أسئلة من باب الفهم مش أكتر
يا ريت ماحدش يجاوب بخطب عصماء عشان دماغى مصدعة
اللى عنده اجابات منطقية يتفضل يجاوب و اللى عنده شعارات يتفضل يعلقها على الحيطة قصاد بيته
أ - ليه الشيخ حسن نصرالله ما أعلنش الهجوم على اسرائيل دلوقتى او فى المدى المنظور تخفيفا عن الفلطسينيين ؟
ده مش سؤال بلاغى على فكرة .. ده سؤال بجد
( لما كان الجيش الأمريكى رايح يحتل العراق كان عندى أمل أن فى اللحظة الأخيرة ايران حتعلن الحرب على أمريكا و تضرب حاملات الطائرات بتاعتها فجأة و تضطر امريكا للانسحاب .. بس طلع لإيران رؤية واقعية اكتر و طلعوا ناس بيعرفوا يدوروا على مصالحهم كويس )
-- ده طبعا مع الاعتراف أنى مش معلق أى أمل على النظام المصرى لأن الضرب فى الميت حرام --
الصورة دى انا اللى عملتها لما كنت بتعلم جرافيك
ب - هل لو احنا فى دولة ديمقراطية و فيها تبادل السلطة و الأخ النائب الناصرى رئيس حزب الكرامة حمدين صباحى أو السيد المناضل العظيم مجدى حسين وصلوا للسلطة عن طريق الانتخابات كانوا حيعلنوا الحرب على اسرائيل ولا هو كلام من أبو بلاش بيجيب سوكسيه و شعبية و ملوش تمن سياسى ؟
جـ - ليه الموضوع بقى اسمه قضية غزة بدل قضية فلسطين ؟
د - ايه هى اولويات أى نظام ديمقراطى ؟ هل هو الحفاظ على أرواح المواطنين المنتمين اليه و ممتلكاتهم و لا القتال حتى آخر جندى ؟
صورة المقاومة فى الحاضر
هـ - ايه هى خطط حماس و رؤيتها الاستراتيجية للصراع الفلسطينى الاسرائيلى فى المستقبل ؟
هل هو تدمير اسرائيل ( الدولة بنت الكلب اللى اخترقت كل المواثيق و العهود الدولية مليون مرة ) ولا هل هو الحرب ( او الصمود ) الى مالانهاية ؟؟
طيب هل الصمود و التحدى ( و ده شئ مشرف جدا و جميل و ممكن يكون عامل ردع ) قادر على أنه يهزم اسرائيل ولا محتاجين معاه خطط و استراتيجيات زى ما عمل حزب الله و زى ما عملت مصر فى 1973 و زى ما عملت أمريكا مع الاتحاد السوفيتى ؟
السؤال ده بمناسبة خطبة عصماء عرجاء خطبها الأخ خالد مشعل لمدة ساعة آخر مرة انضربت فيها غزة و سمعته بفارغ الصبر و ما قالش فيها ولا كلمة مفيدة
صورة المقاومة فى الماضى
و - ليه سوريا ما ضربتش رصاصة واحدة فى الجولان طول مدة الاحتلال اللى مش فاكر من امتى ؟
طيب ليه ماحدش اتهم النظام السورى بأنه عميل لاسرائيل ؟
ز - هل فوجئ الأخوة فى حماس بأن النظام المصرى عميل و ابن ديل كلب و أنه متواطئ فى الحصار ( ده جزء من المعطيات الموجودة ) و فوجئوا أنهم لما يعلنوا وقف التهدئة حيبقى فيه رد فعل متغابى ؟
ما أظنش فوجئوا ...... طيب ليه ما لجئوش لأعادة الانتخاب أو لتمديد المهلة أو لأى "تنازل" عشان يحموا شعب غزة من المذبحة ؟
ليه حتى ما عملوش فصل بين المواقع المدنية و العسكرية جوة القطاع ؟
قوات حماس
حـ - كام قتيل و جريح فلسطينى حنلاقيهم لو اسرائيل استخدمت اسلحة أكبر من كدة ؟ .. النابالم مثلا ؟
ط - مين مواقق على دخول مصر مواجهة عسكرية ضد اسرائيل دلوقتى ؟
No comments:
Post a Comment