Wednesday, June 13, 2012

نجوم تويتر - 1

نجوم تويتر - الجزء الأول
 
تعرفوا مثلا أن تويتات خرم من أكثر الحاجات اللي بتعجبني على تويتر مع كلام أحمد سمير وأحمد خير و نرمين بدير وهبة رءوف وبلال فضل؟

تويتات خرم بتبقى فيها فلسفة أحيانا اعلى من أى كلام ممكن يتقال ، يمكن عشان طول الوقت بيستخدم الألفاظ الجنسية على أصلها ودون تحوير زى مابضطر أعمل ،فمش بقدر اعمل ريتويت لكل كلامه لكن بيعجبني وبحسه أقوى من كلام مدعين كتير على تويتر


أحمد خير مثلا وقطب صاحبه بيدوك خلاصة الفكرة في نص سطر وبشكل ساخر فشيخ ،، أعترف اني بقلد خير أو بتأثر بيه ساعات


احمد العش أرشيف تويتر ،، المثقف الهادي اللي تلاقي دماغه متابعة كل حاجة وكل معلومة ليها عنده صورة وخبر ،، تلقائي كدة لما بشوفه هزاري بيقل ، بحس أن عنده وقار يجبرك على احترامه ،،، مش معنى كدة اني مش بحترم الناس اللي طول الوقت بهزر معاها ، لكن احترام الوقار له شكل تاني ،، الوقار ده بحسه ناحية ناس قليلة , زى أحمد غنيم ومحمد فؤاد ونرمين بدير


نرمين الشخصية الوقورة اللي عندها قدر كبير جدا من الانصاف والحكم الهادي على الأمور وداخلة في الموضوع بتعرف تطلع القشرة المزيفة من اللب الحقيقي ، بتعرف تضرب لب القضية وتخرج من الكاموفلاجات اللي بتتحط عشان تشتت الناس عن القضية ،،، مثلا في الدستورية هي شافت القضية مش في عدد كل تيار ولكن معايير الاختيار ،، وخد من ده كتير


موضوعية نرمين بتخليني أحس اني نصاب كبير جنبها لإني أحيانا كتير ببقى براجماتي أكتر مني موضوعي ،، براجماتي لصالح قضية الحرية مش لصالح نفسي ،، بعرف أمتى - أو أظن اني بعرف - امتى أتخلى عن جزء موضوعيتي عشان مخسرش قضيتي


أحيان بعند في حاجات مش مستاهلة العند بس عشان أمشي الرأى الأفيد من وجهة نظري


بلال فضل مش بحسه أبدا بيمثل أو بيصطنع ، هو فعلا متسق مع نفسه وزى اى بني آدم بيفهم بيبني مواقفه على قرايات واقعية وله موقف واضح مع الحرية والثورة ، مش شايفه غلط لما دافع عن المجلس العسكري فترة ولما أكتشف أنه فعلا مجرم بجد قلب عليه وبقى عدو ليه ، محمود سعد عمل كدة زى ما أنا نفسي عملت وكنت بدافع عن المجلس العسكري بصفته بيغلط مش بيتعمد الغلط


الناس زايدت على محمود سعد وعلى بلال فضل لأنهم في فترة من الفترات وقفوا في صف الجيش ،، ده غلط ,, دي مش مزايدة على موقف ،، دي مزايدة على رؤية سياسية


محدش مطلوب منه يعادي جيش بلده بدون سبب ،، اللي مؤمن بعداوة المؤسسات كعقيدة فده مش موقف ،، دي فكرة عنده ،،،، مش من حق اللي بيعادي المؤسسات كعقيدة أنه يزايد على اللي عقيدته مختلفة وشايف أن المؤسسة العسكرية وطنية وضرورية للدولة


المزايدة تكون في الموقف مش في العقيدة ،، يعني أنت ياللي مقتنع بأن الجيش مؤسسة وطنية هل فضلت تدافع عن أخطاء وجرايم أرتكبها الجيش عمال على بطال؟

هنا حنلاقي ناس رغم حبها وإيمانها بقدسية المؤسسة العسكرية رفضت أخطاؤه وكافحت جرايمه ،،، دول مينفعش تزايد على موقفهم لإنه محترم ومش خاضع للابتزاز من أصحاب عقيدة رفض المؤسسات ولا للخوف من أنصار المؤسسة ونفوذها ولا الخوف من فقدان تعاطف المؤمنين بالمؤسسة اللي حيرفضوا أن حد ينتقدها بعد ماكان جزء من اهتمامهم بيه هو تبنيهم نفس العقيدة

رأيي أن بلال فضل ومحمود سعد أصحاب موقف حقيقيين مش مصطنعين أو مزيفين


ابراهيم الجارحي للأسف كنت بحبه جدا وفاكر أول مادخل تويتر كنت مهتم أعمل له ريتويت كتير عشان أساعده في أنه يكون عنده فولورز كتير دعما للراديو - تيت راديو - الراديو ده محتفظ بواحدة من ابداعاته "نشرة يوم القيامة" على موبايلي

نشرة يوم القيامة كل فكرتها انك بتسمع مانشيتات كل جرنان يوم القيامة وبتفضح منظور كل جرنان حسب مصالح أو رؤية اللي شغالين فيه وبتقول أن محدش فعلا محايد وكله بيشوف الخبر من منظوره هو

ابراهيم الجارحي فوجئت أنه بينقل تويتات وينسبها لنفسه ، نبهته مرة واتنرفز وتوهني ، ابراهيم بينقل بتصرف ، يعني بيغير الصياغة بتاعة الفكرة ، الألشة وينزل اللي أبتكره , مش عاوز أسمي ده سرقة ، بس أول ماتشوف مبدع بيعتمد في جزء من ابداعه - أيوة كوميديا الأخبار ابداع قليلين اللي شغالين فيه في مصر انا واحد منهم - على منتج لقريحة وعقل مبدع تاني تعرف أن ابداعه مش أصيل ،

