Friday, January 30, 2009

قلوب بيضا




بعض الناس بقابلهم فى حياتى قلوبهم بيضا ... بيضا اوى ... ماشالتش ذنوب كبيرة ابدا ... برغم كل ضغوط الحياة و المشاكل بيفضلوا أنقياء و نضاف من جوة .. رغم كل شئ بيقابلوه بيقدروا يحافظوا على براءتهم و مفيش حاجة بتنكسر جواهم

تحب تتكلم معاهم بالساعات و تحكى لهم كل اسرارك و متاعبك و انت عارف أنهم مش حينقلوها لحد و ان مجرد أنهم بيسمعوك بيخفف عنك و بيديك طاقة رهيبة تخليك قادر تكمل مشوار حياتك المفروض عليك

ناس يمكن تبقى مشاكلهم اكبر من مشاكلك بكتير و مع ذلك بيشاركوك بالفكر و المجهود عشان يحلوا مشاكلك و يمكن حتى من غير ما تشكى لهم
احتياجاتهم ممكن تكون اكبر و أرخم من احتياجاتك بكتير و مع ذلك يساعدوك عشان يخففوا من عليك وجع الاحتياج من غير حتى ما تطلب منهم المساعدة
جروحهم ممكن تكون اعمق و أسخف من جروحك بس ابتسامتهم بتدارى و بتداوى

الناس دول موجودين فى اكتر من مكان و فى اكتر من صورة .. فى الشغل .. فى الصحاب .. على الانترنت .. على التلفزيون ....... أكيد عندهم عيوب زى اللى عندك بس طيبة قلبهم تخليك تغفر لهم و تنسى أى عيب أو نقص و ترتاح و أنت معاهم

الناس دول هما الخير اللى بسببهم ممكن تقول و أنت مطمن ان الدنيا لسة بخير و حتفضل بخير طول ما فيه ناس زيهم

أنا حظى حلو جدا و ربنا بيحبنى فعلا عشان بقابل ناس من النوع ده كتير .. دى وسيلة فريدة من العناية الالهية اللى مش بتحصل لكل الناس

نصيحتى بس أنك لما تلاقى واحد منهم حافظ عليه قوى و اوعى تفرط فيه لا بسهولة ولا بصعوبة .. خلى بالك كمان أنك بلاش تتعلق بيهم زيادة عن اللزوم -- اوعى تتعلق باى حد مهما كان زيادة عن اللزوم - لأن مفيش حد باقى فى حياتك للأبد و كل واحد له محطة حينزل و يسيبك تكمل رحلتك لوحدك من بعده

استفيد من وجودهم فى حياتك على قدر الامكان و ادعى لى انى نبهتك لده
:)
Post a Comment