Thursday, June 25, 2009

ليه بساند شباب ايران ؟



ببساطة و ببراجماتية من غير شعارات ولا مثاليات لا مكان لها فى السياسة

أثارت قضية انتفاضة الشباب الايرانى ضد تزوير الانتخابات لصالح نجاد اهتمامى و دفعتنى للحركة للاسباب الآتية

أولا : لأن كل اللى بيحصل فى ايران بيأثر على المنطقة كلها و بيقع على مصر تأثير كبير

1 - لأن وجود اصلاحيين فى السلطة فى ايران - حتى لو سلطة منقوصة مقيدة و حتى لو اصلاحيين نص كم طالعين من عباءة النظام - حيخفف من حدة التوتر و حيقلل من احتمالات الحرب بين اسرائيل و ايران

2 - لأن من مصلحة متطرفين اسرائيل وجود ايران متشددة عشان يتحججوا بيهم و يزودوا شعبيتهم و من مصلحة متطرفين العرب وجود حكومة اسرائيلية متطرفة عشان ينفخوا فى نار التطرف فى كل مكان

المتطرفين مصلحتهم واحدة دايما و وجودهم بيخدم بعضه ... سقوط المتطرف الأكبر فى واشنطن بيضعف من حجة بقية المتطرفين فى اسرائيل و ايران و سوريا و و و

و أنا ضد التطرف من كل الاتجاهات

ثانيا : لأن الشعب الايرانى كشف زيف كذبة الديمقراطية الدينية اللى بيروج لها الاسلاميين فى مصر و على رأسهم الأستاذ فهمى هويدى اللى زار ايران و كتب عنها أكتر ما كتب عن مشاكلنا و مصايبنا فى مصر و ماحدش من اللى بيلومونا على اهتمامنا بايران لامه على اهتمامه بايران

الديمقراطية مفيهاش ضرب رصاص حى على متظاهرين عزل من السلاح
الديمقراطية يعنى شفافية و طرد الصحفيين و قفل الانترنت و القنوات الاعلامية فى ايران دليل على عدم شفافية النظام الايرانى و حرصه على صورته أكتر من حرصه على سلامة مواطنيه
الديمقراطية مفيهاش حد فوق الشعب -- زى شعار الوفد كدة ... الأمة فوق الحكومة
و الشعوب مش قاصرة عشان حد يرشدها للصواب

ثالثا : لأن الشعب الايرانى قدم نموذج حقيقى لشعب حى لا يرضى بالذل و الخضوع للتزوير و الخداع
و حتى و لو نسبة التزوير صغيرة زى ما بيقولوا مبررين القمع هنا و هناك فالشعب الايرانى وقف ضدها

الشباب الايرانى بيدينا مثل حى على أمة أرادت الحياة و القدر حيستجيب ليها غصب عنه
المظاهرات بدأت ضد التزوير و أنا متأكد أنها مش حتنتهى غير بالمطالبة بسقوط المرشد المزور نفسه

الشباب المصرى لازم يتعلم من الشباب الايرانى و لازم يرفض التزوير و يدفع ضريبة الحرية من وقته و أعصابه
لو كانت انتفاضة زى دى حصلت ضد حكم صدام مكانش الدمار اللى حصل فى العراق ده كله حصل

احنا بنلوم دايما الآخرين - أعدائنا - على استغلال أخطائنا و ضعفنا لمصلحتهم و عمرنا ما بنحاول نواجه نفسنا و نصلح أخطائنا بحيث نمنعهم من أنهم ما يستفيدوا منها

أنا عارف كويس أن الكلام ده مش مقنع للهتيفة و بتوع الحرب المقدسة لأحتلال العالم و بتوع عاش جمال مات حسنى

بس هى دى الأسباب اللى خلتنى مساند للشعب الايرانى باللى أقدر عليه و اللى مش مقتنع هو حر أنا ما فرضتش عليه يقف معايا فى وقفة انهاردة ولا اتهمته بالخيانة و الكفر و عدم الاحساس


No comments: