Tuesday, October 19, 2010

للذكرى الحلوة

ماأفتكرش في عمري كله اجتهدت وانبسطت في مكان زي مجهود اليومين اللي فاتوا في الشغل في المعهد

يوم الحد كان عندي تدريب لمدة خمس ساعات في وحدة المدربين هيباتيا وبعد كدة قعدت 12 ساعة تقريبا بترجم الفيلم اللي قعد سلام\اسلام يلف بالأيام عشان يصوره مع ناس مختلفة ونجح يعمله في ميعاده , صحيح كان فيه غلطات , بس مفيش حد فينا محترف


اللي خلاني أخدت بالي هو اني قضيت أكتر من يوم ونص في مجهود متواصل مع اني مش بقدر أفضل صاحي مدة طويلة


عمري ماحسيت أن فيه مكان مكاني كدة ومنتمي له بالشكل ده قبل كدة

حتي في المذاكرة عمري ماذاكرت أوي لأني مكنتش بحس أن المستقبل بتاعي بجد

,حتي بيتي هو بيت أبويا وعمري ماحسيت انه بيتي وعارف اني قاعد فيه ضيف تقيل لأجل غير مسمي


يمكن المعهد مش اختراع ويمكن ناس كتير جربت الاحساس ده في شغلها أوأعمالها التطوعية


لكن بجد أنا سعيد جدا وفخور بأني واحد من الفريق ده
Post a Comment