حتسموها الثورة حتسموها النزهة حتسموها الطريق إلى إيلات ... المهم كلنا في الشارع يوم 25 يناير عشان نشيل نظام مبارك
العامل اللي بات في الشارع 50 يوم عشان ياخد في الآخر علاوة 50 جنيه واتضرب في الشارع وفي الآخر الأسعار اترفعت
المحامي اللي اتحبس واتبهدل عشان معجبوش القاضي يكلمه بشكل مش لطيف ورد عليه فحبسه
أصبر وأحتسب
الطبيب اللي بيطلع عينه 7 سنين ويتبهدل ويروح وييجي عشان 200 جنيه في الشهر وفي الآخر أى ضابط شرطة بيتعامل أحسن منه مليون مرة وهو أجهل منه مليون مرة
المدرس اللي بيتهان من الطلاب وفي الإعلام ومن الوزارة وفي الآخر يتقال عليه حوت دروس خصوصية
الضابط اللي رفض يشتم الناس ويلفق لهم لتهم فلقى نفسه منقول في مكان بعيد كعقاب ليه على نزاهته
الطالب اللي شايف أخوه الكبير خد مؤهل عالي بعد عذاب وفي الآخر قعد على القهوة عاطل ومعندوش مستقبل وخايف يحصله
خريج الجامعة اللي بقاله سنين شغال في وظايف أى كلام بمرتبات زفت وكل اللي بيحلم بيه أنه يهج من البلد ولو يموت في البحر من غير دية
أهالي ضحايا العبارة والدويقة وحوادث وحرايق القطورات .. أهالي الناس اللي جالهم أمراض خبيثة بعد ما الدم اللي كانوا بيتعالجوا بيه طلع ملوث وملاقوش حد اتحاسب على اللي حصل لهم
كل أب وكل أم بيخاف على ولاده من الأذى وبيموت نفسه عشانهم وبيحاول يحميهم ويمشي جنب الحيط عشان خاطرهم وفي الآخر يلاقيهم انحرفوا أو تطرفوا أو بقوا عاطلين ومذلولين لأن الفساد كوش على كل حاجة في مصر
كل ضابط جيش شايف حال مصر وخراب جبهتها الداخلية وعارف المعنى الحتمي لده في حالة وجود أى حرب أو نزاع بيننا وبين أى دولة تانية
كل مسيحي أو بهائي أتظلم واتهان واتبهدل واتقتل وفي الآخر لقى الدولة بتحمي اللي عمل كدة بدل ما تعاقبه
كل مصرية وكل مصري اتهانوا واتذلوا في قسم من الأقسام أو كمين من الكماين ومقدروش ياخدوا أى حق من حقوقهم
كل رجل أعمال شريف اضطر أنه يدفع رشاوي ويبقى فاسد عشان يخلص أموره غصب عنه
كل سياسي الناس حبته وحبت تنتخبه والحكومة زورت اللإنتخابات ضده وكل دبلوماسي بيحزنه ضياع أى دور أو تأثير لمصر
كل سيناوي ونوبي اتهان واتبهدل لمجرد أنه من سينا أو النوبة .. كل مواطن اتهان برة مصر وملقاش سفارة مصرية تدافع عنه
كل دول وغيرهم كتييير أوي نسيتهم ... كلنا لازم نقف وقفة واحدة ننهي بيها كابوس مبارك وعيلة مبارك وحزب مبارك وكذب مبارك وفساد مبارك وتعذيب مبارك وخراب مبارك
كلنا لازم ننزل الشارع يوم 25 يناير يوم عيد الشرطة عشان مبارك يحصل أخوه زين الهاربين بن علي ونبدأ نبني بلدنا من أول وجديد
No comments:
Post a Comment