Tuesday, January 27, 2009

شفت الحب ؟

شفت أنواع من الحب و جربتها




حب المراهقة الشديد اللى بيبقى من غير هدف ولا مستقبل و بيبقى طاغى على الانسان و شاغل تفكيره و مفيش منه مهرب ولا فايدة حقيقية



حب النت أو التليفون أو الجوابات ( زماااان ) .. من على بعد و من غير معرفة حقيقية ... صورة بتكونها فى خيالك للشخص اللى بتتمناه و تتخيل ان اللى بيكلمك على الانترنت هو زى ما فى خيالك و غالبا لو اتقابلتوا بتلاقى اختلافات كتير مكنتش عامل حسابك عليها



حب التفاهم ... لما تلاقى انسان بتعرف تتواصل معاه و تتفاهموا مع بعض أوى و بينكم لغة محدش تانى يعرف يفهمها غيركم ... و ده حسب شخصية الاتنين دول ... يعنى لو بيحبوا الضحك حتلاقيهم أكتر اتنين بيعرفوا يضحكوا بعض ... لو بيحبوا الرومانسية تلاقيهم اكتر اتنين رومانسيين مع بعض ... ده فى رأيى أفضل نوع حب ممكن يجربه انسان .. خصوصا لما يكون بطبيعته بعيد عن الناس و مش معاهم اوى



حب المراهقة مرة تانى بس المرة دى و أنت مش مراهق ولا حاجة ... تلاقى قلبك بيدق ناحية انسان معين و بتحب تسمع صوته و تشوفه و تتكلم معاه حتى لو مفيش بينكم نقط اتفاق كتيرة ... حتى لو مكانش مهتم بيك خالص ... ده فعلا أصدق و أسوأ أنواع الحب لأنه بيستهلكك من غير أى مردود من الناحية التانية ..... خصوصا مع اختلاف الطباع بيبقى عذاب على الفاضى لو حصل بسببه ارتباط و غالبا بينتهى مع وجود اختلافات و خلافات مع مرور الزمن و عدم قدرة أو رغبة أى طرف فى العطاء 



حب الرغبة ... و ده أسهل نوع حب - أو بمعنى أصح انجذاب - أنه يبقى ممتع أو يتم السيطرة عليه و ينطفى بعد فترة معينة

أحسن انواع الحب عندى هو حب التفاهم ... لأنه مش بيتعرض لأنتكاسات و تقلبات حب القلب الغير معلوم له سبب معين و كل ما بيكبر الانسان فى السن و خبرته بتزيد فى الحياة بيزيد التفاهم و المشاركة بينه و بين الانسان اللى بيحبه .. الخطر الوحيد أنه يتعرض لأنواع تانية من الحب تخليه يتغير و يتشد ناحية حاجات تانية مكنتش مهمة بالنسبة له قبل كدة و تخلى حبه يضعف
==========================




For more :



أحلى قصة حب
http://badawy-elghad.maktoobblog.com/133288/%D8%A3%D8%AD%D9%84%D9%89_%D9%82%D8%B5%D8%A9_%D8%AD%D8%A8
7 November 2006
----------------
عن الحب نحلم و نتكلم
http://badawy-elghad.maktoobblog.com/84477/%D8%B9%D9%86_%D8%A7%D9%84%D8%AD%D8%A8_%D9%86%D8%AD%D9%84%D9%85_%D9%88_%D9%86%D8%AA%D9%83%D9%84%D9%85
31 August 2006
--------------------



ماهو الحب؟
http://www.facebook.com/note.php?note_id=16975808033&id=512682065&index=144
9 June 2008
Post a Comment