Tuesday, January 19, 2010

استغراب

مستغرب اوي و حاسس اني غريب

مش عارف أنا ايه ال بعمله وبعمله ليه


زهقان من أن كل حاجة بتتكرر


حاسس بأشمئزاز من كل حاجة حتي من نفسي


حاسس ان فيه حجر أو طينة كاتمة نفسي مانعاني أتكلم


لو قلت أن الموضوع اتقلب من نضال وقيم لتجارة و بحث عن شهرة ناس كتير جدا حتزعل مني


الناس اللي حتزعل هي الناس اللي حتحس اني بتكلم عنها


مش عاوز أتكلم عن موضوع نجع حمادي عشان اي كلام حقوله حيضايق ناس كتير بحبها


خايف لو قلت أن الموضوع كان حاجة بسيطة وتقريبا تافهة الناس ال شاركت فيه تزعل


لكن هي دي الحقيقة بالنسبةلي أنا بالذات ،، الموضوع كله تقديم عزا مش أكتر


أنا كنت رايح ومتأكد أن مفيش خطر و عارف اني في أمان وبتحميني حاجات كتير مش أولها خوف الحكومة من تسخين الأحداث زيادة ولا آخرها علاقاتي بالناس وخصوصا علاقتي الحالية بد.أيمن


غير ناس فعلا بتخاطر بجد وبتدفع تمن نضالها بجد زي محمد عاطف مثلا ال سافرلنا مخصوص ولوحده رغم تهديد ضابط أمن الدولة له مباشرة


يمكن أو غالبا لو كنت مكانه مكنتش حعند


دايما عندي المخاطر محسوبة وببقي عارف اني مش في شدة الخطر


مش عارف ازاي حد ممكن يقارن واحد اتحبس ليلة واحدة والدنيا كلها بتسأل عنه مهما كان شكل الحبس بواحد اتحبس سنين واتعذب واتهان من غير ماحد يعرف له طريق أو اسم


احساس فظيع بالضآلة كبس علي نفسي لما شفت فيديو محمود سامي اللي فيه مشاهد تعذيب من فلم إحنا بتوع الأتوبيس ،، المقارنة مستحيلة


كمان قرفان من كل قلبي من كم المتاجرة بالحدث و تضخيمه بشكل مبالغ فيه ، مش لاحراج الحكومة وانتزاع مزيد من حقوق الانسان منها للمسيحيين ولكن للحصول علي مكاسب خاصة و كل يبكي علي ليلاه


كلامي حيزعل الناس كلها بس لو ما قلتوش يبقي حلغي احترامي لنفسي


د.أيمن قال ان ده كان وفد من حزب الغد وده مش حقيقي و كلام ملوش أي مبرر و كأنه مصمم يحارب نفسه ،، هو دفع مصاريف السفر للمحامين من اسكندرية ودي تعتبر تضحية بالنسبة لظروفه المالية و لكنه لما قال ان احنا مسافرين بتكليف من الغد دمر العمل النبيل ال عمله و ثبت الصورة الزفت عنه


و كأنه لا يعلم أن الناس تقدر تتكلم وتكذب كلامه و ترفض ان شغلها يتنسب لغيرها


6 أبريل عارفين اني مش عضو في الحركة و كان أحسن لهم يقولوا انهم مع حرية الرأي أيا كان الأشخاص المضارين بدل ما يحرجوني ويخلوني أتكسف أكدب كلامهم لأنهم عارفين كويس ان لو كانوا قالوا أن باسم فتحي في 6أبريل مكانش حيسكت
حتي د.مصطفي النجار عاوز ياخد الموضوع في سكة انه يبقي نواة لحركة جديدة و ده في حد ذاته مش غلط حتي لو كنا متفقين في الأول ان تحركنا انساني بحت مش سياسي

لكن ال مضايقني أنه عاوز يبني الحركة دي علي أنقاض الموجود أصلا في الساحة المريضة وبيحاربه بشكل غير معلن


حركة للمستقلين معرفش حتفرق ايه عن 6 أبريل ! وياتري هل حتنتهي زي كل الباقي مجرد شغل اعلام وبس ؟


مستغرب وتعبان ومش عاوز أكون جزء من كل ده


عاوز أفضل قافل موبايلي ونايم تعبان في البيت بس مش عارف لحد امتي !؟

لمتابعة التعليقات والردود : شـــــوف هنــــــــــا 
Post a Comment