Monday, August 12, 2013

امتى الاسلام يرجع مصر؟

امتى الاسلام يرجع مصر؟
لما مصر ترجع غنية وأهلها أغنيا ومبسوطين - ساعتها مش حتلاقي خناقات بالسنج والمطاوي في الشارع - الجريمة حتقل - الشرطة حتكون متدربة كويس - القضاء سريع وعادل - ساعتها مش حتلاقي حد بيتاجر بالدين ومش حتلاقي حد عنده وقت ولا مزاج للتطرف - أعمل نظام حياة يخلي الناس مبسوطة وهما حيرجعوا - من غير أى ضغط - لأخلاقياتهم الحضارية المتزنة المصبوغة بآلاف السنين من التمدين ومش حقوللك أنت وشطارتك تخلي "أخلاق الاسلام" هي اللي تسود - لإن "أخلاق الاسلام" حتكون هي النظام الأخلاقي اللي العقل الجمعي المصري حيختاره في كل الأحوال - ساعتها الأخلاق مش حتكون بتتفرض  بحديث ولكن الناس بيتحلوا بيها عشان محتاجينها تنظم حياتهم وتجملها "تكملها"
لما الناس تبقى عارفة حقوقها وعارفة أنها حتاخدها يعني حتاخدها عمرها ما حتخاف تقول الحق
لما تكون الناس بتشتغل ومش فاضية أنها تدور في معتقدات بعض وأديان بعض - ساعتها حتلاقي الجوامع والكنايس أكتر مؤسسات بتشتغل سوا وبتنسق سوا - عشان الموضوع مش أهلي وزمالك - لما الناس بتبقى غنية بتفهم , غنية بخبراتها في الحياة , بتوصل لربنا بطريقتها

رجع النزعة التشاركية للمصريين , وجه النزعة القومية للبناء مش للهدم , رجع الماعت للمحاكم ورجع الطمأنينة والآمون للناس , وريهم المستقبل مش الماضي , أشرك الشباب في السلطة وعلمهم الإدارة مش في الرشاوي , علي الرموز القومية اللي تنفع المستقبل , وائل غنيم , مجدي يعقوب ,أبوتريكة , ضابط الجيش اللي منع الاشتباكات في شارع من شوارع التحرير في ال 18 يوم وضابط الشرطة اللي استشهد وهو بيقاوم الجريمة وغيرهم وغيرهم

رموز الوحدة اللي محتاجهم دلوقتي عشان السلام يرجع مصر

No comments: