ليه الناس بتحبنى ؟؟
قابلت محمد الطاهر و قال ان كل الناس مهما كانوا مختلفين معايا بيحبونى
انا عارف ده و بحسه كتير
بس ليه بقى بيحبونى ؟؟
انا أعرف ان اللى ربنا يحبه يحبب فيه خلقه ... طيب هو ربنا بيحبنى ؟؟ ... امال انا ليه مبقتش بحس بيه زى الاول ؟؟ ... ليه بقت علاقتى بيه روتينية من غير احساس و مشاعر زى زمان ؟؟
طيب ازاى ممكن تحب واحد مختلف معاه ؟؟ اذا كنت انا نفسى بتخنق من ناس كتير و بقطع علاقتى بناس كتير لمجرد ان رأيهم مش عاجبنى ؟؟
لكن لأ .. مش مرتبطة اوى .. ما انا فيه ناس ببقى مختلف مع آرائهم و بتفضل علاقتى بيهم طبيعية
من زمان عديت مرحلة الغرور و بقيت فاهم ان الدنيا مش بيحكمها المنطق
ممكن اوى اللى احبه من قلبى ما يشوفنيش و اللى يحبنى من قلبه ما احسش بحبه .. ممكن اوى حد يبان قريب قوى و هو على شعرة نسمة هوا تطيرها
==========
عاوز اخد اجازة من الفيس بوك ... عندى مشاريع عاوز ابدأ فيها
عاوز أعيش حياة اجتماعية حلوة
عاوز أحب زى خلق الله
عاوز اقرا 17456 كتاب
عاوز اكتب مليون فكرة و ملحوظة و موضوع
عاوز أشتغل سياسة و اكسر الدنيا
عاوز أذاكر فى الكهربا عشان أقدر أترقى فى شغلى بعد كدة
عاوز انام ....... تصدق فعلا عاوز أنام ؟
ممكن اخلى الفيس بوك يوم آه و يوم لأ .. الموضوع كله محتاج ارادة
==========
النهاردة برده فهمت ليه فيه ناس بيفكروا و بيفهموا و بيدافعوا عن تدخل الدولة فى الحياة الخاصة للأفراد
أو بمعنى أصح تدخل اى قوة خارجية خارجة عن ارادة الانسان فى تحديد مسار حياته الخاصة
لأنهم مش قادرين يسيطروا على نفسهم ,,, اللى بيدخن و عارف أنه مش حيبطل تدخين غير لو حد أجبره على كدة
و اللى مدمن مواقع جنسية و عارف أنه مش حيبطل يدخل عليها غير لو الحكومة منعتها
اللى بيعمل علاقات و شايفها حرام و مش عارف يمسك نفسه من غير ما حد يمنعه
هما دول اللى بيدافعوا عن السلطة الأبوية و أن حد يقول لهم يعيشوا ازاى
هما دول اللى مش قادرين يفطموا نفسهم من حاجات بيعملوها و عارفين انها غلط و فاكرين ان الحل أن حد يفكر بدالهم و يقرر لهم يعملوا الصح و يسيبوا الغلط
المشكلة انى غالبا بقدر أمنع نفسى من عمل أغلب الحاجات الغلط ( او اللى مقتنع انها غلط ) و الباقى اللى مش بقدر أبطله بعرف أهرب منه فترات و أرجع له فترات و عشان كدة مقتنع أن ارادة الانسان الجوانية هى السبيل الوحيد لمنعه من الانحراف
ولا تقول لى قوانين ولا تقول لى هيئة ضرب بالمعروف و قتل بالمنكر ...... من غير ما الانسان يبقى من جواه عاوز حياته تتصلح مش حيتصلح
احنا محتاجين نتربى و احنا صغيرين و بعد كدة يبقى القرار ملكنا و بارادتنا الحرة ... اللى عاوز ينحرف ينحرف و اللى عاوز يصلح يصلح ... القهر و القمع مش بيبنوا انسان يقدر يبنى و يقدر يصلح
و سلم لى على منحرفين وسط البلد كلهم
انهاردة برده فهمت معنى ان رفض رحيم أحسن من قبول خادع ... يمكن مش حينفع أشرح دلوقتى بس أكيد بعدين حتيجى الفرصة
الخلاصة بس انك لو حد بيحبك و انت مش بتحبه لازم تقوله كدة بصراحة عشان ما تبقاش بتخدعه بدون قصد و انت فاكر نفسك خايف على مشاعره
الصراحة راحة يا معلم
No comments:
Post a Comment