Thursday, December 30, 2010

الحق في التفاهة

متضايق من حاجة مليش الحق اني أتضايق منها

أو بمعنى اصح مليش الحق اني أعلن اني متضايق منها

لأني لو قلت متضايق من كذا حيبقى معنى كلامي اني أناني

والحقيقة اني متمسك بحقي في اني أكون أناني

لكن حفاظا على صورة البطل اللي عايش لله وللوطن مش حقول اني متضايق

المشكلة في اني لو ماقلتش وعبرت عن نفسي ححس اني مخنوق ومش حر

ولو قلت مش حستفاد حاجة ,بالعكس يمكن اخسر احترام ناس شايفاني حاجة كبيرة

وبرغم ان سبب ضيقي هو اني بدأت أشوف نفسي حاجة كبيرة

إلا أن من القواعد الذهبية عشان تبقى كبير انك متهتمش بالحاجات الصغيرة

وبعد ما كتبت الجملة دي حسيت اني صغير عشان اهتميت بحاجة صغيرة

وبرده انا متمسك بحقي في اني أبقى صغير وقت ما أحب أبقى صغير

ومحدش يبقى له عليا سلطان يلومني لما أبقى صغير

وقراري النهائي اني مقولش انا متضايق من ايه , عشان مظهرش اني تافه

كفاية اني بيني وبين نفسي عرفت اني مش بالنقاء ده وان الحاجات العادية بتأثر فيا عادي جدا

لأ وكمان بهتم لرد فعل الناس لدرجة اني بقيت أفكر قبل ما أقول بفكر في إيه وبحس بإيه

وده في حد ذاته ضايقني اكتر بحيث اني مش محتاج اضايق نفسي بأني أعلن للناس اللي شايفاني كبير اني مش كبير ولا حاجة
Post a Comment