Monday, August 20, 2012

المثقف والعولمة واسرائيل


لما زمان كنت بسمع أن المثقفين المصريين ضد العولمة مكنتش فاهم السبب، ليه العولمة وحشة؟

عرفت بعدها أن هما لازم يعارضوا أى حاجة لإن المثقف المصري لازم يكافح أى تغيير في أى اتجاه يا إما بحجة اننا منرجعش لورا أو بحجة أننا منفقدش هويتنا

الواقع أن العولمة هي السبب أن فيه دول عمرنا ماعرفناها ولاعرفنا حاجة ثقافتها بقى ممكن نعرف عنها كل حاجة ونتواصل مع أهلها ونتعرف عن تراثها

المثقف المصري يا إما ناقد صحفي أو ناقد سينمائي أو ناقد سياسي ،،، وفي تقديري المبدعين الحقيقيين مش بيشغلوا نفسهم بالنقد لكن بخلق حاجة جديدة والمثقف المصري بدل مايسعى لإستغلال العولمة لنشر الثقافة المصرية في العالم أكتفى برفض العولمة والكفاح ضدها - كفاح ضد التطور

العولمة ظاهرة منطقية ،، ازاى ترفض حاجة محتومة الحدوث بقوانين الحياة؟ ازاى مخك مقفول ومش مستشرف المستقبل؟ لإن المثقف النخبوي المصري بيستمد مجده المزيف من رفض الواقع طول الوقت بدون تقديم لا بدائل ولا أفكار مبتكرة للتجديد

العولمة معناها الدخول في صراع وحوار مع ثقافات العالم ،، أنت جبان خايف على أوهامك الثقافية والدينية لو دخلت في صراع مع ثقافة تانية تتفضح لإنك خايف أن الأجيال اللي حتيجي بعدك ثقافتهم حتختلف عنك وعارف من جواك أن ثقافتك أصبحت ضحلة ومش حتصمد قصاد الثقافات العالمية فعاوز تفضل عازلهم عن العالم

الصينيين اللي عايشين في ظل نظام شيوعي بيغنوا أغاني جزائري ومش منغلقين على ثقافتهم ,,  دي ثقة بالنفس ، الضعيف هو اللي يخبي ثقافته بعيد عن الصراع

النخبوي الإسلامي والنخبوي اليساري شايفين ان مصر مش لازم تكون جزء من العالم وبيفرضوا أنها لازم تبقى منعزلة اقتصاديا وثقافيا وبيدعي بعضهم أن مقاومتهم للعولمة هي مقاومة للغزو الثقافي الأمريكي , وبغض النظر عن أن الغزو دايما يكون من الأقوى للأضعف لكن لاحظ كمان أنك لايمكن أن تجد إنسحاق أمام الثقافة الأمريكية أكثر من الخلط بين "العولمة" و"الأمركة" وكأن الثقافة الأمريكية هي ثقافة العالم كله .. صحيح أن أمريكا هي الأسبق في نشر ثقافتها ولغتها في العالم لكن ده ممنعش المواجهات الثقافية المفتوحة بينها وبين بقية الدول المعتزة بثقافتها وبإنجازها الحضاري

العولمة يعني حرية الأسواق اللي بتسمح لك بالإختيار بين بدائل متعددة في الأغاني والملابس والمعتقدات والرياضة

العولمة يعني فتح المنافسة بين مطاعم مؤمن المصرية ومكدونالدز الأمريكية في دولة تالتة

العولمة يعني الرقص الشرقي يبقى رمز ثقافي خاص بمصر في كل العالم ويواجه فنون الدول التانية وبيضطروا يتعلموه منك لإنك الأصل فيه

العولمة يعني مكتباتك ومراكز البحث العلمي بتاعتك تبقى مربوطة بمكتبات ومراكز البحث العلمي في العالم كله ومتاحفك موجودة في كل دول العالم

العولمة يعني تتفرج على أفلام ياباني وإيطالي وهندي وأوروبي وعربي وأفريقي وأمريكي ومتبقاش قاعد تحت مقص رقابة محلي ضيق الأفق بيعتبرك قاصر ومحتاج تربية

العولمة يعني تحب أميتاب باتشان وهيتشكوك وماركيز ونجيب محفوظ والباليه الروسي وتتابع ريال مدرير وتاكل ماليزي وتسمع فيروز وإيمينم

