Thursday, October 14, 2010

كنز شباب التغيير في مدينة نصر

مجموعة شباب التغيير في مدينة نصر فكرة بقالها كتير مسيطرة عليا ونفسي تتنفذ , مدينة نصر ليها - في رأيي - وضع خاص و وجود مجموعة من الناشطين السياسيين والحقوقيين فيها أمر مهم جدا ولا مفر منه

يمكن الموضوع بدأ من 2005 من أول ما كان حزب الغد له مقر في مدينة نصر وكان ممكن يبقى نواة لشغل كتير جدا لو كان اتعمل كان حاجات كتير حتفرق دلوقتي ,, لكن تم اجهاض المشروع ده بإستيلاء مجموعة مخبرين موسى موسى على المقر وتحويله لمقر انتخابي لواحد من رجالة أمن الدولة كان أصلا جاى من حزب العمل عمل ربنا الاسلامي الاشتراكي اللطيف جدا

خلينا في أفكارنا دلوقتي

نبدأ بمميزات مدينة نصر:

أولا تنوع المستوى الاجتماعي وتقاربه في نفس الوقت

تنوع ظروف السكن فيها بشكل كبير بس كله في مدى متقارب ... يعني فيها فقرا وأغنيا جنب بعض لكن الفروق بينهم مش ضخمة و ممكن تلاقي الطبيب صاحب الملايين ساكن في نفس العمارة مع الموظف وصاحب الشركة اللي دخلهم متوسط

ثانيا كثافة عدد الشباب ودرجة تعليمهم
شباب مدينة نصر عددهم ضخم جدا ومعظمهم متعلم تعليم جامعي وده معناه أن درجة الوعي بينهم أو بلاش نقول درجة الوعى خليها القابلية للوعى عالية

ثالثا قلة الخوف من الأمن
شباب مدينة نصر معظمهم مسنودين بشكل أو بآخر واللي خاله مش ضابط شرطة فزميله في المدرسة أبوه مستشار .. وهكذا 
بالتالي خوفهم من الملاحقات والصدام مع الأمن مش حيبقى كبير والأمن نفسه بيبقى فاهم ده وبيعمل حسابه في التعامل معاهم , أنا شفت ده بنفسي في قضايا كتير عادية بيخاف الأمن فيها أنه يتورط في مشكلة مع حد مسنود

رابعا القدرة المادية والالكترونية للشباب
مدينة نصر معظم اللي فيها تقريبا من الطبقة المتوسطة ماديا وبالتالي الشباب فيها معظمهم قادر لو اقتنع بفكرة أنه يصرف عليها من جيبه وما يبقاش ده بالنسباله أمر صعب أو مرهق
يعني احنا في 2005 كنا بنشتري الأدوات على حسابنا واحنا لسة طلبة ومش بتبقى مشكلة

ده غير توفر العربيات عند معظم الناس وده بيسهل علينا الحركة والوصول لأماكن كتير بسهولة وتوفر النت والموبايلات ووسائل الاتصال الحديثة عند معظمهم

خامسا التجمعات السكانية والشبابية
نقطة تانية مهمة هي وجود عدد ضخم من الجوامع والمولات والعمارات السكنية و النوادي والمدارس والسايبرات والكافيهات ... يعني سهل جدا على النشطاء أنهم يلاقوا أماكن تجمع يوزعوا فيها ورقهم ويتواصلوا مع الناس وجها لوجه

سادسا مشاهير مدينة نصر
مدينة نصر ساكن فيها عدد ضخم من المشاهير والرموز من مختلف ألوان الطيف في المجتمع المصري بداية من المرشد السابق للأخوان لحد فنانين ولعيبة كورة وسياسيين كتير جدا ... ودي نقطة يمكن استغلالها بشكل كبير بس محتاجة شوية تخطيط

ده عن المميزات .. لكن تاني حاجة نتكلم فيها هي المشاكل اللي متوقع تواجهنا في الشغل في مدينة نصر

اختلاف الجو عن الجو المعتاد بتاع وسط البلد
مدينة نصر مش وسط البلد ومش حيمشي فيها الكلام عن رأسالمال المتوحش والكلام الفاضي ده .. وده بالنسبالي نقطة مشجعة - بصفتي رأسمالي متوحش يعني - لكن محتاجة طريقة جديدة في التواصل مع الناس

الناس في مدينة نصر من الطبقة المتوسطة اللي غالبا مش حتهتم بالكلام عن الفقر ... لكن مش معنى كدة انهم معندهمش مشاكل ,,, مشاكلنا اليومية في مدينة نصر مختلفة شوية ولو عاوزين ننجح لازم نشتغل على المشاكل دي ,,, بداية من مشكلة الزبالة لمشكلة الشوارع الضلمة لغيرها واللي يمكن تبان مشاكل صغيرة في نظر بعض الناس لكنها مقرفة لأصحابها اللي بيعانوا منها

كمان ارتفاع نسبة التعليم حيسهل علينا رفع مستوى المشاكل اللي حنناقشها وحنبقى بنناقش الديمقراطية وحقوق الانسان ودور المواطن في اختيار سياسات الدولة بشكل أكبر من  مناطق تانية كتير


المطلوب دلوقتي هو تجميع أكبر عدد ممكن من الشباب اللي ساكن في مدينة نصر أو قريب منها ومستعد للشغل على نشر فكرة الديمقراطية وحقوق الانسان بحيث نبدأ شغل في الفترة الجاية

اللينك ده لينك جروب المجموعة على الفيس بوك ..

الهدف منه بس التواصل مع الناس اللي موجودة على الفيس بوك ولكن الشغل الفعلي حيكون على أرض الواقع

ياريت كل واحد ساكن في مدينة نصر أو يعرف حد مهتم بالديمقراطية وساكن في مدينة نصر ينشر الفكرة ويدعو اللي يعرفهم للاشتراك في المجموعة
Post a Comment