Friday, January 23, 2009

جاسوس جاسوس يعنى



كشف حساب

قابلت انهاردة هدى من السودان و يزيد من جنوب افريقيا و من شهرين تلاتة كنت فى اسطنبول مع ناس من بورما و اليابان و فنزويلا و باستنى بنت من بيلاروسيا و انا بودعها فى السفر و قابلت نشطاء ضد كاسترو من كوبا و اتعاملت ساعتها مع بياعين و ضباط و سواقين و مواطنين أتراك

قبلها بكام شهر برده قابلت ناس من الدنمارك و يوم ما اتقبض عليا فى وسط البلد يوم 6 ابريل كنت قابلت بالصدفة اتنين صحفيين من بلد اوروبية مش فاكر اسمها ايه كانوا جايين يغطوا الاضراب و لقونا قاعدين على القهوة و كنت بترجم لهم كلام اسراء و بقية الشباب

ابن خالى نمساوى بييجى مصر كل سنة كام يوم

فى الشغل قابلت واحد فرنساوى و واحد ألمانى و واحد امريكانى و ناس هنود

و فى معرض الكهربا قابلت صينيين كتير اوى و برده كنت بترجم كلامهم لناس تجار مصريين عاوزين يتعاملوا معاهم

على النت مصاحب ناس كتير من دول و جنسيات عربية مختلفة منهم باسل من الأردن و مدونين من تونس و سعوديين

خاطرة

كل دول اتعاملت معاهم بالانجليزى بسهولة برغم ان الانجليزى بتاعى ضعيف جدا فى النطق و المحادثة ... اللغة الانجليزية بقت لغة العالم دلوقتى و فى المستقبل و المصالح التجارية و المعرفية - كالعادة - بتقلص من الاهتمام باللغات القومية فى كل مكان بالتدريج لحد ما بعد سنين طويلة يمكن الواحد يشوفها فى أواخر أيامه و هو شعره ابيض و ماشى باعضاء صناعية تبقى اللغة الأساسية فى العالم هى الانجليزى المختلط بلهجات محلية

حتة غرور

متهيألى ابن بطوطة نفسه بجلالة قدره ما قابلش ناس من أنحاء العالم المختلفة فى السن ده ... ده أنا طلعت واد جامد اوى

خاطرة تانية

الانسان فى كل مكان هو الانسان ... مهما اختلفت تقاليده و عاداته و اديانه و معتقداته و طرق تعبيره فهو انسان ... لما بيبقى مبسوط بيبتسم و لما بيبقى حزين بيعيط و لما بيغضب بيكشر و لما بيجوع بياكل و لما بيشوف الخير مع غيره بيحسده

الانسان بيفضل انسان لحد ما تتدخل المعتقدات اللى هو مؤمن بيها و تخليه يكره الناس و يتمنى ليهم الخراب و الدمار و تحلل له ايذاء غيره من غير تأنيب ضمير باسم الدين أو التقاليد أو الدولة او حتى الحرية

أو ترقى فكره و مشاعره و تخليه يحترم كل بنى البشر و يقدرهم و يتعامل مع اللى يقابلهم كويس

خاطرة تالتة

أوباما .. ابتسامة مشرقة مريبة لأمثالى

خاطرة رابعة

تعيش العولمة .. تنمو الانسانية .. تزدهر الحضارة البشرية و لو كره ساكنى الجحور و منظرى القمع و القهر و الاستبداد بأى اسم كان
Post a Comment