الأزمة الوحيدة في كلامي أنه متأخر عشرة خمستاشر سنة ،،، العولمة أنتصرت بطبيعة الحال ومصر أصبحت جزء من العالم المترابط – ناهيك عن أن الثقافة المصرية في أصلها كوزموبوليتاني - صحيح جزء متخلف عن الآخرين لكن حيتقدم بطبيعة الحال

عشان تحافظ على ملامح ثقافتك قصاد الغزو الثقافي العالمي قصادك طريقين , إما منع العالم من الوصول إليك والإنعزال وغلق الأبواب في وجه كل ماهو ثقافة أجنبية وده أسلوب فاشل بيتبعه الضعفاء لتأجيل المواجهة المحتومة

وإما تقوي رموزك الثقافية وتلمعها وتطورها , الموسيقى ،اللغة ، التراث ، الأكل ، الرياضة , العلم ، الفنون عشان تدخل بيها المنافسة وتنتصر
مصر تقدر تتقدم دول العالم في المضمار الثقافي بعمق تاريخها ووجود تنوع أثري كمي ونوعي مش موجود في دولة تانية في العالم كفاية ان فيه علم اسمه إيجيبتولوجي , مصر الوحيدة اللي تقدر تشوف فيها أثر - ومش مجرد أثر- فرعوني وقبطي واسلامي

اللغة العربية اللي بيرفضها "مصطنعي الثقافة" على أساس أنها أصبحت قديمة، تقدر تكون مكون رئيسي من مكونات الثقافة العالمية الجديدة

اللغة العربية لغة الكتاب المقدس لمليار انسان، غير أنها لغة نجيب محفوظ وطه حسين والمعري والمتنبي ,, صحيح أن العالم كله بيستخدم الإنجليزي كلغة وسيطة لكن مع ذلك كل دولة تحب لغتها تبقى منتشرة وبيتم تعليمها حوالين العالم كله وتكون مهمة للوصول لثقافتها ومعبرة عن انجازها الحضاري في الحضارة العالمية الحديثة

من وجهة النظر السياسية البحتة فكل مادولة زاد نفوذها كل مالغتها انتشرت في العالم ,, احساسك إيه لما العالم يتعلم عربي عشان يوصل لتراثك الحضاري وانتاجك العلمي والأدبي؟ بنشوف بشكل عملي أهمية مصر في العالم العربي لما تلاقي اللهجة المصرية مفهومة في كل الدول العربية على اختلاف لهجاتها

مش حتكلم عن مدى سعادتي لما عرفت أن مغنيين المهرجانات الشعبية المصريين بيسافروا يعملوا حفلات في لندن ,, احنا بنصدر ثقافتنا –حتى لو جزء منها لا يروق لك - للعالم وسيبك من المثقف المقعر اللي بيسمع زبالة الموسيقى من العالم كله ويرفض الموسيقى الشعبية في مصر ويقول انها مش فن يستحق السماع
لما تلاقي فن شعبي عندك مطلوب برة بلدك ادعمه , شجعه ، زود رواده حرفية ومهارة ,, دي تذكرتك للبقاء في صراعات الثقافات

عندك رياضة المصريين عملوها أو تفوقوا فيها , أدعمها - أيا كان شكل الدعم - عشان توصلنا أننا نرفع راسنا وسط الشعوب التانية

احنا بنتفرج على مسلسلات تركي ونلبس طرحة إيراني وبناكل أكل آسيوي وحنستورد تكنولوجيا من اسرائيل ,, مصر تستحق أن غيرنا يتعلم مننا زى مابنتعلم منه لإنها في الأصل دولة كوزموبوليتانية ،عولمية تعددية , قدرها تأثر في محيطها والعالم كله

حتى الحكم النازي العسكري مقدرش يحبس مصر عن الانفتاح مع العالم وإن وجه الانفتاح ناحية دول معينة له مصلحة معاها زى الإتحاد السوفييتي أو دول عدم الإنحياز

العولمة معناها أن الصراع ينتقل من ساحة الحرب والغزو العسكري والقتل والدم لساحة الثقافة والحضارة والقوة الناعمة , أنت بتواجه نفس الصراع من أجل البقاء لكن من غير قتل وتدمير منافسك وإنما بنشر ثقافتك وسط العالم وجذب مؤمنين بيها

