Thursday, May 19, 2011

حنشوف

ثري القرية خلف ولد
القرية حسدته وقالوا محظوظ ومش محروم من حاجة

الحكيم قال حنشوف

الولد مامته ماتت وهو صغير
القرية صعب عليها الولد وقالت مسكين اتحرم من أهم حاجة ممكن يتحرم منه طفل صغير

الحكيم قال حنشوف

كبر الولد وبقي أحسن فارس يركب حصان
قالت القرية طبعا مين قده فارس قد الدنيا

الحكيم قال حنشوف

وقع الولد من فوق الحصان ، رجله اتكسرت وبقي بيعرج واكتأب وانعزل في بيته
القرية زعلت عليه وقالت خسارة شبابه وفروسيته ضاعوا

الحكيم قال حنشوف

قامت الحرب . شباب القرية اتجندوا ومات عدد كبير منهم لكن الولد ماراحش الجيش وأشتغل وأتجوز وبقي أغني من أبوه
حقد عليه أهل القرية وقالوا ولادنا ماتوا في الحرب وهو بيستمتع بحياته

الحكيم قال حنشوف

مراته إللي بيحبها ماتت وهي بتولد . زعل عليها وكان حيموت نفسه
القرية صعب عليها وافتكرت حادثة رجله وحرمانه من الفروسية

الحكيم قال حنشوف

برغم حزنه علي مراته ماموتش نفسه لأنها لما ماتت خلفت بنت خاف يسيبها لوحدها
القرية قالت بنته زي القمر . يابخته بيها

الحكيم قال حنشوف

ومن وقتها القرية بقت مدينة والبنت بقت ليدي جميلة حكمت المدينة لسنين ولسة الحكيم بيراقب كل حاجة بعينه القزاز المظلمة ولسة كل ماتحصل حاجة يتكلم عنها الناس يقول بحكمته "حنشوف"

==========
أحمد بدوي
اقتباسا من فلم "حرب تشارلي ولسون" بتصرف
Post a Comment