كالعادة .. خلينا نفكر فى المستقبل شوية
دلوقتى بما ان الليبراليين هما الوحيدين تقريبا من اهل السياسة فى مصر اللى مش بيقاتلوا فى مظاهرات غزة و المعبر
و اذا كنا بنقول و نعيد و نزيد فى أن مصر أولا و ان اللى يحتاجه الصعيد يحرم على غزة و أن الاصلاح الداخلى هو الطريق الوحيد للوقوف ضد اسرائيل و ان الحرية هى الحل وكلام كتير محدش بيحس له بطعم ولا نتيجة
و الكلام ده الصراحة لما بيتقال بيبقى غالبا لتبرير عدم الاهتمام بالمذبحة فى غزة و بعد ما بتنتهى المناسبة مافيش فيه حاجة بتتعمل على أرض الواقع
يعنى بنقول مش حنهتم بغزة عشان مصر اولى بالأهتمام و بعد كدة ما نهتمش بمصر أصلا
الفكرة أن الشعور الوطنى المصرى ظهر عند ناس كتير أغلبهم من خارج مجالات العمل السياسى و الفضل لخطاب السيد نصر الله - من ضمن كذا حاجة - اللى حرض الناس و الجيش على الثورة ضد الحكومة فكانت النتيجة أن ناس كتير جه رد فعلهم بالعكس و حسوا أن محدش من برة مصر من حقه يديهم توجيهات
و اظن لازم نستغل الشعور الوطنى ده و ممكن نفتح نقاش حوالين ايه اللى ممكن نعلمه فى مصر الفترة اللى جاية .. ده لو جادين فى كلامنا عن الاصلاح الداخلى
صديقين من الليبراليين الوسطيين اقترحوا نبدأ مشروع محو أمية
و صديق ناصرى كان اقترح حملة لرفع الوعى السياسى عند طلبة الجامعة
و زميل تانى اتكلم أكتر من مرة عن التنمية الثقافية للصعيد
و ناس كتير عندها قابلية لبذل مجهود فى عمل وطنى يحسن من الوضع فى مصر
و أعتقد أننا ممكن نخرج بفكرة تجمع بين أكثر من مشروع و أكتر من هدف يتم تحقيقهم على التوازى مع بعض
ها ايه رايكم نبدأ فى مشروع من دول ؟
No comments:
Post a Comment