في العولمة تسقط الحدود – والحدود مرحلة من مراحل تطور الحضارة البشرية والصراع - وتموت العداوات التاريخية أو بمعنى أصح تنتقل العداوة للمجالات السلمية بديلا عن المجالات العسكرية , يصبح الجميع منافسين وليسوا أعداء

بسبب العولمة يتحول الكره – السلبي - المؤدي للقتل والتخريب إلى غيرة - دافع إيجابي - للتفوق والمنافسة والوصول للمجد دون إراقة الدماء

اللي بتكلم عليه مش نظريات خيالية في الكتب أو واقع مكتمل لكن واقع في طور التشكيل وقصاده سنين عشان يتبلور بالكامل بكل متطلباته وصفاته زى انتهاء مرحلة الحدود والحروب وبدء مرحلة الحكومة العالمية

كلامي الجاى صادم ويبدو أنه خيالي لكن إحنا لازم نفهم كويس جدا أن اسرائيل اصبحت جزء أساسي من العالم ومش حتختفي لمجرد أننا عاوزين ده يحصل

لازم نفهم ان وجود صراع عسكري على حدودنا مضر للاستقرار والحريات في مصر, وإن الوصول لحل للقضية الفلسطينية لايمكن تأجيله لإن لازم القضية الفلسطينية تنتهي ,لازم مصر بتقلها وبالتعاون مع تركيا ودول الخليج توصل لتسوية يقبلها الفلسطينيين والاسرائيليين كطرفين حيعيشوا سوا , لو عاوزين ننتصر على اسرائيل لازم نتفوق عليها حضاريا واقتصاديا وعلميا مش عسكريا لإن الخراب العسكري مش حيكون في صالح أى طرف من الأطراف ودفن الرءوس في الرمال لم يعد يصلح بعد حصولنا على الحرية لازم ننضج فوق المعادلات الصفرية اللي بتقول وجودك يساوي فنائي أو العكس ،، اسرائيل مش حتنتهي عشان احنا مش شايفنها أو غير معترفين بحقيقة وجودها

المصالحة الفلسطينية لازم تحصل وبسرعة عشان يبقى فيه طرف فلسطيني واحد يقدر يتفاوض بتفويض من شعبه وبدعم من مصر وتركيا ودول تانية يهمها حصول استقرار وانتهاء الصراع المسلح

عموما موضوع السلام لسة قصاده سنين ، مش قبل اسقاط بشار والنظام الإيراني المجرم، لازم يبقى الجميع مستفيد من السلام عشان يتحقق وردا على الناس اللي بيقولوا الأجيال الجاية حتحرر فلسطين فالأجيال حتكون عايشة في ازدهار اقتصادي وحريات مش حتفكر في حرب عشان بلد تانية والثقافة المصرية حتتغير وحتبقى جزء من الثقافة العولمية وأثر التعددية والحريات والرخاء الإقتصادي والانخراط في الحضارة حيخلي الأجيال الجاية أبعد مايكون عن فكرة الحرب

الصراع الفلسطيني الإسرائيلي حيخلص عاجلا أو آجلا بتسوية سياسية ,, كل التأجيل وقت مهدر أثره تعطيل المحتوم وزيادة المتضررين والضحايا واسقاط الصهيونية كأيديولوجية حيكون عن طريق محوها من عقول سكان دولة اسرائيل مش عن طريق محو دولة اسرائيل ككيان وده مجهود أصعب من الحرب نفسها

بقول كدة مش دفاعا عن وجود دولة اسرائيل لكن فهما لواقع عالمي وفهما لإتجاه التطور الحضاري المتسارع بشكل مذهل , أنت النهاردة بتهرب من التجنيد ,الأجيال الجاية في مصر والعالم حتكون مشغولة بالاستمتاع بحياتها وحتنتهي عندهم الرغبة في دخول الحروب أساسا ومالم يعتدى عليك حتفضل ساكت

ومالم تأتي حكومة منتخبة بأغلبية ساحقة من تيار سياسي راديكالي أولويته تحرير القدس وتدمير اسرائيل فمصر لن تحارب اسرائيل ومش مفاجأة ان ده مش حيحصل غير لو النظام العالمي انهار

No comments: