Sunday, December 14, 2008

أطعم الفم تحتقرك العين




بص ياباشا .. أنا مش ناوى ان أى حد ولا أبويا حتى يعاملنى بطريقة اطعم الفم تستحى العين

أنا بقى مش بستحى

عشان كدة اللى حاسس أنه بيعمل لى خدمة أو ماسك عليا زلة لازم يعرف كويس انى مش بيهمنى ولا فضايح ولا مكاسب ولا حتى عشرة

يمكن الحاجة الوحيدة اللى بتأثر عليا هو انى مش بحب ازعل حد و مش بحب اجرح حد مهما عمل فيا مادمت قادر على الغفران و التسامح فيبقى قشطة مش مهم أى حاجة تانية

بس الحق حق ... و انا عمرى ما بحب أبقى ضلالى و طول عمرى بحب امشى مع الحق اللى مؤمن بيه حتى لو اعتذرت ألف مرة ...... و لو انت شايف الحق اللى انا شايفه من وجهة نظر تانية ده مفيهوش مشكلة

اى حد عامل فيها مظهر تحررى و هو من جواه ديكتاتور ... اى حد عامل فيها مظهر متسامح و هو من جواه حقود ... أى حد عامل فيها مثقف و هو حافظ له كلمتين .. اى حد عامل بتاع ربنا وهو بتاع نفسه

أى حد من دول يبعد عنى احسن و ما يحاولش يستغل طيبتى عشان وقت الجد لما بقلب بقلب و مش بيهمنى عشرة ولا معروف ولا احراج

انا ساعات كتير بسكت عن حاجات غلط بس ده مش لأنى عينى مكسورة لكن لأنى بختار انهو غلط اللى اركز عليه و افضحه و انهو غلط اللى بحسه بيأذى ناس كتير و انهو غلط أعمل نفسى مش شايفه عشان اللى عمله ما يستاهلش أنى أضيع وقتى معاه

و عشان كدة بتلاقينى بتكلم عن مصايب الشيوخ كتير لأنى بحس أن تأثيرهم واسع و مسئوليتهم عن اللى بيضخوه فى دماغ الناس أكبر من اى حد تانى خصوصا و ان الناس متخدرة و معندهاش القدرة على الانتقاد ولا الفرز

بشوف غلطات كتير و تخاريف كتير عند ناس تانية كتير ... ليبراليين و يساريين و مرتزقة بيجروا على رزق عيالهم و مصالحهم و بسكت بس لأنى عارف أن تأثيرهم فى الآخر محدود و أن محاربة واحد ملوش دور ولا تأثير تضييع وقت و مجهود

عشان كدة بتلاقينى وقت الخناقات بين زمايلى السياسيين مش بحب أضيع وقتى و أتحيز لجهة ضد جهة و اخسر حد ممكن بعد كدة يبقى له دور كويس و بفضل أبقى فى دور الحكم او المتفرج و أتسامى عن الخلافات الشخصية

نصيحة بسيطة لكل واحد مرتزق ليبرالية أو حتى لو هو مقتنع انه ليبرالى بجد أو بياع سياسة و بيطلع غسيله الوسخ قدامى و معتمد على انى حقف فى صفه عشان خايف منه أو خايف على سمعة الليبراليين لا سمح الله أنه يتجنبنى نهائى و يبعد عنى و يعيد حساباته و يدور على حد تانى يشغله طرطور

حتى أنا مش بقيسها بمنطق البطولة ... أنا عارف كويس أن لما أكشف واحد مرتزق و أقف قصاده ده بيزود مصداقيتى عند الناس و برغم ان انا مش بلعب سياسة و مش ناوى أوسخ ايدى بيها فى يوم من الأيام لكن مصداقيتى مهمة اوى عندى

و على فكرة بقى ماحدش يعتقد انه عارف انا بفكر ازاى لأن انا اساسا كل يوم بفكر بطريقة جديدة و مش مستبعد خالص فى يوم من الأيام أنى أغير كل أفكارى و كل اللى بنادى بيه لو شفت أنه بيودى على سكة غلط ... يعنى انا ممكن فى يوم تلاقينى اقتنعت بشوية أفكار اشتراكية أو عملت زى وليد كريم اللى لولا انه ضيع مجهود ناس غيره كنت اعتبرته بطل 2008 عشان قدر يعلن تغيير افكاره من غير ما يهمه حد

فبلاش حد يحط نفسه فى مواقف بايخـــــــــــة و كل واحد على راسه بطحة حيبقى عارف انا بتكلم عن ايه

Post a Comment