Monday, June 29, 2009

كلنا

كلنا طيبون بصورة أو بأخرى

كلنا رجعيون بدرجة أو بأخرى

كلنا متعصبون لأمر أو غيره

كلنا مرحون فى لحظة أو سواها

كلنا جهلاء بأمور كثيرة

كلنا عاقلون أحيانا و غاضبون أحيانا أخرى

كلنا مستبدون أحيانا متحررين أحيانا أخرى

كلنا نحزن بعض الوقت و نفرح بعض الوقت

كلنا نتوه أحيانا عن الطريق و نصل فى أحيانا أخرى

كلنا ناجحون و أحيانا فاشلون

كلنا عاديون و كلنا متميزون

كلنا بشر و كلنا آخرون

Sunday, June 28, 2009

حوار صحفى عن علقة التضامن مع ايران

- أستاذ أحمد ... يا ريت تحكى لنا اللى حصل .. القراء متشوقين لحلقة جديدة من مغامراتك مع النظام المصرى

-- طيب انا راجع مهدود .. حنام عشان عندى بكرة الصبح شغل و لما أرجع ابقى أحكى

- لأ حاول تحكى لنا فى عجالة .... الأول ايه اللى وداك وسط البلد انهاردة ؟

-- كنت رايح أقابل صديق ليا و نروح مع بعض عرض مسرحى فى مسرح الهناجر

- الله !! .. مش مفروض كان فيه وقفة احتجاجية ضد اللى بيحصل فى ايران ؟

-- أولا وقفة انهاردة و وقفة يوم الخميس كانت تضامنية مع الشعب الايرانى مش احتجاجية ضد النظام الايرانى لأننا لا نمتلك الضغط على الحكومة الايرانية و كل ما نملكه هو ابداء التعاطف و التأييد للانتفاضة الشعبية الايرانية ضد التزوير و ضد القمع الحكومى

- يعنى كانت فيه وقفة أهو

-- دى وقفة تضامنية اعلن عنها د.أيمن نور يوم الأربع اللى فات و كانت خاصة بحزب الغد و أنا مكنتش ناوى أحضرها خالص

- واحدة واحدة طيب ..... منين وقفة خاصة بحزب الغد و منين مكنتش ناوى تحضرها و منين حضرتها و بتقول انضربتم ؟ يا ريت تفهمنا

-- يوم الخميس اللى فات مجموعة من الشباب الليبراليين من أحزاب و مؤسسات مدنية مختلفة كانوا قرروا عمل وقفة تضامنية مع الشعب الايرانى ...... و قبل ما تسأل ليه و اشمعنى ايران شوف اللينك ده
http://www.facebook.com/note.php?note_id=91996118033
المهم .... كان فيه ناس من اللى مفروض يحضروا الوقفة اعترضوا على حضور الدكتور أيمن عشان محدش يقول أن هو اللى منظمها أو داعى ليها ....... و ساعتها أنا وافقت وجهة النظر دى عشان أنا عارف أنه لو دعينا كل قيادات الأحزاب و المنظمات الليبرالية محدش حييجى غير أيمن نور و ساعتها حيتقال أنه هو اللى منظم الوقفة
و ده حيخلى فيه شقاق يحصل بينه و بين بقية دعاة التغيير

و أنا شخصيا شايف أن من أهم أهداف حركة التغيير الليبرالية فى مصر فى الفترة الجاية هو أن المشاركين فيها يشيلوا الحساسيات بينهم و بين بعض و تبقى فيه بينهم ثقة متبادلة


الدكتور أيمن أعلن أن حزب الغد حينظم وقفة تضامنية خاصة بالحزب يوم السبت و أنا اعتبرت أنه عمل كدة عشام محدش يبقى له حجة فى أنه يطلب عدم حضوره
من وقفة يوم الخميس


- لحظة .. مش معنى حضور أيمن نور لكل الأنشطة اللى بتعملوها أنه بيلمع نفسه على حسابكم ؟

-- لأ ... ببساطة شديدة .. ده
سياسى بيطرح نفسه كبديل مدنى عن الوريث المنتظر و من حقه أنه ينشط و يتحرك و من السفه الشديد جدا أنك تلوم اللى بيتحرك و بيجتهد و ما تلومش اللى قاعد فى بيته أو قاعد فى قصره و ملوش علاقة بالشارع ... متهيألى أى سياسى ناجح فى الدنيا ( عبد الله جول أو أوباما مثلا ) كان حيتحرك و ينشط بنفس الطريقة و أعتقد أن كلنا نتمنى يبقى كل نشاط ليبرالى فيه مجموعة كبيرة من قيادات الأحزاب الليبرالية و المفكرين و لو أى حد فيهم حضر ماحدش حيزعل منه

- طيب كمل اللى حصل ... مكنتش عاوز تحضر وقفة النهاردة ليه ؟

-- الوقفة التضامنية بتاعة يوم الخميس كانت ضعيفة و سيئة للغاية و عدد الحضور كان ضعيف فى حدود 20 واحد بس- منهم بالمناسبة 3 من معتقلين 6 أبريل و عدد كبير من ناشطين فى أحزاب ليبرالية مختلفة و فى حملة صوتى مطلبى ... يعنى ناس شغالة على تغيير الواقع جوة مصر بجد مش ناس قاعدة على البورصة بتشيش زى ما ناس صحابنا بيقولوا
أنا اعتبرت أن الوقفة بتاعة الخميس فشلت جزئيا بسبب اعلان د.أيمن عن تنظيم وقفة يوم السبت ( ندا سلطانى تم اغتيالها يوم السبت الماضى بالمناسبة) و قررت كنوع من الاحتجاج أنى لا أعلن عن الوقفة دى ولا أحضرها

- طيب ايه بقى اللى حصل ؟ معلش سهرناك معانا شوية

-- ولا يهمك ... أنا رحت وسط البلد على أساس نتقابل هناك حسب ما اتفقنا ( صديقى ده حتى كان فاكرنى ححضر الوقفة دى و أنا قلت له لأ احنا نروح المسرحية أحسن ) و نطلع سوا على الهناجر

اتصلت بصديقى لقيته مش بيرد فرحت الشروق اشتريت كتابين صغيرين و برده لقيته مش بيرد فطلعت استناه فى مقر الغد المحروق - مكتب أيمن نور

- مش ملاحظ أن الموضوع ده كدة خيالى شوية ؟ ايه اللى طلعك المقر غير لو ناوى من الأول تحضر الوقفة

-- أنا مش بكذب و صديقى اللى بتكلم عنه أظن أنه مش حيمانع يشهد على كلامى و هو راجل محترم جدا و أكيد تثق فى كلامه أكتر ما تثق فى كلامى

بعدين احساس بالقوة ملوش حل و أنت ماشى وسط كومة الضباط و العساكر اللى واقفين على باب عمارة الغد و مش خايف منهم و لا كأنهم موجودين

طلعت المقر لقيت أحمد عبد الجواد - اللى اتقبض عليه بعد كدة - بيقول لى الدكتور سأل عليك و عاوزك تروح له على مقر شارع شريف بس روح له من غير ما حد ياخد باله
فى شارع شريف .. قبل التحرك بلحظات

أنا كنت عارف أن غالبا الدكتور ولا سأل عليا ولا حاجة و أن أحمد بيقول كدة عشان أروح بس نزلت من المقر و مشيت شوية ناحية ميدان عبد المنعم رياض عشان أركب تاكسى و أروح الحفلة بس لقيت لسة بدرى أوى

- الساعة كانت كام و الحفلة كانت الساعة كام ؟

-- المسرحية كانت تبدا 8:00 و الساعة كانت لسة 6:30
بعد كدة الشيطان لعب فى دماغى و قال لى ياض ما تروح الوقفة كلها حتبقى نص ساعة بالكتير و بعد كدة على 7:30 تزوغ و تركب تاكسى على المسرح عدل

- عملت ايه لما رحت شارع شريف ؟

-- رحت لقيت الدكتور أيمن واقف فى الشارع مع مجموعة من الناس أعرف منهم كام واحد و منهم واحد اسمه كريم كنت أنا اللى دخلته الغد من 5 سنين بس حبقى أحكى قصته بعدين
سلمت عليه و وقفت مع الناس شوية نتكلم
بعد كدة ظهر مجموعة من الكروش البيضا و اللاسلكى اللى بتجرى علينا من آخر الشارع - شوية رتب ملهاش لزمة نهائى

- ها و حصل ايه بعد كدة ؟

-- أيمن نور قال يلا بينا نتحرك خليهم يخسوا شوية و فعلا مشينا كلنا ناحية طلعت حرب

- طيب ايه اللى مشاك معاه ؟

-- قلت ياواد حنقف شوية فى طلعت حرب و أزوغ بعدها ... خصوصا و أنا متأكد أنهم مش حيقدروا يعملوا له حاجة عشان بيخافوا من الصحفيين و كدة
المهم ... مشينا مجموعة مش كبيرة اوى ... خمسين واحد أو أقل أو أكتر ناحية طلعت حرب

و قبل قهوة ريش كدة بشوية فوجئنا بكردون أمن مركزى قفل الشارع و هجم علينا من قدام و كردون تانى من ورا و حاصرونا فى النص

- قبضوا على حد ؟

-- لأ .. أنا نسيت أقول أن أول ما اتحركنا كان جالنا تليفونات أن شادى و بلال و صفا و مشيرة و عبد الجواد حاولوا يقفوا فى الميدان و اتسحلوا و انضربوا و ركبوهم عربية ترحيلات

- و بعدين ؟

-- لما حاصرونا العساكر شبكنا ايدنا فى ايدين بعض و الدكتور قال للضابط بتاعهم أنتم عاوزين ايه ؟ ... احنا ماشيين فى الشارع و ده حقنا ولا ده كمان ممنوع ؟

- و الضابط قال ايه ؟

-- لأ بقى مش فاكر بالتفاصيل .. هما اتفقوا أن احنا نطلع المقر مقابل أن يتم الافراج عن الخمسة المقبوض عليهم بس فاكر كويس لما أيمن قال للضابط مش أنا اللى تاخدوا من عندى حد و أنا معنديش حاجة أخسرها و الضابط وعد أنهم حييجوا على طول

.. بصينا لقينا بلال واقف على الرصيف فى مدخل محل بيتبيض و عينه وارمة و الدكتور نده له عشان ييجى معانا لكن بلال ما اتحركش
بلال دياب

"من أجل ندا .. من أحل الحرية"

و فهمت منه بعدين أنه كان واقف فى المحل عشان البوليس ما يقدرش يدخل يجيبه من جوة لسبب قانونى الصراحة مفهمتوش ... بس واضح أنه كان فعال لأنهم ما قبضوش عليه

المهم حاولنا نتحرك ناحية بلال عشان نجيبه معانا و هنا بدأت قلة الأدب

اللى حضر مظاهرات 2005 حيبقى عارف كويس أسلوب العصر الشهير اللى بيستخدمه الأمن المركزى ..... العساكر بيلفوا حوالينا و يقوموا ضاغطين علينا بكل قوتهم عشان يخنقونا فى النص
صورة من جريدة الدستور
http://dostor.org/ar/content/view/25849/1/

حتلاقينى سادس واحد من تحت و العسكرى اللى جنبى أول عسكرى أطير منه البيريه


- عملتوا ايه بعد كدة ؟

زقيناهم و زقونا و أنا اتفعصت فى النص ( كل ده و أنا ماسك شنطة الشغل و لابس بنطلون أبيض و سمعت صويت من واحدة كانت معانا و بتقول أنها حامل

- كان ايه دورك فى المدعكة دى طيب ؟

-- أنا عملت حركة كوميدية جدا بس معبرة ... العساكر كانوا مشبكين ايدهم فى بعض و وشهم مكشوف لو ضربت واحد على وشه مش حيعرف يتحرك ولا يرد الضربة .. لكن لأنى ما أقدرش أضرب عسكرى غلبان على وشه بقيت أشيل الطقية من على دماغ العسكرى و أطوحها بعيد ناحية الناس اللى بتتفرج

و رميت تلاتة طواقى و أتمنى يكونوا ضاعوا .. أى رخامة و خلاص

بعد كدة سحلونا على الرصيف لحد باب العمارة و سابونا نطلع المقر و فوق قلنا اننا حنعتصم لحد ما المقبوض عليهم يطلعوا و من هنا كنت ببعت الستيتسات اللى صحابى قروها

و منعونى بعد كدة من الخروج و ضاعت عليا المسرحية

- هو ده "نضال" بقى فى نظرك ؟

-- يا سيدى الفاضل .. احنا كل اللى عملناه أننا مشينا فى الشارع .. من حق أى مواطن مصرى أنه يمشى فى شارع مصرى

و لما الأمن يمنعنا من ده يبقى أكيد الأمن و النظام اللى بيحرك الأمن خايف من حاجة

بالمناسبة أنا أصبت قبل كدة بأزمة قلبية و عمرى 20 سنة فى انتخابات مجلس الشعب 2005 لما واحد من أتباع موسى مصطفى موسى كان داخل انتخابات مجلس الشعب و سلط واحد من البلطجية بتوعه و ضربنى علقة فى وسط الشارع و جات لى الأزمة بعدها لأنى ما قدرتش أرد له الضرب و الاهانة

و كل زمايلى فى الشغل و أهلى عارفين أن صحتى ضعيفة جدا و أى مجهود ممكن يهدنى فى السرير ايام بحالها و كان حيحصل لى كدة النهاردة فعلا لولا ستر ربنا

- طيب أنت مناضل يا عم بدوى .. و د.أيمن ؟

-- أيمن نور اللى بيقولوا عليه بيمثل كان طالع السلم بالعافية بسبب الاصابات و الأمراض اللى طلع بيها من
السجن - اللى هو أصلا اتسجنه ظلم
نفسى أسأل كل واحد من مناضلين التكييف قدموا ايه لمصر قبل ما يتهموا الراجل ده أنه ما عملش حاجة

- طيب سؤال رخم ....... هو أنت بتحكى كل الكلام ده ليه ؟ أنت مش عندك شغل الصبح ؟

-- عشان أنا عندى ذكريات كتييييير جدا ضاعت منى لأنى ما كتبتهاش و اللى حفزنى أكتب اللى حصل انهاردة هو الكلام اللى قريته على الفيس بوك و ملوش أى علاقة بالحقيقة ولا اللى كتبوه يعرفوا حاجة عن اليوم من أساسه
اصابة شادى العدل

تقريبا الضابط كان مسعور فأرم دراعه


- طيب آخر سؤال ..... احساسك بيبقى ايه بعد كل ده ؟

-- احساسى بالحرية لا يمكن وصفه ... مش خايف من الضباط ولا العساكر ولا أمن الدولة ....و مش خايف حتى من اشاعات كدابين الانترنت لأنى عارف أنها مش صحيحة و أنا شفت بعينى اللى حصل و شاركت فيه بنفسى

ممكن جدا نختلف فى وجهات النظر للصبح و تفضل تقول أن ده مش نضال حقيقى من أجل التغيير ..... ساعتها يبقى تقول لى ايه هو النضال الحقيقى من أجل التغيير ؟ ..... و بعد ما تجاوب ..... روح نفذه و أوعدك أنى مش حنتقدك سواء فشل أو نجح

- مش تعبان ؟

-- مجهد جسديا صحيح لكن فخور أنى بعمل حاجة ناس كتير جدا بتخاف منها و حاجات كتير محدش بيفكر يعملها ......و فخور أكتر لأنى بعمل كل ده عشان مصر عن اقتناع باللى بعمله مش عن طمع ولا فى سبيل مكسب شخصى

- أستاذ أحمد .. تصبح على خيييييير
عديت و أنا مروح 12 عربية أمن مركزى فى شارع واحد

يا ترى بيتصرف عليهم كام كل دول ؟
يا ترى المكافآت و الحوافز اللى بياخدوها الضباط فى يوم زى ده قد ايه ؟

Saturday, June 27, 2009

مِلَحْوَظات عالقاعد


عبيط اللى يفتكر أن كتاب (الأمير) بتاع ميكيافيللى كان سبب فى بوظان أخلاق الحكام و سبب فى ظهور مبدأ الغاية تبرر الوسيلة


أنا قريت الكتاب و قريت كتير جدا فى التاريخ ... الراجل زى أى فيلسوف - زى ماركس بالذات رغم انى ما قريتش لماركس لسة - كان بيحلل الواقع و بيحكيه فعلا ... اللى يقرا قصة حياة أى حاكم أو أمير حيلاقيه بيطبق حرفيا كل اللى قاله ميكيافيللى من قبل ما يتولد ميكافيللى



بس فيه ناس مش بتحب الحقيقة تتقال زى ما هى



=================



من السخافة و الهطل أن واحد يفتكر أن مقالة كتبها هو و قراها عشرة خمستاشر واحد أو مظاهرة طلع فيها مية ميتين واحد و شافها مية غيرهم حتغير الدنيا تانى يوم



فيه ناس فاكرة كدة فعلا و عشان كدة بتحبط و بتقول مفيش فايدة لما ما تشوفش نتيجة سريعة لمجهودها ...... يا جدعان التغيير عملية تراكمية ... كل اللى تقدر تعمله أنك تزود عدد نقط المية اللى بتنحت فى الصخر نقطتين تلاتة كل يوم ... يمكن التغيير اللى بتعمله نقط المية دى مش باين قصادك ..... لكن صدقنى هو موجود .... تعالى شوف الصخرة بعد سنة و أنت تلاقى نقط المية حفرتها أحسن من أشدها ازميل



شوفوا مصر من خمس سنين و شوفوها دلوقتى عشان تعرفوا أن كل نقطة مية نزلت فيها عملت تأثير فعلا



==================



اللى بيقول (مفيش فايدة) ياريت يفكر ايه النتيجة اللى حتعود من كلامه قبل ما يقوله ؟ ... هل كلامه حيحل مشكلة أو يساعد فى حلها ؟ هل كلامه حيخلى اللى بيحاول يغير يطلع بأفكار جديدة ؟ و لا حيجيبله احباط ؟



لو معندكش حل ولا نية للمساعدة فى التغيير ما تبقاش عائق قصاده على الأقل



زى ما قال النبى ... قل خيرا أو اصمت



==================



و تانى تانى تانى ...... نظام الحياة اللى موجود جوة الكتب و مدفون فيها و محفوظ فى عقول الحافظين و ما نزلش على أرض الواقع ما يلزمنيش فى حاجة



==================



للجميع الحرية الكاملة فى رفض الحرية الكاملة .... لكن ليس لأحد أن يحدد لى حدود حريتى الا عندما أضره ضرر حقيقى أو أخالف القانون



===================



كما توقعت - بحب أوى أقول كما توقعت دى - هدأت فورة التيار الالحادى الذى ظهر منذ فترة على الفيس بوك ... لأن مكانش له أهداف محددة .... ده مش معناه أن الملحدين ماتوا أو أسلموا فجأة ... هما لسة موجودين و لسة ملحدين ..... بس يا ريت يبقى ليهم دور ايجابى فى الدعوة للتغيير .... التغيير السياسى هو الأساس



===================



أى نظام ديمقراطى مصرى حيتم اقراره شعبيا و دوليا فى السنين الجاية لابد أنه يعترف بالأخوان شركاء فى السلطة بمقدار شعبيتهم فى الشارع ... مش حقيقى أنهم الوحيدين اللى ليهم تأثير .. فيه قوى سياسية - اسلامية حتى كمان - كتير بتظهر فى المجتمع و بتثبت وجودها ....... بس اللعبة الصح هو أنهم يشاركوا بالتدريج بحيث يتعلموا - تراكميا - ازاى يقودوا دولة و شعب متعدد الرؤى و التوجهات من غير قمع و استبداد



===================



فيه حد قال كلمة حكمة ... مفيش دولة على وجه الأرض تملك رفاهية الاستغناء عن عقل من عقول أبناءها .. المقولة دى بحسها بتتكلم عن مصر أوى أوى ...... و زى ما بتنطبق على نزيف العقول العلمية زى د.زويل و غيره تنطبق برده على الاسلاميين و العلمانيين و الملحدين و غيرهم



أى حد يقدر يساهم فى مستقبل مصر حرام عقلاً و شرعاً و منطقاً أن يتم اقصاؤه و الحجر على رأيه ولازم كلنا غصب عننا نتعلم نتعاون مع بعض عشان مستقبل ام البلد دى



===================



اكتشفت أن التجاهل وسيلة احتجاج فعالة جدا ... حتى لو مش بتجيب نتيجة غير الراحة النفسية



وسيلة استخدمتها مع حكوميين الفيس بوك و حسيت بعدها براحة و قدرة أكبر على التركيز و الانتاج .. كانوا بيستهلكوا وقت و مجهود كتير على الفاضى



استخدمتها مع واحد بحبه جدا لما كتب عنى كلام كويس بس اتكلم بأسلوب وحش و استخدم ألفاظ زى الزفت لما جه يتكلم عن ناس تانية و لقيت أنه من غير المفيد أنى أحاول أتدخل



و لو خدت بالك حتلاقى أنى ما جبتش سيرة الوقفة التضامنية مع شباب ايران اللى عاملها حزب الغد انهاردة



يا ريت اللى ما يعجبوش كلامى يستخدم الوسيلة دى و يريح دماغه منى



==================



المرحلة الجاية النشاط السياسى فى البلد حيزيد بصورة كل الناس حتلاحظها
انهاردة فيه اجتماع فى حزب الغد و حزب الجبهة و حزب التنمية الديمقراطية و الأسبوع ده حتتحط ميزانية حملة صوتى مطلبى و الخطة الاعلامية بتاعتها .. أيمن نور رجع لندوات يوم الأربع بس مش فى باب الشعرية



شعللها شعللها



==================



غريبة أوى - ولا مش غريبة - أن فيه ناس لسانها بيبقى تلاتة متر لما نتكلم فى السلبيات و بتتخرس خالص و بتختفى لما نتكلم عن شغل ايجابى محتاج مجهود و تعب



هو ليه احنا كدة ؟



==================



واحد اسلامى قاللى أنا بكره الليبراليين الجدد جدا ... قلت له أنا بكرههم أكتر منك ... مش بس لأنى ضد التطرف لكن كمان لأنهم بيبهتوا على الواحد بالعافية



==================



هما كانوا بيتنفسوا ايه زمان قبل ما يكتشفوا الاكسجين ؟



==================



امتى حبطل سياسة ؟ ... نفسى أبطل سياسة ... حبطل سياسة لما حال مصر ينعدل أو لما أتجوز واحدة حلوة ( دى كاتبها عشان أخواتنا يدوروا لى على عروسة ) أو ألاقى أن مفيش فى مصر فايدة و أهاجر

with each day passing , what have you done ? مش عارف سمعت الكلام ده فين قبل كدة ؟

Thursday, June 25, 2009

ليه بساند شباب ايران ؟



ببساطة و ببراجماتية من غير شعارات ولا مثاليات لا مكان لها فى السياسة

أثارت قضية انتفاضة الشباب الايرانى ضد تزوير الانتخابات لصالح نجاد اهتمامى و دفعتنى للحركة للاسباب الآتية

أولا : لأن كل اللى بيحصل فى ايران بيأثر على المنطقة كلها و بيقع على مصر تأثير كبير

1 - لأن وجود اصلاحيين فى السلطة فى ايران - حتى لو سلطة منقوصة مقيدة و حتى لو اصلاحيين نص كم طالعين من عباءة النظام - حيخفف من حدة التوتر و حيقلل من احتمالات الحرب بين اسرائيل و ايران

2 - لأن من مصلحة متطرفين اسرائيل وجود ايران متشددة عشان يتحججوا بيهم و يزودوا شعبيتهم و من مصلحة متطرفين العرب وجود حكومة اسرائيلية متطرفة عشان ينفخوا فى نار التطرف فى كل مكان

المتطرفين مصلحتهم واحدة دايما و وجودهم بيخدم بعضه ... سقوط المتطرف الأكبر فى واشنطن بيضعف من حجة بقية المتطرفين فى اسرائيل و ايران و سوريا و و و

و أنا ضد التطرف من كل الاتجاهات

ثانيا : لأن الشعب الايرانى كشف زيف كذبة الديمقراطية الدينية اللى بيروج لها الاسلاميين فى مصر و على رأسهم الأستاذ فهمى هويدى اللى زار ايران و كتب عنها أكتر ما كتب عن مشاكلنا و مصايبنا فى مصر و ماحدش من اللى بيلومونا على اهتمامنا بايران لامه على اهتمامه بايران

الديمقراطية مفيهاش ضرب رصاص حى على متظاهرين عزل من السلاح
الديمقراطية يعنى شفافية و طرد الصحفيين و قفل الانترنت و القنوات الاعلامية فى ايران دليل على عدم شفافية النظام الايرانى و حرصه على صورته أكتر من حرصه على سلامة مواطنيه
الديمقراطية مفيهاش حد فوق الشعب -- زى شعار الوفد كدة ... الأمة فوق الحكومة
و الشعوب مش قاصرة عشان حد يرشدها للصواب

ثالثا : لأن الشعب الايرانى قدم نموذج حقيقى لشعب حى لا يرضى بالذل و الخضوع للتزوير و الخداع
و حتى و لو نسبة التزوير صغيرة زى ما بيقولوا مبررين القمع هنا و هناك فالشعب الايرانى وقف ضدها

الشباب الايرانى بيدينا مثل حى على أمة أرادت الحياة و القدر حيستجيب ليها غصب عنه
المظاهرات بدأت ضد التزوير و أنا متأكد أنها مش حتنتهى غير بالمطالبة بسقوط المرشد المزور نفسه

الشباب المصرى لازم يتعلم من الشباب الايرانى و لازم يرفض التزوير و يدفع ضريبة الحرية من وقته و أعصابه
لو كانت انتفاضة زى دى حصلت ضد حكم صدام مكانش الدمار اللى حصل فى العراق ده كله حصل

احنا بنلوم دايما الآخرين - أعدائنا - على استغلال أخطائنا و ضعفنا لمصلحتهم و عمرنا ما بنحاول نواجه نفسنا و نصلح أخطائنا بحيث نمنعهم من أنهم ما يستفيدوا منها

أنا عارف كويس أن الكلام ده مش مقنع للهتيفة و بتوع الحرب المقدسة لأحتلال العالم و بتوع عاش جمال مات حسنى

بس هى دى الأسباب اللى خلتنى مساند للشعب الايرانى باللى أقدر عليه و اللى مش مقتنع هو حر أنا ما فرضتش عليه يقف معايا فى وقفة انهاردة ولا اتهمته بالخيانة و الكفر و عدم الاحساس


Monday, June 22, 2009

من أجل الحرية


ندا قبل
ندا بعد


بصفتى شاب مصرى ليبرالى يدعم حركة الشعب الايرانى من اجل حريته أدعوكم

المشاركة فى جروب

Supporting Democratic Iran .... من مصر دعماً لشباب التغيير بإيران
http://www.facebook.com/group.php?gid=91118021908

===============

و لمشاهدة فيديو مقتل ندا الفتاة الايرانية التى قتلتها رصاصات القمع و الارهاب العسكرى فى شوارع طهران
http://www.facebook.com/video/video.php?v=93711944759&oid=65873459407

و قتل طالب ايرانى آخر
http://www.youtube.com/watch?v=dlTXkdfmBq8&feature=related

===============

و الى قراءة النسخة العربية من كتاب ( من الدكتاتورية الى الديمقراطية ) و هو يتحدث عن كيفية اسقاط الأنظمة الديكتاتورية بدون استخدام العنف
http://www.aeinstein.org/organizations49f3.html

فقد نحتاجه قريبا جدا فى مصر



لا تعليق ولا رد على التعليقات التبريرية السخيفة لما يحدث

اللى عاجبه اللى بيحصل يخبط راسه فى الحيط

Saturday, June 20, 2009

نعم لترشيح جمال مبارك

بعد كتابة المقال المعنون ب ( نعم أوى لجمال مبارك ) (*)
http://www.facebook.com/note.php?note_id=100222550811
يرجى قراءته قبل الاسترسال

تم القبض على كاتب المقال و سؤاله الأسئلة التالية


س : السيد جمال مبارك أعلن أنه مش حيرشح نفسه فى الانتخابات اللى جاية .. ليه بقى ام الدوشة (**) اللى عاملها دى ؟

ج : أصلى مش مصدقه و مش عارف ازاى ممكن أصدق واحد كان مسئول ضمنيا عن عمليات تزوير واسعة النطاق فى انتخابات 2005 و عمليات فساد و تربح و غيرها كتير ؟

بعدين جمال مبارك مش جوز عمتى عشان أكرهه ولا أحبه ... هو الراجل نفسه حشيله على راسى من فوق و أبعت له جواب شكر لو قرر يسيب الحزب الوطنى و يقطع علاقته بالفاسدين الكبار فى النظام

لكن لحد ما يعمل كدة فأنا بستخدم اسمه كرمز للفساد و الاستبداد ... و لو جه حد غيره من جوة النظام و رشح نفسه حنتقده برده لأنى عارف كويس أن النظام ده فيه فلترة ضد أى حد محترم أنه يبقى ذو مكانة فيه


س : أنت متهم بأنك عامل النوتة دى عشان أيمن نور ... اعترف حيدفعلك كام ؟

ج : ابدا و الله يا بيه ... أيمن فضل فى السجن أربع سنين و أنا كنت فقدت الأمل نهائى فى خروجه و مع ذلك ما بطلتش أساهم باللى أقدر عليه فى عملية التوعية الديمقراطية أو المساهمة فى دفع عملية التغيير فى مصر سواء بالكتابة أو بالحركة

صحيح أحيانا كنت بأصاب بالاحباط و خيبة الأمل و بقرر أوقف اى نشاط ليا و اتفرغ لحياتى الخاصة .. لكن ديل الكلب عمره ما ينعدل

و مشاركتى فى اضراب 6 أبريل دليل على ده (***) و مشاركتى فى مظاهرات دعم القضاة برده دليل على ده .. ساعتها كل اللى عملته مكنش له علاقة مباشرة لا بأيمن ولا حتى بحزب الغد .. صحيح أنا اتعلمت السياسة فى حزب الغد بالأساس و من وائل نوارة بالأخص ... لكن أنا أصلا عضويتى فى حزب الغد مجمدة من 2006 .. لكن كل اللى عملته و لازلت بعمله - على ضآلته - بعمله عشان مؤمن بمصر و بالتغيير فى مصر


س : أمال ليه طرحت أيمن نور كبديل لجمال مبارك .. هو يعنى اللى خلقه ما خلقش غيره ؟

ج : يا باشا أنا بفكر فى كيفية استخدام انتخابات الرئاسة القادمة فى 2011 أو قبلها لعمل تغيير كبير فى مصر

فقوم ايييييييه ,,, حطيت مجموعة معايير محددة شايفها ضرورى تتوفر فى البديل اللى أنا شايف أنه لازم يبقى موجود عشان يقود عملية التغيير وقت الانتخابات و ما بعدها

المعايير دى مجرد اجتهاد منى بناء على خبرتى الشخصية .. شوفها و احكم هل هى معايير موضوعية ولا لأ

============
1 - بديل يكون ذا حد أدنى من التواجد فى الساحة السياسية المصرية الداخلية و الخارجية و له حد أدنى من القبول ( ولا اقول الاتفاق الكامل ) بين النخبة الوطنية المصرية حتى تستطيع أن تفضله على جمال مبارك أو أى ممثل للنظام بدون تردد كبير

2 - بديل يكون له خبرة معقولة بالانتخابات و ألاعيبها و وسائل الفوز بها عمليا و ليس نظريا

3 - بديل يكون اسمه مألوفا لدى العامة و لا يكون جديدا عليهم حتى و ان كرهه البعض

4 - بديل يسعى حقا للفوز فى الانتخابات و ليس التمثيل المشرف

5 - بديل يملك الحد الأدنى من المعرفة العملية بالواقع المصرى و توازناته و مشاكله

6 - و الشرط الأساسى فى البديل الذى أبحث عنه هو أن يقوم بنفسه بطرح نفسه كبديل و ليس أن يقوم غيره بترشيحه لهذا الدور دون علمه لأن ما سيقدم عليه ليس بالأمر الهين أبدا
=================

المعايير دى - اللى أنا بكرر أنها معايير بناء على رؤيتى الشخصية حسب ظروف مصر - لا أدعى أنها معايير علمية تدرس فى كتب السياسة لأنى عمرى ما درست السياسة دراسة أكاديمية

المعايير فى رأيى تنطبق على أيمن نور بصورة كبيرة ... لكن اللى أن عنده بديل تانى تنطبق عليه بعض المعايير دى يطرحه للنقاش

س : يعنى أنت بروح أهلك تألف شوية معايير تنطبق على أيمن نور و بعد كدة تقول أنها معايير موضوعية ؟

ج : يا باشا انا ما فرضتش رؤيتى على حد ... الأول اللى موافق على ضرورة تغيير النظام الحاكم و موافق على أن الانتخابات الرئاسية فرصة ذهبية لده يتفضل يطرح رؤيته و يقول على أى أساس بيختار و نتناقش

لكن اللى مش مقتنع أصلا أن النظام محتاج تغيير و أنه نظام كويس و ابن حلال ما يوجعش قلبى بقى

لاحظ حضرتك أن التغيير عملية مستمرة و مش بتقف عند لحظة معينة و حتى بعد الانتخابات و حتى لو حصل فى الخيال و حصلت ثورة و فجأة بقى أيمن نور رئيس الجمهورية مش حبطل مطالبة بالديمقراطية و بالحريات و بالاصلاح


س : أنت متهم بأن الأحزاب المعارضة فى مصر فاشلة و فاسدة و ضايعة و عميلة للخارج كمان .. ازاى عاوز الأحزاب دى تحكم مصر ؟ مش تصلحها الأول و بعدين تورينا وشك ؟

.. يا فاشل يا فاشل يا فاشل

ج : يا عم أحزاب مين بس .. الأحزاب مؤسسات مصرية ينطبق عليها كل ما ينطبق على كل المؤسسات المصرية زى المجتمع المدنى و زى حتى مؤسسات الحكومة .. نسبة فساد عالية .. غياب للقوانين المنظمة .. واسطة .. الخ

لكن ده زى ما بينطبق على المعارضة بينطبق على الحزب الوطنى و كان الأولى اللى بيطالب باصلاح أحزاب المعارضة يطالب باصلاح الحزب الوطنى لأنه هو الحزب الأكثر عضوية و الأكثر نفوذ

س : ياض بطل استعباط و ماتجيبش سيرة الحزب الوطنى دلوقتى ... دى أحزاب ينفع تحكم مصر ؟

ج : و مين قاااااال أنى عاوز أى حزب من احزاب المعارضة يحكم مصر ؟
أنا راجل بيطالب بالاصلاح بكل الوسائل المتاحة و الأحزاب و الحركات المعارضة مجرد وسيلة فى طريق الاصلاح

أنا لا بعبد حزب ولا بقدس حركة و الدليل على كدة ان لما حزب الجبهة خرج للنور أنا فرحت جدا و اعتبرته التطور الطبيعى لحزب الغد زى ما الغد كان تطور للوفد و عارف ان فى المستقبل حيطلع أحزاب تانى و حركات تانى حساعدها على قد ما أقدر و ظروفى تسمح

حتى حركة شباب 6 ابريل رغم اعتراضى الكامل عليها عمرى ما انتقدتها علنا غير مرة أو مرتين لأن وجودها فى ذاته خطوة ايجابية