الابداع الغير أصيل ، اللي فعلا مش ناتج من عقل صاحبه بالكامل ، ميوصلش للقلب حتى لو عمل تأثير سطحي , حيعجبك ويخليك تضحك ، لكن الاحساس بروح الابداع مش حتحسه ،، وحتحسه غالبا في صاحب الفكرة\النكتة الأصلية حتى لو كانت اضعف في الصياغة

مش بخاف أما تويتاتي تتاخد , وحتى فيه واحد مسمي نفسه حرامي تويتات لقيته مرة ناشر تويتة منقولة نصا من تويتاتي وفكرت اعمل له بلوك بس قلت مادام طرحت ابداعي على المشاع فهو حق الكل ، أصبح جزء من الثقافة الانسانية كل ماوصل لناس أكتر كلما كان أفضل ، معملتلوش بلوك ولا كرهته ، بالعكس ،صعب عليا أنه مش قادر يخرج ابداع خاص بيه فبينقل ابداع غيره ومعترف أنه "حرامي تويتات" يعني مش بينسب الكلام لنفسه ،، ده حتى بيغامر أنه لو كتب حاجة من ابداعه الناس مش حتعرف انها من ابداعه وحينسبوها لحد غيره


التاني بينقل الفكرة ويعيد صياغتها بإسمه ، ده النوع المؤذي ، لإنه بياخد ابداعك ويحسن فيه شكليا وينسبه لنفسه ,فتلاقي الفكرة فكرتك وظاهرة بشكل افضل ومنسوبة لغيرك


محبتش أفتعل خناقة مع ابراهيم الجارحي ، وبعد ماكنت حاطه من خمسة ستة لازم أبص عليهم أشوف كاتبين إيه كل يوم عشان أضحك وازداد حكمة ، بقيت بتجنب أبص على التايم لاين بتاعه خوفا من اني ألاقيه واخد تويتة من عندي فأضطر أتخانق معاه


هبة رءوف عزت ، ملاك تويتر , تابعتها من مدة طويلة بحاول أشوف اللحظة اللي حتظهر فيها على حقيقتها ، حد بيمثل البراءة والنقاء لتسويق نفسه -أنا ساعات ببقى كدة- كرمز للحرية ،،، لكن عمري مامسكت عليها غلطة

د.هبة من الناس اللي بشوف ابداعهم أصلي ، ناتج عن قناعة حقيقية , لكن قناعة مترددة بين عالم المحافظة والانفتاح ، عالم السياسة والطينة اللي فيه ، وعالم الضمير والنور اللي فيه

نوارة نجم , زياطة , مش بحسها دايما مخلصة ، بحس ساعات أنها غبية أو ساذجة لكن عقلي بيقوللي أنها فاهمة كويس وبتستعبط مش عبيطة ،، يعني محدش يقول أن واحد زى علاء عبدالفتاح كان فعلا متخيل ان خالد صاحبه له فرصة في أى حاجة ,, هو كان ساحب صحابه والناس المبهورة بيه بقصد لمشروع شخصي وانا بعتبر ده خيانة أمانة لأن الناس دي حبتك عشان أنت بتحب البلد ووثقوا فيك عشان توديهم للحاجة اللي في مصلحة البلد مش الحاجة اللي في مصلحتك الصحوبية ولمصلحة شلة صحاب


حازم عبدالعظيم ومحمد يسري ،،، نموذج للسياسي اللي لازم لما يقول حاجة تتوقع بنسبة ٧٠% انها غلط ،،، هما مش كدابين ولا أظنهم بيصطنعوا ،، هما بس عندهم قصور ما مقدرش أحدد سببه ، نفس القصور الموجود عند علاء الأسواني وجمال عيد واسراء عبد الفتاح ,,, بيشوفوا الواقع في عالم موازي مش في واقعنا


أنا كواحد بعشق الخيال ببقى سعيد بكلامهم كمناذج غير واقعية ، بس كواحد بدعي اني بفهم سياسة ببكي من كتر ماأنا شايفهم رايحين في سكة ضايعة ، الأزمة مش فيهم كأشخاص - الوحيدة اللي أعرفها معرفة شخصية هي اسراء عبدالفتاح - الأزمة في أنهم بيكونوا رأى عام في قضايا ممكن يكون اكبر عامل مؤثر فيها هو الرأى العام


طريقة معالجتهم للمشاكل السياسية مش واقعية ، مش من واقعنا ، ممكن مرة تعمل خطوة تكتيكية صح ،، لكن استراتيجيا ضايعين ومعندهمش رؤية


يمكن ده أحد اسرار انبهارهم بالبرادعي ، الراجل بيبدو أنه عنده الحاجة اللي بيفتقدوها ،، الرؤية المستقبلية ،،، وأى كلام بيقوله رغم أن غيره كتير ومن قبله بيقولوه لكن انبهارهم بشهرته والهالة اللي صنعوها حواليه خليتهم يشوفوه بشكل مش قادر أشوفه ،،،


وائل غنيم ،، مفيش زى وائل غنيم ،، بجد أنا مبهور بمدى تواضع وائل وبعده عن الأضواء ،، ده واحد فاهم هو بيعمل إيه ومخلص ،، حد زى وائل أنا أثق أنه لو تولي مسئولية قيادة حيكون قدها ولو أخطأ حيكون أستنفذ محاولات الهروب من الخطأ مش بيغامر بحياة الناس لمجرد ارضاء ضميره أو لشهوة الشهرة أو عشان يتقال عليه بطل
Post a Comment