معتز بالله مصطفى يكتب: أقفش الانسان اللي جواك

معتز بالله مصطفى يكتب:

من المذابح المشهورة بالنسبالنا كمصريين ..

مذبحة دير ياسين 1948 (ارتكبها الصهاينة ضد الفلسطينيين) ... راح ضحيتها 360 قتيل.

مذبحة صبرا وشاتيلا 1982 (ارتكبها الصهاينة وميليشيات لبنانية ضد الفسلطينيين) .. الأرقام متفاوتة .. لكنها بتتراوح بين 750 و3500 قتيل.

العدوان على قطاع غزة 2008 (ارتكبه الصهاينة) .. راح ضحيته 900 مدني.

مجزرة بحر البقر خلال حرب الإستنزاف .. راح فيها 30 طفل

كل المجازر دي كان المجرم فيها عدو في حالة حرب وتطهير عرقي ..

في بداية الثورة المصرية .. خلال ال18 يوم .. وقع حوالي 800 وشوية ... على مستوى الجمهورية .. ولمدة 18 يوم

ومن ساعتها كل شوية تحصل مجزرة .. بيروح في كل واحدة أعداد بالعشرات ...

موقعة الجمل اللي شيبتنا كلنا وكانت صدمة رهيبة ... فاكرين وقع فيها كام ؟ ... ما كملوش 15 شهيد !

امبارح .. راح أكتر من 500 (حسب أرقام وزارة الصحة) .... وفي الغالب الرقم ممكن يعدي ال700 ... ده غير المصابين .. كل ده خلال مدة ما كملتش 24 ساعة !

انتو متخيلين حجم المأساة ؟ .. متخيلين كم الإجرام و البشاعة اللي حصلت ؟!

لما يموت واحد لازم تزعل .. ولازم تتخض .. و لازم تتمم على إنسانيتك .. لو حسيت إنه مش فارق معاك يبقى أنت محتاج تضرب نفسك قلمين عشان تفوق ! ... أعمل أى حاجة تفوقك .. أكتب .. أتكلم .. أصرخ .. أنزل شوف الجثث وشم ريحة الدم وأقعد مع أهالي الضحايا ! .. بس ما تسيبش نفسك توصل لمرحلة تبلد المشاعر .. و إنك توصل لمرحلة إنك تقول "خلاص الواحد جتته نحّست" ! 

أمسك في البني آدم اللي جواك بإيديك وسنانك !