و من ناحية تانية أنا مؤمن تماما بالمقولة الخالدة أن السلم بيتكنس من فوق ... يعنى النظام الحاكم لو اتصلح و بقى فيه شفافية و ديمقراطية .. غصب عنها كل المؤسسات التانية حيبقى فيها شفافية و ديمقراطية

س : يعنى انت عاوز الأحزاب المعارضة تفضل زى ما هى بايظة ؟

ج : لأ يا بيه ... أنا مش ربنا عشان أصلح كل حاجة ولا أهتم بكل حاجة أنا بشر و لى حدود ... اللى عاوز يركز كل مجهوده فى اصلاح أحزاب المعارضة هو حر و أرفع له القبعة

بس يبقى فاهم الظروف اللى الأحزاب شغالة فيها ... لسة الواد يوسف الأسمرانى كان كاتب نوتة (****)عن مشاكل و تلاعبات فى حزب الغد ... أنا أقف معاه مليون فى المية و أصدقه فى كل كلمة بيقولها لأنى عارف أن يوسف تعب فى الحزب ده كتير جدا و دفع فيه سنين من عمره و عارف أن غرضه فعلا اصلاح الحزب مش هدمه لتجميل صورة الحكومة زى ما ناس تانية ربنا ابتلانا بيهم

س : من غيرتلقيح كلام .. نرجع للموضوع .... مصر ازاى حيحصل فيها تغيير ؟ ... عمر أحزاب المعارضة و الحركات السياسية ما حتقف ورا واحد منها و تساعده ... دول عالم بتوع كلام و انا عارفهم

ج : يا بيه ما هو أنا عارف أن عمر المعارضة ما بتقف ورا حد ... لكن مين قال أن أحزاب المعارضة أو الحركات ليها السيطرة و النفوذ ده على الشعب المصرى ؟؟

هما عمال غزل المحلة أعضاء فى أنهو حزب معارض ؟
هما موظفين الضرايب العقارية مين زعيمهم السياسى ؟
هما الأهالى اللى عملوا اعتصامات عشان المية ناشطين فى أنهو تيار أيديولوجى ؟
هما أهالى الدواير الانتخابية اللى كل انتخابات بيسقطوا مرشح الوطنى ألاقيهم فين على الفيس بوك ؟

فكك من موضوع المعارضة و النخبة ده يا أبونا .. ما تخليش الواحد يقول كلام أبيح

س : الناس اللى بتتكلم عنهم دول وقت الجد حيبيعوك و ياخدوا خمسين جنيه على باب اللجنة ... و ابقى قابلنى

ج : لو ده صحيح كانوا أخدوا خمسين جنيه وقت ما عملوا اعتصاماتهم و اضراباتهم و فضوها و يا دار ما دخلك شر و ما واجهوش الأمن المركزى و لووا دراع الحكومة ... و حتى لو ده حصل ... يبقى دورى أنى أفضحه و أشهر بيه .. مش أنى أقبله و اسكت

س : الناس اللى بتقول عليهم دول لو اتحركوا البلد حتخرب و الأخوان حيوصلوا للسلطة

ج : تخوف حقيقى فعلا ... لكن مش مبرر لعدم الحركة أو لعدم الدعوة للحركة .. ولا مبرر أنى أستنى 30 سنة تانى أعمل توعية و تثقفيف للناس عشان يرفضوا استبداد الدولة الدينية

أظن النظام الحاكم الحالى فشل فشلا ذريعا فى ده ... و مفيش أى مؤشر لأن استمراره فى الحكم كام سنة كمان حيقلل شعبية الأخوان أو حيقضى على نفوذ المتطرفين الدينيين فى المجتمع

أعتقد اللى يتابع التطور الطبيعى فى الشعوب و الأمم حيلاقى أن الديمقراطية هى فعلا الارادة الالهية ( على حسب تعبير أحد المفكرين الغربيين ) و أن مصر كدة كدة سواء اتحركنا أو متنا بتتحول لدولة ديمقراطية فى كل يوم من الأيام أكتر من اللى قبله ... ده أمر لا مفر منه بسبب التعليم و الاعلام و الاتصالات .. الخ

و أى نظام حكم ديمقراطى لا يمكن أنه يقصى الأخوان او يسجنهم أو يعذبهم زى ما بيحصل دلوقتى
أصلا الموافقة على اللى بيحصل للاخوان - مع اختلافى الشدبد معاهم - لا فيه لا انسانية ولا ليبرالية ولا ريحة أى حاجة محترمة و يا ريت محدش يدعى أنه ليبرالى ولا انسانى و يقول أنه موافق على اللى بيحصل للأخوان من محاكمات عسكرية و بهدلة طلبة و سجون و معتقلات و و .. الخ

ده أنا كنت مرة عملت زى حليم و قلت أنا مش ليبرالى عشان الليبراليين بيأيدوا الاستبداد و الظلم و بيأيدوا كبت حريات الأخوان و غيرهم باسم الليبرالية

حصول الأخوان - رغم اختلافى معاهم للمرة المليون و معارضتى ليهم طول الوقت - على جزء من السلطة فى مصر أمر ضرورى و صحى لأنه بيحطهم قصاد الأمر الواقع و بيدى الحكم عليهم للناس - محدش مننا له حق الوصاية على الناس - بحيث لو أفسدوا يقالوا و لو أصلحوا يستمروا

الأخوان جزء كبير جدا من شعبيتهم أنهم لم تتم تجربتهم بعد و لم يوضعوا فى موقف مسئولية حقيقية

الفكرة هنا أنهم مش حيقدروا يستولوا على السلطة بالكامل لأن التيار المعارض ليهم سواء فى الجيش أو الشعب كبير جدا

و حصول الأخوان على حقوقهم كمواطنين مصريين و دخولهم فى لعبة السلطة الديمقراطية بالتدريج مع وصول المصريين لمرحلة من النضج السياسى مع الرقابة الخارجية المتشددة أظن حيبقى فيه عدل كافى لجميع الأطراف

===============

أقفل المحضر فى ساعته و تاريخه و تقرر عودة المتهم الى مستشفى المجانين



(*)نعم أوى لجمال مبارك
http://bad-way.blogspot.com/2009/06/blog-post.html

(**) أم الدوشة اللى عاملها دى
http://www.facebook.com/group.php?gid=5403452710

(***)مشاركتى فى اضراب 6 أبريل
http://www.facebook.com/note.php?note_id=11255328033

(****)نوتة يوسف عليه الكلام
http://www.facebook.com/note.php?note_id=93675493515

لماذا أؤيد ترشيح جمال مبارك لرئاسة الجمهورية ؟

تعجبت للغاية من السؤال الذى طرحه المهندس وائل نوارة للنقاش

هل توافق على أن يقوم جمال مبارك بترشيح نفسه لأنتخابات الرئاسة القادمة ؟
http://weekite.blogspot.com/2009/06/new-poll-nomination-of-gamal-mubarak.html

و الحقيقة أن الاجابة بكل بديهية هى نعم أوافق على أن يكون جمال مبارك مرشحا للانتخابات الرئاسية

الحقيقة أن الكل يعلم أن جمال مبارك لم يخض أى نوع من انواع الانتخابات فى حياته ... لم يكن مرشحا لعضوية مجلس الشعب أو الشورى أو المحليات أو حتى أى نقابة من النقابات أو نادى من النوادى

و الحقيقة أيضا أننا جميعا نعلم أن الانتخابات فى مصر يتم تزويرها بصورة فجة غالبا خصوصا اذا كانت على منصب أو مقعد يهم الحكومة أن تحتكره و تحتقر ناخبيه فما بالك بالمنصب الأعلى فى الدولة

كما أن وجود جمال مبارك بالحزب الوطنى سئ الذكر و علاقته برموز الفساد و الإفساد فى مصر واضحة قوية غير قابلة للانفصال حتى لو تجمَّل السيد جمال

========

قد تبدو اجابتى سخيفة متناقضة بهذه الطريقة ... أنت تقول أن السيد جمال لا يصلح لخوض الانتخابات و أنه على علاقة لا تنفصم برموز الفساد و تقول أن الانتخابات سوف تتعرض فى هذه الحالة للتزوير لا محالة ... فما وجه التأييد هاهنا ؟

========

حسنا فلنبدأ فى شرح الموقف منذ البداية اذا كان لديك الوقت لتقرأ ... هات كيس فشار و تعالى

صبركوا عليا


=======

دائما و أبدا ما تعتمد كل النظم الاستبدادية - و لا يستثنى منها مصر - على ثلاث أعمدة رئيسية لتثبيت وجودها و قبضتها على المحكومين

أولا : الأمن بأنواعه و أشكاله المختلفة .. أمن الدولة - الأمن المركزى - الشرطة - حرس الجامعة .. الخ

ثانيا : الاعلام .. الدول الاستبدادية تركز على احتكار الاعلام فتحتكر الجرائد و التلفزيون و الاذاعة و تشترى العديد من الكتبة ليقوموا بتبرير أعمالها الاجرامية فى حق شعبها و ليقوموا بتمثيل أنهم يمثلون الرأى العام الراضى عن أداءها و يهاجمون معارضيها بلا تمييز

ثالثا : الشرعية الدولية و تتأتى عن طريق اعتراف بقية دول العالم بشرعية نظام الحكم المسيطر على تلك الدولة

===========

بالنسبة لحالة مصر فأننا نمر بمرحلة انتقالية منذ عدة سنوات غير محددة .. يرى البعض أنها بدأت منذ انتخابات الرئاسة الأولى فى 2005 و يرى البعض الآخر أنها بدأت منذ غزو العراق فى 2003 و المظاهرات الضخمة التى تبعت ذلك

و لكننى أظن انها بدأت فى الظهور منذ منتصف التسعينات بعد انتهاء الولاية الثانية للرئيس مبارك و بداية تكلس شرايين الحكم و لكنها لم تظهر على السطح بقوة الا منذ عدة سنوات

حيث تشكلت القنوات الاعلامية المستقلة ببطأ .. بداية بالجرائد التى لا تتحكم فيها الحكومة بشكل مباشر مثل المصرى اليوم و الدستور و البديل و الفجر و صوت الأمة .... الخ

و مرورا بالقنوات الفضائية المختلفة

و نهاية بالمدونات و مواقع الانترنت و الاذاعات ثم أخيرا الفيس بوك التى لم يقم النظام حتى الآن - ليس مشكورا و لكن مجبرا - بالقيام بأى خطوة قوية للسيطرة عليها سوى بعض المضايقات و بعض التحرشات بالعاملين عليها و التى وصلت لسنوات حبس طويلة فى بعض الأحيان و وصلت الى عمليات اختطاف و تعذيب فى أحيان أخرى

و حيث ظهرت الحركة الاحتجاجية النخبوية (كفاية) التى طالبت بوقف التمديد و منع التوريث بدون تقديم بديل عن النظام الحاكم و فى نفس وقت ظهرت حركة (الغد) التى أدعت أنها تقدم بديلا مدنيا سلميا مختلف عن كلا من الأخوان و الحزب الحكومى قطبى السياسة المصرية منذ فترة طويلة

و تشكل عنها حزب الغد الذى دخل الانتخابات الرئاسية بعد تشكيله بفترة بسيطة للغاية

و رغم العديد و العديد من التجاوزات التى شابت تلك الانتخابات مثل تعدى الانفاق على الدعاية الانتخابية للحزب الوطنى الملايين و عدم السماح بوجود أى مناظرات بين المرشحين و بين الرئيس و برغم عدم تعدى مدة الدعاية الانتخابية المتاحة لجميع المرشحين سوى 21 يوما مقابل سنوات طويلة للرئيس مبارك فى التلفزيون و على الصفحات الأولى للجرائد الحكومية و برغم شن الجرائد الحكومية العديد من الحملات ضد كل من تجرأ و رشح نفسه أمام الرئيس مبارك و برغم وصم مرشح الغد بالذات بأنه صنيعة أمريكية لافساد الوضع السياسى المستقر ( لن أنسى هذا التصريح أبدا للسيد مجدى الدقاق ) فى مصر و برغم عدم قيد الملايين من المواطنين فى الجداول الانتخابية و منعهم من الادلاء باصواتهم

الا أن مرشح الغد حصل على نصف مليون صوت مقابل 6 مليون صوت للرئيس مبارك
انتخابات الرئاسة 2005

و برغم الفوز المؤكد للرئيس مبارك الا أن نصف مليون صوت ذهبت للمنافس الشاب أيمن نور و تفوقه على مرشح حزب الوفد العريق كانت لطمة قوية للنظام و للمراهنين عليه أدت لحبسه بتهمة ساذجة لمدة أربعة أعوام

و أثناء تلك الفترة و بعدها ظهرت العديد و العديد من الحركات الاحتجاجية التى تخلت عن نخبويتها و بدأت تتشكل من المثقفين العاديين و التى تولدت عن كفاية و ترفض الوضع الحالى لمصر و تدعو للتغيير و للحريات مثل (شباب من أجل التغيير) و ( ادباء و فنانون من اجل التغييير ) و حركة (الشارع لنا) و (شايفنكم) و غيرها الكثير

ثم تطور الأمر كما نعلم بعد أن تشجع الناس ( المثقفين و الغير مثقفين بل و الغير متعلمين أصلا ) على مواجهة فساد قرارات الحكومة و الأمن المركزى و بدأ توالى ظهور الحركات الاحتجاجية الاجتماعية ( أى التى تطالب بتحسين الأوضاع المعيشية للقائمين بها ) و الفئوية ( التى تطالب بتحسين ظروف العمل و الأجور للقائمين بها ) و على رأسها جميعا حركة استقلال القضاة
وقفة القضاة

ثم تم تتويج تلك الحركات الرافضة للأوضاع لمعيشية الصعبة باضراب عمال المحلة فى 6 أبريل 2008 بسبب ارتفاع الأسعار المفاجئ و ما سايره من استخدام موسع للانترنت لمساندته و ظهور موقع الفيس بوك كنموذج واضح لوسائل الاعلام الشعبية التى وصلت بدعوة الاضراب لأكثر من أربعين ألف مشترك .. كما تكونت بعد ذلك حركة شباب 6 أبريل التى أصبحت التطور الطبيعى الشبابى لحركة كفاية
اضراب 6 أبريل فى المحلة

و قد ظهر أثناء ذلك حزب الجبهة الديمقراطية الذى قام فى خلال سنوات قصيرة بامداد مصر بأعداد من الشباب المصرى الذى يؤمن بمدنية الدولة و الهوية المصرية فى جميع محافظات مصر و هو ما فشل فيه الحزب الوطنى بكل امكانياته الجبارة و كل سيطرته على الجامعات و مراكز الشباب فى طول مصر و عرضها

و زاد نشاط المجتمع المدنى الحقوقى بصورة ملحوظة و تبنى العديد من القضايا الاجتماعية و الحقوقية مثل حقوق المرأة و الطفل و الأقليات الدينية و التعذيب ... بالطبع لم يبدأ نشاط المجتمع المدنى فى الظهور فى تلك السنوات لكن المتابعة الاعلامية المستقلة له - بعيدا عن التعتيم الحكومى - هى ما جعلت نشاطه ظاهرا للعامة

و ظهرت أيضا العديد من المدونات الشخصية و التى فضحت عمليات التعذيب فى الأقسام و التزوير فى الانتخابات و انتقدت الممارسات الحكومية بصورة أكثر جرأة حتى من وسائل الاعلام المستقلة
طفل مصرى تم تعذيبه فى احد اقسام الشرطة و قامت مدونة الوعى المصرى بنشر فيديو له و هو يحتضر فى بيته و مات بعدها بساعات

و ظهرت عشرات المواقع و المنتديات على الانترنت التى تعمل على رفع الوعى العام للمصريين و تنقل اليهم - خصوصا الشباب منهم - الكتب و الأفكار المتعددة
مجهود المدونين و الناشطين على الانترنت لفضح و مناهضة التعذيب


و من الملفت أيضا أنه مع تطور المجتمع نحو كسر حاجز الخوف الوهمى من الحكومة و مؤسسة الرئاسة فقد ظهرت عدة أفلام سينمائية كوميدية فى البداية ثم درامية بعد ذلك تتناول شخصية رئيس الجمهورية و فكرة حق الشعب فى اختيار رئيسه و سياساته
مثلا لدينا أفلام مثل "عايز حقى" و "ظاظا رئيس جمهورية" و لا أحتاج الى ان أشير أن ثقافة الأغلبية من المصريين هى بالأساس ثقافة سماعية أكثر منها ثقافة مقروءة و مكتوبة و بالتالى فقد وصلت الرسالة الضمنية فى هذه الأفلام لملايين المشاهدين من أولئك الذين لا يقرأون الصحف ولا يتابعون مدونات الانترنت

بالطبع لا نغفل ما يحدث بالخارج و يؤثر على الوضع الداخلى المصرى مثل أحداث غزة و لبنان و ايران و تركيا و تولى أوباما رئاسة أمريكا و و ..... لكننى هنا أحاول رصد الأحداث الداخلية بشكل أكبر لأنها الأهم فى رأيى

=======

نتج عن تلك الفترة الانتقالية - التى لا نزال نحيا فى ظلالها - ما يلى

1 - تآكل شرعية النظام الحاكم بقوة و التى استمدها فى السابق من الحكم العسكرى الذى حكم مصر 1952 ثم جددها من انتصاره فى حرب أكتوبر و عملية السلام فى عصر السادات ثم من الاستقرار و الأمان فى عصر الرئيس مبارك ... و حيث انتهى الاستقرار و لم يتبقى من الأمان شئ ضاعت الشرعية و المبرر لبقائه

و تآكل الشرعية فى الواقع هو أهم اسباب تقديم الحاكم لتنازلات لا نهائية للدول التى تملك الضغط عليه لتمرير أى من قراراته

