أنا إيه؟

فكرت في حالتي - لأسباب مش واضحة - لقيت تشبيه فجأة ظهر قصاد عيني
نقطة مية فوق صخرة ، بتدور وهي نازلة علي طريق تنزل فيه ما ياكلش منها كتير

أنا ايه ؟
لا أنا مهندس ولاصحفي ولا ناشط حقوق إنسان ولا سكرتير

أنا مش عاطل ، بس مفيش اسم محدد للي بعمله ومفيش مستقبل واضح قصادي

لا أنا مدون ولا أنا مبطل تدوين

لا أنا واد حبيب ومقطع السمكة وديلها ولا مؤدب وف حالي مقدرش أقول أن قلبي فاضي ولا أقدر أقول أنه مشغول
مش قادر أتجوز رغم أن الإمكانيات أغلبها متوفر ولا قادر أعيش لوحدي ولا قادر أدخل في علاقات غير في إطار الارتباط المستقر

مش شايف مستقبل ومع ذلك مش ضايع ومتشرد ويا الشغل يا الجوع و ممكن أعيش سنة قدام بنفس الطريقة ، بس وبعدين؟

عندي أصحاب جدعان وبيحبوني بجد بالعشرات ، بس مفيش حد أقدر أقول أنه أقرب أصحابي

عندي مؤهلات كويسةأوي في السياسة -خبرة وعلم و قبول - بس رافض وكاره اني أتحمل أي مسئولية سياسية ولا عاوز أي منصب في أي حاجة لا دلوقتي ولا في المستقبل

لا أنا مريض أو عاجز ولا أنا صحتي بمب

طول الوقت بشتكي من ضعف عام بس لما اتبرعت بالدم حسيت من أسألة الدكتورة عن الأمراض ال عندي وال جاوبتها كلها بالنفي إني أحسن صحيا من ملايين غيري

فكرت أفتح مكتبة وفكرت أكتب كتاب وفكرت أهاجر وفكرت أدخل في علاقات

أنا إيه ؟ لا أنا ملحد أقدر أقول ان ربنا مش موجود ولا قادر ألاقيه ولا أقتنع ولا أحس بأغلب المعتقدات اللي اتربيت عليها ولا حتي قادر أدور علي غيرها

لا أنا ليا تأثير ونفوذ ولا مهمش محدش يعرف عني حاجة

لا أنا جبان بخاف ولا شجاع مش بخاف

أراجوز ؟ .. يمكن
معتوه ؟ .. احتمال
متناقض ؟ .. أكيد
ضايع ؟ .. مش بالشكل المألوف
خارج عن التصنيف أيوة لكن ده مش دايما معناه التميز

بحاول ألاقي طريقي للنهاية الرحيمة