Saturday, January 1, 2011

كشف حساب 2010

2010 بدون مبالغة هي أجمل وأفيد سنة عدت في حياتي

فيها لقيت الحب الحقيقي اللي بتمني يستمر طول العمر

في 15 يناير 2010 اتحبست في نجع حمادي مع مجموعة شباب ناشطين ومدونين لما رحنا نعزي في الشباب الشهداء اللي اتقتلوا في مذبحة عيد الميلاد وعرفت هناك لأول مرة من قريب باسم سمير ووائل عباس ودماغ ماك ومصطفي النجار واسماعيل الاسكندراني وناصر عبدالحميد



في أبريل 2010 سافرت أحضر مؤتمر الحركة العالمية من أجل الديمقراطية في اندونيسيا واستلمت جايزة أفضل مقال عن الديمقراطية بالنيابة عن صديقي اسماعيل الاسكندراني وده طبعا بعد مشاركتي في اضراب 6 أبريل


 وبعدها سافرت جزيرة مالي وقضيت فيها أسبوع من أجمل مايكون مع أحمد سميح وصحابي من بيلاروسيا ،صحيح صرفت كل اللي كنت محوشه من أيام شغلي في الهندسة وفلست تقريبا بس عشت لمدة قصيرة في جو الثقافة البوذية الهادي اللي لقيته أرقي بمراحل من ثقافتنا اللي كلها ميكروفونات جوامع ودم في الأعياد وعصابة الحزب الوطني ونفاق المجتمع



 رجعت من بالي على دبي عشان كان عندي تدريب تبع المعهد الجمهوري الدولي والحقيقة اني سافرت دبي أكتر من مرة في 2010 في أكتر من تدريب

في مايو 2010 اشتغلت في المعهد المصري الديمقراطي واتعرفت علي مجموعة بنات وشباب من أفضل وانقي الناس الموجودين في مصر وبعتبر نفسي لقيت الشغل الصحيح اللي أقدر أبدع فيه وأستثمر فيه مواهبي في الكتابة والسياسة وإن كنت لسة بعاني من ضعف الإلتزام بالمواعيد وبالدقة في الشغل ، يمكن أظلم الناس لو قلت أسماء حد ونسيت حد لكن لما تشتغل مع حد بتكتشف فيه حاجات عمرك ماكنت حتكتشفها من بعيد، يمكن أكتر شخصية اكتشفتها في المعهد كانت أحمد غنيم، رغم اختلافي معاه في أفكار كتير لكن قد إيه هو شخص ذكي ومخلص وبيبذل مجهود وعمره مابيهتم بنسب أي حاجة بيعملها لنفسه ،عرفت كمان حسام من قريب وعرفت قد إيه هو حد منظم وأب رائع وقربت من اسراء وقد إيه طفلة من جوة عرفت هناك ندي عزيز وإسراء نوح وعلي زكريا ومندراوي وكل المجموعة التحفة دي



ده غير المجموعة بتاعة وحدة المدربين اللي اتعلمت فيها كتير جدا من ماجد واتعرفت فيها علي عبدالرحمن سمير وهو حد فعلا من أحسن الناس اللي في مجال السياسة

في يوليو 2010 كسبت بأعلي الأصوات عن الشباب في انتخابات الهيئة العليا لحزب الغد
وفي أغسطس 2010 ساهمت في رجوع د.أيمن نور رئيس للحزب وإن كنت بعد كدة وقتي انشغل عن الحزب وبحاول أوازن ودلوقتي بحاول أركز في إتحاد الشباب



برده من أحسن الحاجات اللي عملتها اني ساهمت في نشر قضية خالد سعيد في بدايتها وكنت أنا وعمرو عز ومحمود الصاوي أول ناس نزور السايبر اللي خالد اتقتل فيه عشان نتأكد من القصة وشاركنا في أول تعريف للناس في الشارع بالموضوع وكنت أول واحد طرح فكرة مظاهرة لاظوغلي واتقبض عليا فيها وخرجت بعدها سليم وكنت عاوز أعمل مجموعة لنشر الخبر وسط الناس برة النت بس فشلت



ومن أغرب الحاجات اللي حصلتلي في 2010 موضوع ظهوري أكتر من مرة في الإعلام سواء في صور في المظاهرات أوفي حوارات مع الجرايد والإعلام

اشتغلت في حملة أ.جميلة الانتخابية في دايرة قصر النيل وكنت مسئول العمل الميداني على مستوى القاهرة والجيزة والقليوبية وحلوان في مشروع يوشاهد لمراقبة الانتخابات



حاولت تجميع رابطة التغيير في مدينة نصر بس لسة معملناش حاجة

وفي 27 ديسمبر 2010 نشرت أول كتاب ليا بعنوان "خواطر نبي مصري معاصر" وعملت له حفل توقيع جميلة جدا حضرها د.ايمن نور واتباع فيها 62 نسخة من الكتاب



وفي آخر يوم في 2010 كسبت جايزة أحسن مقال علي موقع شباب الشرق الأوسط في 2010 بمقال عنوانها "في رفض قدسية النصوص المقدسة"

باي باي يا 2010 ويارب كل أيامي تبقي 2010

********************

كتبت هذا الكشف بساعات قبل جريمة تفجير كنيسة القديسين بالاسكندرية ومكنتش متخيل ان 2010 تنتهي بالشكل المؤلم والمخزي ده 
Post a Comment