2 - تجرؤ الآلاف بل و الملايين من المصريين على تحدى السلطات فى حالة ما اذا تعدت على حقوق المواطنين بصورة فجة خصوصا و هى تفعل ذلك بصورة مستمرة مستفزة

بمعنى آخر أكلت سوسة الحرية عصاة الأمن التى استند اليها النظام طويلا جدا و لكن لم يخر جسد النظام صعقا بعد

3 - ظهور تيار اصلاحى - لا يزال يحبو فى خطواته الأولى - قوامه آلاف الشباب الذى يؤمن بضرورة التغيير و التحديث و ان اختلف البعض فى المرجعية الاسلامية للدولة أو علمانيتها الا أنهم متفقين فى المجمل على مقاومة القمع و الاستبداد و عدم اللجوء للعنف

و الأكيد أن هذا الجيل به من المتنورين و المثقفين و الناشطين من الاسلاميين و من الليبراليين و الاشتراكيين و المستقلين أضعاف أضعاف ما حوته الأجيال السابقة و يمتلك الجيل الحالى من التنويريين و المثقفين من وسائل التواصل و تبادل الأفكار و النقاش و التعلم ما لم يحلم به أى من رواد التنوير فى العصور السابقة

مما يعنى فعليا احتراق شاشة تلفزيون النظام التى اعتاد أن يملى أوامره علينا منها و أمسى صوت الحكومة مسموعا و لكنه خافتا غارقا وسط آلاف الأصوات الأخرى التى ترد عليه و تفنده و تنتقده بحرية شديدة غير مسبوقة

4 - العديد من منظمات المجتمع المدنى قد ربطت نفسها بمثيلاتها فى بقية دول العالم و اصبح نقل الأخبار الداخلية للخارج أمرا مستحيل تماما التحكم فيه أو منعه

و ما نراه فى انتفاضة الايرانيين الآن من أجل الحرية و ضد التزوير خير شاهد .. حيث برغم كل ما قامت به الحكومة الايرانية ( المنغلقة على العالم أصلا ) لمنع تسريب و نقل الأخبار الداخلية للخارج و منع الصحفيين الأجانب من التواجد فى البلاد و و ,,, الا أنها لم تفلح فى منعنا من مشاهدة ما تقوم به شرطتها من أعمال قمع همجية تتماثل تماما مع ما تقوم به شرطتنا العزيزة وقت اللزوم مع المصريين و لم تفلح فى اخفاء صور الملايين من أبناء الشعب الايرانى الذى انتفض وراء مرشح لم يكن الأكثر انفتاحا أو ديمقراطية أصلا

و لكنه فقط أتى فى اللحظة المناسبة ليكون شرارة الثورة ضد الاستبداد بالسلطة و تحقير الشعب و أنا مقتنع تماما أن المظاهرات التى اشتعلت للمطالبة بالتحقيق فى التزوير الذى مارسته أجهزة الدولة لن تخمد قبل ان تطال باتهاماتها المرشد الأعلى المزور نفسه

==============

الآن و بعد كل تلك المقدمات و الأحداث التى قد أكون نسيت بعضها لأننى أكتب من الذاكرة مباشرة ما عايشته بنفسى فى السنوات السابقة

هنا تتضح اجابتى - على ما أعتقد - .... نعم أنا مؤيد تماما لدخول السيد جمال مبارك لأنتخابات الرئاسة القادمة

و ليقم الحزب الوطنى بما تعود على أن يقوم به من تزوير للانتخابات لفرض جمال على المصريين بالقوة ليجبر المصريين مرة أخرى على الانتفاضة و التحرك لتنتهى تلك الحقبة السيئة الذكر من تاريخنا تماما

=============

هنا يثور سؤالا آخر لابد أن تختلف آرائنا فيه ..... من هو البديل الذى يصلح لتلك المهمة ؟

لاحظ أننى لا أتحدث عن بديل يحكم مصر حكم فردى مثلما حُكمت لمدة ستون عاما ماضية

بل أتحدث عن بديل يتولى مهمة الوقوف أمام جمال مبارك أو أى ممثل للفساد فى انتخابات رئاسية مفتوحة و يقوم بكشف تزويرها الذى تؤكده كل سوابق الحزب الوطنى و كل المقدمات الحالية

أنا هنا أتحدث عن بديل يكون ذا حد أدنى من التواجد فى الساحة السياسية المصرية الداخلية و الخارجية و له حد أدنى من القبول ( ولا اقول الاتفاق الكامل ) بين النخبة الوطنية المصرية حتى تستطيع أن تفضله على جمال مبارك أو أى ممثل للنظام بدون تردد كبير

أنا هنا أتحدث عن بديل يكون له خبرة معقولة بالانتخابات و ألاعيبها و وسائل الفوز بها عمليا و ليس نظريا

أنا هنا أتحدث عن بديل يكون اسمه مألوفا لدى العامة و لا يكون جديدا عليهم حتى و ان كرهه البعض

أنا هنا أتحدث عن بديل يسعى حقا للفوز فى الانتخابات و ليس التمثيل المشرف

أنا هنا أتحدث عن بديل يملك الحد الأدنى من المعرفة العملية بالواقع المصرى و توازناته و مشاكله

و برغم كامل احترامى لأغلب الاقتراحات التى تطرح فى هذا الصدد فأن الشرط الأساسى فى هذا البديل الذى نبحث عنه هو أن يقوم بنفسه بطرح نفسه كبديل و ليس أن يقوم غيره بترشيحه لهذا الدور دون علمه لأن ما سيقدم عليه ليس بالأمر الهين أبدا

أنا هنا لا أتحدث عن حاكم يحكمنا لعشرون عاما أخرى .. بل بديل يقوم باشعال فتيل انتفاضة مصرية ضد الظلم و ضد التزوير و ضد الاستبداد

انتفاضة من أجل الحرية

فمن يقترح بعض البدائل ؟

Monday, June 15, 2009

this will b deleted tomorrow


my feeling right now is so bad , i need love , i need a physical connection - not sex - sex is not a bad thing to do at night , but its not what i need in this moment , i need tenderness , a soft worm hand holding my shaking hands of sickness 2 make me sleep tight & smiling , a hug , a real big hug of careness , tears are dead n my eyes 4m a long time , waiting 4 such a moment to come out , i need to feel a heart , kind beautiful one , & 2 listen 2 its beat , how can only 1 heart survive n ths life ? , i wish i have a wife 2 love her & 2 feel her love 2 me , but i know i'll be better by morning , i knw its nt my 1st or last night i'll spend alone , i knw i mostly wll die soon & its just scaring me 2 death 2 die alone , its just a feeling that is killing me every single night

Sunday, June 14, 2009

الاستبداد و الأخلاق - الكواكبى


كتاب ( طبائع الاستبداد و مصارع الاستعباد ) للشيخ المفكر المجاهد عبد الرحمن الكواكبى ( 1854 - 1902 ) هو كتاب لا غنى عن قراءته - رغم رأيه السلبى للغاية فى المرأة - لكل من أحب الانشغال و الاشتغال بالسياسة و بالعمل العام و بمستقبل وطنه

هو كتاب يشرح و يشرًّح الاستبداد و قواعده التى لا يستغنى عنها و قوانينه الثابتة و المتغيرة و تأثيره على المجتمعات و الأفراد و الثروات و الأخلاق و الدين و شخصيا أظن أنه يعادل فى القوة و البساطة كتب عالمية أخرى تتحدث عن نفس الموضوع و يتفوق عليها بأنه وليد بيئتنا و يتحدث بلساننا

و لو أن الأمر بيدى لجعلته مقررا - بالفهم و النقاش - على طلبة الاعدادية و الثانوية و الجامعة لتخرج لمصر أجيال ترفض العبودية و الاستبداد و الخضوع و الذل لحاكم أيا كان

أهداه الى صديقى العزيز باسل جمعة عندما كان فى زيارته الأخيرة لمصر و أنا أهدى اليه هذا التلخيص

و منذ بدأت قراءته لم أتوقف عن الاندهاش من قدرة الكاتب على وصف أحوالنا الحالية و مصائبنا المتعاقبة منذ مئات السنين و قررت مشاركة فى الفائدة مع أصدقائى نقل بعض الأجزاء التى أراها فيه أكثر أهمية و أرجو من كل من يقرأ التلخيص لهذه الأجزاء أن يقوم بنشرها كيفما يشاء فى أى مكان يشاء بدون أى شروط

ينقسم الكتاب الى مقدمات و فصول : تعريف الاستبداد ثم الاستبداد و : الدين - العلم - المجد - المال - الأخلاق - التربية - الترقى - ثم التخلص منه ... و قد اخترت البداية بفصل الاستبداد و الأخلاق

أمدنا الله بالعلم النافع و نفع أوطاننا بنا

====================================

الاستبداد و الأخلاق
--------------------

الاستبداد يتصرف فى أكثر الأميال الطبيعية و الأخلاق الحسنة فيضعفها أو يفسدها أو يمحوها , فيجعل الانسان يكفر بنعم مولاه لأنه لم يملكها حق الملك ليحمده عليها حق الحمد , و يجعله حاقدا على قومه لأنهم عون لبلاء الاستبداد عليه و فاقدا لحب وطنه , لأنه غير آمن على الاستقرار فيه و يود لو انتقل منه , و مختل الثقة فى صداقة أحبابه لأنه يعلم أنهم مثله لا يملكون التكافؤ .. و قد يضطرون لإضرار صديقهم بل و قتله و هم باكون

