Friday, January 21, 2011

خاف يا مبارك

آلاف المصريين غير المنضمين لأي كيانات سياسية ولا مشتركين علي الفيسبوك ونازلين يوم 25 يناير لأول مرة مع بعض ,بعد ما كل مجموعة ماكانت بتنزل تطالب بحقوقها لوحدها

آلاف المصريين كانوا بيباتوا بالأسابيع عند مجلس الشعب يترجوا الرئيس يحل مشاكلهم البسيطة وكان رد الرئيس عليهم بالتجاهل ورد الأمن بالإهانة وبالطرد من قدام مجلس الشعب . الناس دي حتنزل يوم 25 يناير لأنهم مضطرين لده ومعندهمش حاجة يخسروها

مئات المصريين حياتهم خربت ومفيش قصادهم غير الإنتحار . مش حينتحروا لكن حينزلوا يوم 25 يناير بدون خوف من الأمن

دول لازم تخاف منهم يا مبارك . دول مش حتعرف تتفاهم معاهم ولو الموضوع كبر مش حيسيبوك , والموضوع حيكبر حتي لو حاول الناشطين يوقفوه

النشطا معظمهم نازل يعمل يوم ناجح وبس وبيقيسوا أكبر طموحاتهم علي وقفة فيها تلات أربع تلاف ناشط محدش سمع عنها غيرهم وقليل منهم إللي تابع أحداث المحلة 2008 لأننا بننسي , لكن الناس إللي نازلين لأول مرة واتأثروا بثورة تونس مش نازلين يعملوا يوم ناجح ويرجعوا علي بيوتهم ومحدش له سيطرة عليهم

لو 25 يناير مش حيبقي أول يوم في الطوفان اللي يدوس مبارك ف 6 أبريل جاي وبعده انتخابات الرئاسة ومبارك مش حيكمل بعد 2011

Post a Comment