بتحلم تصلي؟
ما عندك البيت
ولا ركن في الغيط
إنت يا إبني عبيط؟
مصر بقت مش ليك
ولا هي تلاكيك؟
تقول انا مصري
وبتاع
شوفلك وطن يرضى بيك
ما الوطن إتباع
ويمكن متلاقيش
كفن يغطيك
بتحلم تصلي؟
محتاج ترخيص
من جناب الرئيس
وتمحيص
من الكهربا
والمساحة
وتفحيص
من الأوقاف
والسياحة
وحبة تنطيط
وعجين الفلاحة
ومتنساش تظبيط
ام هاشم الدلالة
وحودة صاحب البقالة
وحمادة الفاشل
وشلة البطالة
لازمن يوافقوا الصراحة
وادينا سنتين راحة
عمار يا مصر
يا بلد السماحة
بتحلم تصلي؟
ع المقدسة
الله ينيح نفسها
كانت كويسة
ماتت زي مصر
مفلسة
كانت بتحلم بكنيسة
جنب الدار
تروحها متسندة
ع الجدار
مشتاقة يا ولدي
وبعيد المشوار
هنوصل الكنيسة إمتى
ما فات النهار
وماتت
لما مات الحلم
من طول الإنتظار
بتحلم تصلي آمن؟
وتكون مأمن
ع الست والولاد؟
طب إزاي
والشر كامن
في قلوب البعاد
حى على الجهاد
هينصلح حال البلاد
هدم الكنايس
على روس العباد
بتحلم تصلي؟
وجرس ومنارة
وكنيسة في حضن الحارة
ريحة بخور
وورد حوالين سور
وصورة لأم النور
يا عم إحلم على قدك
الله يرحم جدك
كان بيصلي في مغارة
وتقوللى قبة ومنارة
================
يا جماعة الغرض من نشر القصيدة دى هنا هو توضيح وقوفى التام مع حرية أى صاحب دين أو فكر فى أنه يمارس شعائر دينه أو ابداعاته الفكرية من غير تدخل حد تانى
و برده - نظرا لسوء الفهم اللى حصل فى التعليقات - لازم أوضح أن تعاطفى مع حق المصريين - بغض النظر عن معتقداتهم - فى اقامة دور العبادة الخاصة بيهم دليل فى حد ذاته أن التعصب الدينى مش مرتبط بديانة معينة و ده لأن أنا مسلم و معنديش أى حساسية فى أن أى حد غير مسلم يعيش بأمان و سلام و حرية
و زى ما فيه مسلمين متعصبين فيه مسيحيين و يهود و شيعة و بوذيين و هندوس و ملحدين متعصبين
و انا رافض التصنيف العنصرى بأن أصحاب ديانة معينة مصابين بمرض التعصب
التعصب مرتبط أصلا بالجهل و البطالة و البيئة الثقافية المنغلقة
و انا مش مصدق انى لازم اعيد تانى كل الكلام اللى بيتقال ليل و نهار على أن المسلمين و المسيحيين و اليهود عاشوا فترات طويلة من غير تعصب ولا حزازات دينية ...... لكن المشكلة فى واقعنا الحالى اللى غلب عليه الرؤية السلفية الأحادية المتعصبة لازم احنا اللى نحلها بالحوار و التسامح مش بالغضب و الشتايم لبعض
بقلم ياسر يوسف غبريال
منقولة من تعليقات الوعى المصرى
http://misrdigital.blogspirit.com/archive/2008/11/25/مهزلة-أحداث-كنيسة-عين-شمس.html#comments
No comments:
Post a Comment