب أنت مناضل يا عم بدوى .. و د.أيمن ؟

-- أيمن نور اللى بيقولوا عليه بيمثل كان طالع السلم بالعافية بسبب الاصابات و الأمراض اللى طلع بيها من
السجن - اللى هو أصلا اتسجنه ظلم
نفسى أسأل كل واحد من مناضلين التكييف قدموا ايه لمصر قبل ما يتهموا الراجل ده أنه ما عملش حاجة

- طيب سؤال رخم ....... هو أنت بتحكى كل الكلام ده ليه ؟ أنت مش عندك شغل الصبح ؟

-- عشان أنا عندى ذكريات كتييييير جدا ضاعت منى لأنى ما كتبتهاش و اللى حفزنى أكتب اللى حصل انهاردة هو الكلام اللى قريته على الفيس بوك و ملوش أى علاقة بالحقيقة ولا اللى كتبوه يعرفوا حاجة عن اليوم من أساسه
اصابة شادى العدل

تقريبا الضابط كان مسعور فأرم دراعه


- طيب آخر سؤال ..... احساسك بيبقى ايه بعد كل ده ؟

-- احساسى بالحرية لا يمكن وصفه ... مش خايف من الضباط ولا العساكر ولا أمن الدولة ....و مش خايف حتى من اشاعات كدابين الانترنت لأنى عارف أنها مش صحيحة و أنا شفت بعينى اللى حصل و شاركت فيه بنفسى

ممكن جدا نختلف فى وجهات النظر للصبح و تفضل تقول أن ده مش نضال حقيقى من أجل التغيير ..... ساعتها يبقى تقول لى ايه هو النضال الحقيقى من أجل التغيير ؟ ..... و بعد ما تجاوب ..... روح نفذه و أوعدك أنى مش حنتقدك سواء فشل أو نجح

- مش تعبان ؟

-- مجهد جسديا صحيح لكن فخور أنى بعمل حاجة ناس كتير جدا بتخاف منها و حاجات كتير محدش بيفكر يعملها ......و فخور أكتر لأنى بعمل كل ده عشان مصر عن اقتناع باللى بعمله مش عن طمع ولا فى سبيل مكسب شخصى

- أستاذ أحمد .. تصبح على خيييييير
عديت و أنا مروح 12 عربية أمن مركزى فى شارع واحد

يا ترى بيتصرف عليهم كام كل دول ؟
يا ترى المكافآت و الحوافز اللى بياخدوها الضباط فى يوم زى ده قد ايه ؟

1 comment:

Mina E . Azer said...

الغى وصله التعليقات على المدونه دى يا استاذ احمد
ما هو ماينفعش حد يعلق ع اللى بيحصل ده وهو قاعد فى بيتهم تحت التكييف بيتعشى ساندويتشات جبنه رومى
اصل ده اللى انا بعمله :)
وده اللى عندى عشان اقوله
فعلاً .. عاجز عن التعليق