أسير الاستبداد لا يملك شيئا ليحرص على حفظه لأنه لا يملك مالا غير معرض للسلب ولا شرفا غير معرض للاهانة

و هذه الحال تجعل الأسير لا يذوق فى الكون لذة نعيم غير بعض الملذات البهيمية و يكون حريصا أشد الحرص على حياته الحيوانية و ان كانت تعيسة .. و كيف لا يحرص عليها و هو لا يعرف غيرها ؟ .. أين هو من الحياة الأدبية ؟ أين هو من الحياة الاجتماعية ؟

أما الاحرار فتكون منزلة حياتهم الحيوانية عندهم بعد مراتب عديدة ولا يعرف ذلك الا من كان منهم أو من كشف الله عن بصيرته

و مثال أسراء الاستبداد فى حرصهم على حياتهم , الشيوخ الذين يحرصون على حياتهم أشد الحرص عندما تمتلئ بالأسقام و الالام من الشباب فى مقتبل العمر

الاستبداد يسلب الراحة الفكرية فيضنى الأجسام فوق ضناها بالشقاء فتمرض العقول و يختل الشعور .

و العوام قد يصل مرضهم العقلى الى درجة قريبة من عدم التمييز بين الخير و الشر فيما كل ما ليس من ضرورات حياتهم الحيوانية . و يصل تسفل ادراكهم الى أن مجرد آثار الأبهة و العظمة التى يرونها على المستبد و أعوانه تبهر أبصارهم و سماع ألفاظ التفخيم فى وصفه و حكايات قوته يزيغ أفكارهم فيرون و يفكرون أن الدواء فى الداء فينصاعون بين يدى الاستبداد انصياع الغنم بين أيدى الذئاب

و لهذا كان الاستبداد يستولى على تلك العقول الضعيفة للعامة و يتغلب على تلك الأذهان الضئيلة فيشوش فيها الحقائق , بل البديهيات كما يهوى

فيكون مثلهم فى انقيادهم الأعمى للاستبداد و مقاومتهم للرشد و الارشاد ( اللى نعرفه أحسن من اللى ما نعرفوش ) مثل تلك الهوام التى تترمى على النار و تغالب من يمنعها عن ذلك

اذا دقق المطالع المستريب من ان الاستبداد يقوم بقلب الحقائق فى الأذهان فيمكنه أن يرى كيف أنه مكن بعض القياصرة و الملوك الأولين من التلاعب بالأديان تأييدا لاستبدادهم فاتبعهم الناس

فنرى أن الناس وضعوا الحكومات لأجل خدمتهم فقلب الاستبداد الموضوع فجعل الرعية خادمة للرعاة فقبلوا و قنعوا و يرى كيف يتم تستخدم الحكومات المستبدة قوة الشعب على مصالحهم لا لمصالحهم فيرتضوا و يذعنوا

و يرى أنه قبل الناس من الاستبداد ما ساقهم اليه من اعتقاد أن طالب الحق فاجر و تارك حقه مطيع و المشتكى المتظلم مفسد و النبيه المدقق ملحد و الخامل المسكين صالح أمين و من تسمية النصح فضول و الغيرة عداوة و الشهامة عتوا و الحمية حماقة و الرحمة مرضا و النفاق سياسة و التحيل كياسة و الدناءة لطف و النذالة دماثة

و الغريب ليس تحكم الاستبداد فى عقول البسطاء بل اغفاله لكثير من العقلاء و منهم حمهور المؤرخين الذين يسمون الفاتحين الغالبين بالرجال العظام لمجرد أنهم كانوا أكثروا فى قتل الانسان و أسرفوا فى تخريب العمران

و قد يظن البعض أن للاستبداد حسنات مفقودة فى الادارة الحرة فيقولون أن

الاستبداد يلين الطباع و يلطفها و الحق أن ذلك يحصل فيه عن فقد الشهامة لا عن فقد الشراسة
و يقولون الاستبداد يعلم الصغير الجاهل حسن الطاعة و الانقياد للكبير الخبير و الحق أن هذا فيه عن خوف و جبن لا عن اختيار و اذعان
و يقولون أنه يربى النفوس على الاعتدال و الوقوف عند الحدود و الحق أنه ليس هناك سوى انكماش و تقهقر
و يقولون الاستبداد يقلل الفسوق و الفجور و الحق أنه عن فقر و عجز لا عن عفة و دين
و يقولون يقلل التعديات و الجرائم و الحق أنه يمنع ظهورها و يخفيها فيقل تعديدها لا أعدادها

من أين لأسير الاستبداد أن يكون صاحب أخلاق و هو كالحيوان المملوك العنان ؟
يقاد حيث يراد و يعيش كالريش حيث تهب الريح . لا نظام ولا ارادة 
و ماهى الارادة ؟ ... هى أم الأخلاق و قيل عنها : لو جازت عبادة غير الله لأختار العقلاء عبادة الارادة
هى تلك الصفة التى تفصل الحيوان عن النبات بتعريفه بأنه متحرك بالارادة
فالأسير اذن دون الحيوان لأنه يتحرك ( و يبنى المبانى و يقاتل فى المعارك و يكسب البطولات الرياضية ) بإرادة غيره لا بإرادة نفسه

أسير الاستبداد لا نظام فى حياته فلا نظام فى أخلاقه
أليس الأسير يبغى .. فيُزجر أو لا يُزجر ( حسب درجة واسطته )
و يٌبغى عليه فينصر أو لا ينصر ( تبعا لموقعه من المستبد )
و يحسن فيكافأ أو يرهق
و يسئ كثيرا فيعفى عنه و قليلا فيشنق ( لعدم الاحتكام للقانون )
يريد أشياء فيمنع و يرفض اشياء فيرغم 

أقوى ضابط للأخلاق : النهى عن المنكر بالنصيحة و التوبيخ لذلك أطلقت الأمم الحرة حرية الخطابة و التأليف و المطبوعات مستثنية القذف فقط و رأت أن تحمل مضرة الفوضى فى ذلك خير من التحديد لأنه لا مانع للحكام للحكام أن يجعلوا الشعرة من التقييد سلسلة من حديد يخنقون بها عدوتهم الطبيعية : الحرية

و الموظفون فى عهد الاستبداد للوعظ و الارشاد يكونون مطلقا - ولا أقول غالبا - من المنافقين الذين نالوا الوظيفة بالتملق و ما أبعد هؤلاء عن التأثير لأن النصح الذى لا اخلاص فيه هو بذر عقيم لا ينبت و ان نبت كان رياءا كأصله

أما النهى عن المنكرات فى الادارة الحرة فيمكن لكل غيور على نظام قومه أن يقوم به بأمان و اخلاص و أن يوجه سهام قوارصه للضعفاء و الأقوياء سواء فلا يختص بها الفقير المجروح الفؤاد بل يستهدف أيضا ذوى الشوكة و العناد و أن يخوض فى كل واد حتى فى مواقع تخفيف الظلم و محاسبة الحكام و هذا هو النصح الذى يعدى و يجدى و الذى قصده رسول الله بقوله ( الدين النصيحة )

===============

Military coup

حلقة على راديو حريتنا بتتكلم عن الكتاب لقيتها بالصدفة بعد كتابة الموضوع
http://www.horytna.net/Articles/Details.aspx?TID=2&ZID=235&AID=10347

لينك لتنزيل الكتاب
http://rs322.rapidshare.com/files/70679158/kawakibi.ZIP

مواضيع ذات علاقة

يا حسين أنت فين - نقلا عن كتاب الاسلام الديمقراطى لابراهيم عيسى
http://badawy-elghad.maktoobblog.com/375297/%d9%8a%d8%a7%d8%ad%d8%b3%d9%8a%d9%86-%d8%a3%d9%86%d8%aa-%d9%81%d9%8a%d9%86-%d8%9f/

ياحسين أنت فين (2) كتاب الاسلام الديمقراطى
http://badawy-elghad.maktoobblog.com/380264/%d9%8a%d8%a7-%d8%ad%d8%b3%d9%8a%d9%86-%d8%a3%d9%86%d8%aa-%d9%81%d9%8a%d9%86-%d8%9f%d8%9f-%d8%a8%d9%82%d9%8a%d8%a9/

هل نستحق الحرية ؟
http://badawy-elghad.maktoobblog.com/324959/%d9%87%d9%84-%d9%86%d8%b3%d8%aa%d8%ad%d9%82-%d8%a7%d9%84%d8%ad%d8%b1%d9%8a%d8%a9-%d8%9f%d8%9f/

ذات الرداء الأبيض
http://www.facebook.com/note.php?note_id=55889678033

ليه صوتى مطلبى ؟
http://www.facebook.com/note.php?note_id=80302593033