Monday, January 17, 2011

المواقف القلة في الثورة المصرية الفلة

قاعد لا بيا ولا عليا فرحان باللي حصل في تونس وحاسس ان خلاص مبارك فاضل له زلطة ويطلع برة خصوصا بعد الكلام العبيط اللي طلع من رشيد محمد رشيد* ومن القذافي**

قوم إيييه الصفحة بتاعة خالد سعيد الأدمن بتاعها سخن وقال يوم 25 يناير يبقى يوم الثورة ***ضد مبارك

اشمعنى 25 يناير يا ولاد ؟؟ لأنه عيد الشرطة و اللي حركة 6 أبريل احتفلت بيه السنة اللي فاتت بوقفة فيها ييجي 50 ناشط مرة واحدة كنت واحد منهم

طيب ما الراجل أدمن خالد سعيد كان بعقله وكان بتاع وقفات على الكورنيش وبتاع .... إيه اللي خلاه يقرر فجأة يقول ثورة ومثوراشي؟؟

قبلها كان فيه نكتة ان بن علي قبل ما يخلع من تونس طلب من مبارك يبعت له امدادات من 6 ابريل وحملة البرادعي والغد وكفاية عشان يبوظوا الانتفاضة ..... و6 ابريل ردوا على النكتة - بكلام أسماء محفوظ - وحملوا مسئولية اخماد مشاعر الناس وتحييدها للراجل بتاع صفحة خالد سعيد وأنه بيدي أوامر للناس أنهم مايدخلوش في خناقة مع الشرطة بدل ما بسخنهم

المهم ان الراجل فجأة قال يوم  25 يناير يوم الثورة ضد الظلم والفساد وكل حاجة

طبعا كالعادة الناس القديمة - وانا واحد منهم - اللي صوابعها متاكلة من كتر دوس زرار الماوس بالموافقة على الايفنتات والجروبات والصفحات توقعوا ان الموضوع فكسان زى كل مرة وقعدوا يتريقوا على موضوع الثورة اللي متحدد لها ميعاد دي

الجديد أن الايفنت بتاع الثورة ده بقى فيه ألف واحد جديد كل ساعة بيقولوا أنهم حيبقوا موجودين فيه

هنا موقفي اتغير لأن مادام الموضوع سمع بالشكل ده في الوقت ده فإحتمال كبير تبقى هي دي الضربة القاضية لنظام مبارك واللي أفهمه أن الضربة دي كلنا محتاجينها ومش لازم تبقى يوم 6 أبريل عشان تتعمل وتبقى لطيفة

وإذ فجأتن ألاقي ايفنت معمول بإسم الدكتور البرادعي ... مش لاسمح الله بيقول أنه حيشارك يوم 25 ولا لا قدر الله حتى بيشجعهم على نزول الشارع .. لأ ده إيفنت ناس عاملاه لدعوة الشباب أنهم ****يدعوا ويترجوا ويبوسوا إيد الدكتور البرادعي للمشاركة يوم 25 !!!!!!

حاجة كدة فكرتني بجروب يلا نلم 3 مليار مسلم عشان يدعوا ربنا يقفل الفيس بوك

حاجة مستفزة وفكسانة آخر حاجة

بعدها بدأت قصة عجيبة عند 6 أبريل ... كذا حد ألاقيه كاتب ستيتس أن ده مش آخر خطوة وأن بلاش الناس تتحمس وبلاش الناس تسخن وناقص يقولوا بلاش الناس تشارك !!!

مش عارف ليه مش بالع الكلام ده نهائي خصوصا من 6 ابريل

يمكن لأني عارف ان لو كانت الدعوة جاية من 6 أبريل أو خاصة بيوم 6 أبريل 2011 كنت لقيت الكلام المكرر المحفوظ بتاع شييييييييييييير و عاااااااااااااااجل والحقوووووووووو بيتبعت من كل الجروبات والصفحات واللايكات لو أمكن ؟

يمكن لأن فكرة ان المشكلة في اسم الحدث ثورة ولا تفاحة ولا موزة ملهاش اى معنى .. سموها اى حاجة يا سيدي بس تتعمل وتنزل الناس الشارع؟

ويمكن لأن موضوع الخوف على إحباط الناس شئ جديد مشوفناهوش قبل كدة في ايفنتات أصغر وأسخف من كدة بكتير وعدد المشاركين فيها مزادش عن عشرات ومع ذلك ولأن الداعي ليها 6 أبريل محدش اتكلم ساعتها عن احباط الناس!!!!

كنت عاوز كمان أحكي على الصورة العبقرية بتاعة (شباب التغيير يوم 25 يناير حيسلم الحكم مؤقتا للبرادعي !!) بس لقيتهم شالوها او عملوا لي بلوك بعد كام تعليق بيعبر عن اعجابي بعبقريتهم

هو فيه ايه ؟؟؟

اللي أفهمه أن النظام مرعوب ومهزوز ومتوتر .. وان دي لحظة ممكن لو ضاعت ما تتعوضش ولازم نستغلها لإحداث أكبر قدر من الخساير للنظام

اللي أفهمه أن ده تاني حدث يبقى محدد له ميعاد ويبقى فيه الكم الضخم ده من الناس المتحمسة والحدث الأول كان 6 أبريل 2008 ... وانا مش بعتبر جروب البرادعي حدث رغم ضخامة عدد أعضائها لأنها مكانتش مرتبط بميعاد محدد

الناس اللي بتقول ان ماينفعش الثورة يبقى ليها ميعاد محدد .. طيب يا عم سميها أى اسم وقفة - اعتصام - اضراب موزة بطيخة ... المهم تقول للناس تنزل الشارع ... والأهم تقول لهم انزلوا الشارع وانتو عاوزين توقعوا نظام مبارك مش تقول لهم انزلوا بس خلي بالكم دي اشتغالة ومش آخر مرة ومحدش يصدق

اللي بيقول ان الثورة ماينفعش يتحدد معادها يقول لي طب ليه بيشارك في أى وقفة ولا مظاهرة ميعادها متحدد ؟؟ ويقول لي هو من أمتى الأمن لو فيه حاجة منظمة وكبيرة مش حيعرف ميعادها؟؟

الخلاصة ... انزلوا الشارع يوم 25 يناير ... تظاهروا ضد النظام ....لازم نبقى ألوفات في كل محافظة ... لازم نبقى مصممين على الاستمرار لحد رحيل مبارك ... اللي عاوز يتصور ماينزلش ويستنى وقفة لطيفة ظريفة على سلالم نقابة الصحفيين ولا مظاهرة فيها 50 واحد قصاد النائب العام

انا نازل
http://www.facebook.com/note.php?note_id=491585308033
انت جاى ولا لأ؟


==========================================

*http://www.egynews.net/wps/portal/news?params=113670
**http://www.youtube.com/watch?v=lmXhLuX2h4o
***http://www.facebook.com/event.php?eid=115372325200575
****http://www.facebook.com/event.php?eid=118944451511165

Post a Comment