Thursday, December 11, 2008

شئ صعب

شئ صعب اوى انك تتعود تحط حواجز بينك و بين كل الناس مهما قربوا ليك و عمرك ما بتخلى حد يقدر يكسر الحواجز دى و يوصل لك عشان تقدر تعيش فى أمان و يبقى عندك احتياطى أن مهما اتجرحت من أى حد ففيه حماية تحميك

فيقوم انسان وحيد هو اللى يقدر يعدى كل الحواجز دى بمنتهى السهولة و يوصل لحد العصب .. يوصل لجوة قوى لحد ما يبقى المراية اللى بتشوف فيها نفسك ... تحس انه هو نفسك نفسها

و فجأة كدة تلاقى نفسك مهدد بأنه يسيبك و يمشى تانى كأنه ماجاش من الأول و كأنه مكانش أول و آخر حد يعدى الحاجز و يبقى حتة منك

ألم فظيع , من جوة سنتر القلب على طول ( ألم كنت بتتجنبه مع كل الناس و معرفتش تتجنبه معاه ) ,, مفيش تخيل للحياة من غيره ,, طعم الوحدة بين الناس حيبقى أصعب من الأول ,, ما تتخيلش الوجع بيزيد كل لحظة قد ايه لمجرد فكرة انك تبقى عاوز تتكلم مع حد فاهمك زى نفسك و ماتلاقيهوش جنبك بعد ما تكون حسيت الاحساس ده فعلا

عمر الحياة من غيره ما حترجع تانى زى قبل ما يدخل حياتك و تدخل حياته ,, رؤيتك لنفسك و لمصيرك اتغيرت بسببه ,, ازاى ممكن تكمل الحياة من جوة الحاجز تانى ؟

يمكن زى ما قال ؟ هو دوره انه يحطك على اول الطريق و يسيبك تكمل مشوارك لوحدك ؟ معقول مصيرك عذاب اوى كدة ؟

كل يوم بتفقد أصحاب قدام و تكسب أصحاب جداد .. و الحاجة الوحيدة اللى بتحميك من وجع الفراق و الشعور بأنك خذلتهم هو الحاجز اللى بينك و بينهم .... طيب ليه هو جه كسر الحاجز ده ؟ ليه بقى أقرب من اللزوم ؟ ليه محتاج له قوى كدة ؟

ليه ندمان لأنك عرفته و ندمان على كل لحظة بعدتها عنه فى عمرك حتى لو لسة معشتهاش ؟

ليه يا رب ؟
Post a Comment