Wednesday, January 20, 2010

ان عرفت الأسباب انتهى الاستغراب

الموضوع بدأ فى السجن

لما طلبنا جرايد و جالنا جرنان أخبار اليوم الضهر و مكتوب فيه أن مجموعة من حزب الغد و حركة كفاية اتقبض عليهم و هما رايحين يعملوا مظاهرة و شغب فى نجع حمادى


هنا كانت أول مرة يتقال الغد عاوز يركب على شغلنا .. مع انك لو فكرت بالراحة حتلاقى أن طبيعى الجرايد الحكومية حتتكلم فى الحاجات اللى بقت معروفة و مش حتتكلم فى حاجة جديدة .. زى ما زمان لما كانت كفابة جديدة و كل بتعمل أى حاجة عمرهم ما كانوا بيذكروا اسمها


و بعد كدة و احنا راجعين فى السكة و المكالمات نازلة على الناس كان فيه جو فرحة و فى نفس الوقت كلام كتير اتقال عن أن 6 أبريل و الغد نسبوا وفد العزا لنفسهم


و كان الحل هو أننا نطلع بيان أننا مش تبع حد و أننا رحنا بمبادرة فردية


ساعتها لفت نظرى موقف غريب جدا من حد من الناس اللى معانا لما بلغنا ان فيه اجتماع لحملة مصريون ضد التوريث فى الغد يوم الثلاث و أن فيه دعوة أنهم يكرمونا فى اليوم ده


و الحد اللى قال كدة قال أن ده معناه أن أيمن نور بيحاول يركب على شغلنا و أن احنا ماينفعش نروح الغد عشان ما نثبتش الكلام ده على نفسنا و أن احنا لازم نعمل مؤتمر فى مكان مستقل بينا فى مكان تانى .. أنا اتضايقت من طريقة الكلام بس سكت


الغريبة أن نفس الشخص اللى انا بحترمه جدا و بحبه جدا فوجئت بيه بيسألنا بعدها بتلات ثوانى هل احنا ممكن نعمل مؤتمر فى حزب الكرامة


طبعا انا قلت أ*ا يعنى .. لو حنروح فى مكان حزبى يبقى الغد أحسن .. ولا هى القصة أننا مانروحش الغد و خلاص ؟؟


لما وصلت القاهرة لقيت حد بيبلغنى أن كل ما الناس بتوع 6 أبريل حد بيسألهم مين فى الناس اللى محبوسة تبعكم بيقولوا بدوى و ان عادل سأل هو يا ترى بدوى ممكن يزعل عشان قلنا أنه فى 6 أبريل


6 أبريل أصلا أكتر من أخواتى ... ماهر و أسماء و انجى و عادل و أمل و كيرى و الأخوان سامى و موتّه و حتى لو قالوا انى عضو فى الحركة فده مكانش ينفع يزعلنى فى حاجة بالعكس
بس اللى ضايقنى أنى حسيت أنهم خافوا يقولوا أن باسم معاهم فى الحركة و قالوا بدوى عشان بدوى غلبان و مش حيفتح بقه وحسيت أن بالرغم من ان الناس مخلصة – و أنا عارف ده كويس اوى اوى - لكن برده داخل فيهم جزئية الاعلام أولا

لما رجعنا بدأ التفكير فى شكل البيان – اللى حيتم الاعلان النهائى عنه يوم المؤتمر اللى مش ححضره – و أول حاجة لفتت نظرى هو الاصرار فى أول و آخر نقطة على أننا مش أعضاء فى أى أحزاب أو حركات و أنا اعترضت و قلت أن الأفضل أن يتقال أن احنا برغم ان مننا أعضاء فى حركات أو أحزاب مختلفة لكن السفر كان بمبادرة فردية مننا


و الناس الحمد لله وافقوا . برغم أن اتقال أن وجهة نظرى متطرفة !!


كل ده كان لحد ما قريت المقال بتاع د.أيمن فى الدستور و نقلته للفيس بوك و عملت تاج للناس اللى كانوا معايا فى الحبس .. المقال اللى بيقول فيه أن المجموعة راحت نجع حمادى بناء على تكليف من الهيئة العليا للغد


طبعا انا دمى فار لأنى عارف أن ده مش حقيقى و عارف ان رد فعل الناس عمره ما حيكون متسامح مع كلمة زى دى حتى لو كان المقصود منها حمايتنا و حتى لو كان د.أيمن دفع كل الفلوس اللى معاه يوميها عشان يبعت لنا المحامين من اسكندرية لقنا


الناس كلها عارفة أنى بعشق حاجة اسمها أيمن نور و أن هو بالنسبة لى أسطورة حتى و هو فى أسوأ حالاته دلوقتى و حتى لو ما استعادش بريقه و حيويته بعد كدة لما الظروف تتحسن لكن اللى الراجل ده قدمه للبلد دى أعلى بكتير من أى مزايدات أو أخطاء صغيرة


لكن ده بالنسبة لى خطأ كبير و ما ينفعش يقع فيه حد زى د.أيمن لأن مهما كان نيته كويسة – و انا واثق من ده – فما ينفعش يتعامل من غير ما يحط فى دماغه أن كل تصرف بيعمله بيترجم بالعكس و بشكل هجومى


و ده اللى حصل .. نفس الشخص – اللى لازلت بحترمه – اللى كان بيقول و احنا فى الحبس أن أيمن نور لا يصلح لأى شئ و أن وجودى أنا و باسم فى الغد بيشوه صورتنا لقيته بيقول أن أيمن نور نزل من نظره بعد كتابة المقال ده


انا قبلها كنت أعلنت على جروب الغد أنى كنت رايح بصفة شخصية مش حزبية برغم ان د.أيمن كان طلب منى أبلغ مواساتى للناس و للأنبا كرلس لما أقابله بس بصفة شخصية مش حزبية


منكرش ان الكلام كله كدة على بعضه تعبنى نفسيا ,,, و منكرش انى برغم قربى من د.ايمن و معرفتى قد ايه الراجل ده حد نضيف من جوة و محترم و مهما اختلفت معاه لازم تحترمه الا أن المقال خنقنى جدا و كان هو السبب فى انى كتبت نوتة (استغراب) و يمكن كان خبث منى أو غباء انى ربطت الموضوعين ببعض


بعد كدة لما جت الردود اياها اللى بتصاد فى المياة العكرة و ردود ماهر و أمل اتخنقت أكتر ,, لكن فيه ردين بالذات هما اللى حسيت انى كتبت النوتة دى عشان ييجولى من غير ما أقصد


الأولانى رد محمد خرا عادل لأنه أعترف أنه هو اللى استعبط من غير ما يقول لحد – كالعادة – و كفاية عليه التهزيق اللى حياخده من كل الناس اللى فى 6 أبريل


رد محمد عادل مش مهم أعيد كتابته ,, بس أنا بعتذر لكل أخواتى فى 6 أبريل و خصوصا ماهر أخويا الكبير على اللى قلته و زى ما قلت لعادل أنا يشرفنى أنى أبقى عضو فى 6 أبريل


و التانى رد غنيم اللى حبيت أنشر جزء منه رغم أن هو بعته لى بينى و بينه


""
فقد كنت على اتصال دائم بة كل خمس دقائق تقريبا أثناء الازمة
وكان فى شدة القلق عليكم وعليك انت بالذات ولحالتة الصحية كان يكفية البيان الصادر عن الحزب
ولكنة كان على اتصال بعديد من الدوائر السياسية لمعرفة ابعاد اعتقالكم ومدتة والى اى مدى

وكانت كل المؤشرات تدل على انكم ستحبسون 15 يوما على ذمة التحقيق ولهذا كانت ردود افعالنا تتصاعد
بدأ من البيان الذى كتبنا مسودتة بدون أسراء فى الهيئة العليا وبأسمك ضمن النشطاء فقط
الى تعديلة من جانب دكتور ايمن لتكون اسراء من أعضاء الهيئة العليا حماية لها قد تحتاجها مستقبلا حسب سير التحقيق
وصولا الى ادراجة اسمك وحدة فى بند خاص لذكر واقعة ضربك
لتسليط الاضواء عليها
الى توجيهى الى وضع اسمك ضمن العاملين فى المعهد فى بلاغى للنائب العام رغم انك من غير العاملين فى المعهد ولست منسق حملات كما كتبت
ولك ان تتهمنى ايضا بالكذب او محاولة سرقة اسمك لرفع مكانة المعهد مثلما اتهمت اسراء دكتور ايمن
ولكنها ليست الحقيقة
ولكن لوجودكم فى قلب الازمة لم تشعروا مطلقا بما كنا نشعر بة وخاصة انا وقد اصبحت فجأة وحيدا فى المعهد ومسئولا عن الدفاع وحدى عن زملائى المعتقلين وأعتقد ان ما يصدر عنى فى هذا التوقيت سواء كان خطأ أو صواب لا يمكن ان تعلق من اجلة المشانق من اجلى
ومثلة حاول دكتور ايمن بكل السبل حمايتكم بالقول انكم كنتم هناك بتكليف من الحزب ومنة لتكون نقطة احراج للنظام لانة اصبح فى مواجهة حزب وليس مجموعة شباب من الهواة
لقد المنى ما كتبتة عن دكتور ايمن لعدم معرفتك بحالتة ولا شعورة وقت اعتقالكم
ومشفقا علية من وصول كلامك الية
وما اكتبة لك على الخاص لا أستطيع كتابتة فى التعليقات لان السكاكين علية أكثر من الورود
""

رد غنيم و ردود ماهر و امل و أسماء أتمنى أنها تكون ريحت الناس اللى قالت أن 6 أبريل و أيمن نور ركبوا على الموضوع و حاولوا يسرقوه لمصالحهم الشخصية


بالنسبة لى و حسب خبرتى الشخصية مع كل الناس اللى ليهم علاقة بالموضوع ده فالقصة كدة متناسقة و منطقية و مفهومة


يمكن فيه ناس حيغيروا رأيهم فيا دلوقتى زى ما فيه ناس غيرت رأيها فيا قبل كدة كتير ... و ناس دمها يتحرق من اللى كتبته لأنه بيحرمها من وسيلة هجوم و تشفى و يمكن حاجات كتير .. بس الأكيد أنى غلطت فى المرتين و الأكيد انى لا أصلح للاستمرار فى الحو ده
Post a Comment