Monday, September 6, 2010

أحوالي انهاردة

دي نوت خاصة بيا ماتهمش حد خالص وللأسف مقدرش أتحكم في الخصوصية من الموبايل بس بكرة أقفلها

بقالي كتير مسجلتش حالتي العامة في نوت إعتمادا علي اني برميها ترنشات في بير تويتر


انهاردة الاتنين 6سبتمبر أواخر رمضان ، زي الأيام دي السنة اللي فاتت سبت شغلي كمهندس واشتغلت مع د.أيمن نور وكانت خطتي الأصلية اني أشتغل في المجتمع المدني نظرا لإهتمامي بالعمل العام وعدم مقدرتي علي جمع شغلي في الهندسة مع نشاطي السياسي


حالتي انهاردة :

- عندي عسر هضم بيقطع بطني ومش قادر أنام من الوجع وده اللي خلاني أقعد أكتب

- مبسوط جدا من بدء شغل وحدة المدربين وناوي أركز فيها بأقصي مايمكن عشان تبقي وسيلتي لصنع التغيير وفي نفس الوقت وسيلة جبارة جدا للكسب المحترم ،، مش ببالغ لو قلت إني شايف نفسي كمان كام سنة في شهرة وخبرة عمرو خالد بس في المجال الحقوقي والديمقراطي


- زعلان ومتضايق جدا من عدم قدرتي علي التركيز في الحاجات المفيدة في الشغل وتضييعي الوقت في حاجات مش مفيدة برغم اني عارف أن الترقي في المجال ده مبني علي التراكم في الخبرة والمعرفة وعارف إني بالفعل ضيعت سنين مش حيتعوضوا ، مش عارف إيه الدلع اللي أنا فيه ده برغم وجود الدافع وجو الشغل المضبوط وطقم زمايل مستحيل ألاقيه في أي مكان تاني وفعلا محتار في سبب عدم قدرتي علي التركيز بقوة واهداري وقت كتير دون فايدة


- مبسوط أوي أن الانضباط بدأ يرجع في الحزب مع الحماس بتاع زمان ،مفيش مرة بروح المقر غير أما ألاقي ناس جديدة ومتحمسة وألاقي ناس بتدير الحزب بنفس حماس 2005 بس بخبرة وتجربة مكانتش متوفرة زمان


يمكن محمد مصطفي يزعل مني بس أنا بحبه وشايف أن تراجعه عن الاستقالة خطوة إيجابية جدا لكل الحزب لأن بعد كدة كل واحد حيفكر ازاي يحل مشاكله داخليا قبل ما يتسرع ويعلن استقالة أو تجميد عضوية علي النت من باب التهويش أو الضغط ،ده حيفيد الغد ويضبط مساره


- متضايق اني بعيد بشكل كبير ، لكن حالتي الصحية المرهقة دي ليها دور وغالبا حنشط أكتر بعد رمضان ،بس برده مش فاهم سر ضعف حماسي للنشاط ،ساعات بفكر إني تلقائيا وبدون وعي بهرب من النشاط عشان دايما فترات النشاط بيعقبها انهيار شديد في صحتي زي بعد كل مظاهرة أوحاجة مجهدة


- سعيد بحالتي العاطفية ،مشاعري مستقرة وقادر إلي حد ما أتحكم فيها، يمكن فكرة الارتباط الرسمي اتأجلت لأجل غير مسمي بس علي الأقل مش وحيد بشكل كامل زي ماكنت بشتكي دايما


- بشكل عام متفاءل ، 6 أبريل حسب كلام عمرو وحسب متابعتي بقت قوة لايستهان بيها وبقت أنضج بكتير من زمان وأجمل حاجة فيها انها مش مرتبطة برموز ممكن تحصل لهم أي حاجة


موضوع بنت الدكتور البرادعي بيصب وبقوة في دعم الحريات والتسامح وحيفوق ناس كتير من وهم ارتباط الأخلاق بالدين


بشكل عام وجود الغد و6أبريل وحملة البرادعي ووحدة المدربين بتاعة المعهد المصري -يمكن دي لسة بدري علي مايبان دورها- كلها علامات أن التغيير حيحصل أسرع وأفضل مما نتخيل ويمكن حتي علي مستوي العقول قبل السياسات
Post a Comment