Sunday, January 23, 2011

ياإللي مرحش تعبكوا بلاش سيبوا الناس ماتمشوهاش

من أكتر الحاجات إللي مابقدرش أفهمها هي طريقة تفكير المعارضين المصريين إللي بيروجوا لفكرة إن مفيش فايدة من محاولة إسقاط مبارك في المظاهرات إللي حتبدأ من يوم 25 يناير وإننا لازم نحبط الناس من دلوقتي عشان مايحبطوش بعد كدة

أنا أفهم إن اليأس ممكن يخلي ناس متشاركش أوترفض الموضوع كله علي بعضه لكن المشاركة مع إحباط الناس وتخفيض سقف توقعاتهم جريمة

ياسادة يوم 25 يناير مش مظاهرة وخلاص حنطالب بيها بشوية مطالب عشان نبني عليها في المستقبل

إحنا عدينا المرحلة دي من مدة, وإحنا دول اللي هما الشعب المصري

وأنا مش بتكلم عن "أحلامي" لأ أنا بتكلم عن واقع بيقول أن الناس خلاص بقالها سنين بتطالب مطالب فئوية وبقي عندهم نضج كافي - حتي لو إحنا كسياسيين معارضين مش مصدقين ده ولا فاهمينه لأننا بعيد عنهم - أنهم يرفعوا سقف مطالبهم ويعرفوا أن مفيش أي فرصة للإصلاح عند النظام

إحنا بقالنا سنين بنطالب بسقوط مبارك - إحنا بقي دي مقصود بيها السياسيين المعارضين - ومحدش استجاب لنا لأن الناس كانت بتحاول تديله فرص للإصلاح لأن طبيعة الناس مع الاستقرار والخوف من المجهول , لكن المرة دي محدش حيديله فرصة لأنه ضيع كل فرصه ومش معقولة أبدا أننا نطالب بسقوط مبارك وإحنا معندناش أي وجود مع الناس ولما الناس تتحرك فعلا عشان تسقط مبارك نيجي ننومهم ونضيع حماسهم بحجة أنهم لسة صغيرين أو إننا أوصياء عليهم بنحدد لهم إمتي يثوروا ونشترط عليهم شكل الثورة اللي يتماشي مع نظرياتنا

أنا فاهم إن بعض الناس بتوع المعارضة خايفين من إحباط الناس لو عدت مظاهرات 25 يناير ومابعدها وفضل مبارك في السلطة . لكن بفرض أن مبارك حيستمر في السلطة لحد انتخابات الرئاسة ,ياتري كام واحد ممكن تخفيض سقف المطالب عن مطلب إسقاط مبارك يحبطه من البداية ويكون حجة له بعدم النزول وكام واحد لو نزل يوم 25 والأيام اللي بعدها ومبارك ماوقعش حيزهق ومش حينزل تاني في أبريل إللي بعده ?

الحقيقة أن الناس المرة دي حتنزل تطالب بإسقاط مبارك مش لأنها عاوزة تاخد مكانه أو عاوزة تطبق أجندة سياسية معينة لكن نازلين لأن مفيش قصادهم غير كدة أو يولعوا في نفسهم

أرجوكم أرجوكم سيبوا الناس ماتحبطوهاش , سيبوهم يحاولوا ويجربوا وينجحوا أو يفشلوا بنفسهم من غير وصاية منكم

اطمنوا , تعبكم والتمن اللي دفعتوه السنين إللي فاتت مضاعش بلاش فسيبوا الناس ماتمشوهاش

Post a Comment