Saturday, June 23, 2012

كلام في السكس


فيه تناغم بين أهمية أى نوع من أنواع الاحتياجات البشرية لإستمرار الحياة وبين كون اشباع الحاجة دي ارادي أو لا ارادي

يعني مثلا التنفس - أهم احتياج مباشر لا يمكن الاستغناء عنه لأكتر من دقايق - بيحصل بشكل لاإرادي , محدش بيفكر حيتنفس ولا لأ وحيتنفس امتى ، بينما الأكل احتياج أقل الحاحا من التنفس فبيحصل بشكل ارادي بتحدد ميعاده وشكله بإرادتك لكن مستمر لايمكن الاستغناء عنه بينما الجنس لإنه حاجة من اهم احتياجات الانسان الأساسية الغير ضرورية للفرد للبقاء على الحياة بشكل مباشر زى الأكل والتنفس فالحاجة ليه بيتم اشباعها بشكل فيه تحكم كامل في الارادة ونظرا لأهمية الجنس لبقاء النوع البشري فهو بيكون أكتر احتياج بيؤدي اشباعه لسعادة أكبر من اشباع اى احتياج تاني

الجنس احتياج اساسي للانسان ، تحويل الكلام عنه لتابو معناه ان المجتمع فيه مشكلة حقيقية معقدة , مشكلة ازدواجية على كبت على انعزالية عن العالم , مش بقول ولا بدعو أن الناس كلها تتكلم في السكس ليل ونهار لإن ده بيحصل فعلا بس مش بنقول على النت ،، لكن بدعو انه ميبقاش تابو خارج النقاش العقلاني المنطقي

السؤال هنا هو ليه موضوع الجنس الناس بتبقى خايفة تتكلم فيه ولو أتكلموا يتكلموا فيه بهزار أو بسفالة وكأنه موضوع قذر لا يصلح للنقاش الهادي زى أى موضوع؟

ايه اللي يخلينا نتكلم طول اليوم في السياسة وقرفها أو الكورة وتفاهتها وميخليناش نناقش حاجة من أكتر الحاجات المؤثرة على حياة الانسان وسعادته؟



من سنين بكتب عن الجنس والحب زى مابكتب في السياسة وعمري مااستخدمت الكلمات الخادشة للحياء غير في الشتيمة والشتيمة بتبقى غالبا بسبب السياسة يعني عن تجربة عملية ممكن النقاش والكلام عن السكس من غير مايبقى كلام قليل الأدب أو مبتذل أو خادش للحياء

لما ناس تعتبر الجنس قذارة تخيل مدى الانحراف العقلي والسلوكي عندهم والكبت اللي بيطلع في مواقف كتير ،، التحتيات زى ماقال عبدالرسول , الانسان اللي بيقول أن الجنس قذارة مفروض يفهم أن الجنس فن - مش قصتي جوة الجواز ولا لأ - وفن يقدر يغير حياتك ومنظورك للدنيا واحساسك بيها

 الجنس هو التعبير العملي الواقعي عن نوع من أفضل المشاعر الانسانية ومن غيره الحياة مش حتستمر ,, يعني مش قذارة ومش قلة احترام

واللي بيقول لازم اللي يناقش الموضوع ده يكون حد فاهم ودارس ، انا مش بدي درس علم ، انا بقول كلام فارغ بعبر عن افكاري اللي ممكن تكون كلها غلط , ناقشني بالمنطق ونختلف ونتفق زى اى موضوع تاني

من ضمن الحاجات الغريبة كمان أن أكتر المجتمعات الجنس فيها متاح بحرية هي أقل مجتمعات في المواليد ، لإن الموضوع بيبقى مش خلفة وبس زى عندنا ولإن كل ما كان الموضوع مفتوح للنقاش كلما زاد الوعى الصحي والنفسي

اللي بيمنعني ساعات من الكتابة عن الجنس اني ممكن اكون مبتذل - الابتذال مش سئ في كل الأحوال , أحيانا تحب تكون مبتذل بقصد - لكن الابتذال في موضوع زى ده بيجيب نتايج عكسية لأن الأصل في مجتمعنا هو تناوله بإبتذال

السؤال هنا بقى إيه هي النتايج المش عكسية اللي عاوز أوصل لها؟ هدفي من فتح النقاش في الجنس هو أني أكسر التابو في موضوع الجنس وأنه يكون متاح للنقاش

طيب حنستفيد إيه لما الجنس يكون مطروح للنقاش ومش تابو؟ حنستفيد ان الناس تفهم نفسها أحسن وتعبر عن احتياجاتها بشكل أرقى

لما الناس تتكلم عن الجنس من غير ماتهرب من الموضوع أو تحوله لسفالة حنكون كسرنا محظور وهمي مانع عقولنا من التفكير في قضية متشعبة , كل ما تحط حواجز قصاد عقلك لمواضيع مينفعش يناقشها كل ما كفاءته وقدراته تقلصت , افتح كل المواضيع للنقاش عشان عقلك ينتعش ويكبر



فيه ناس بتفهم أن أى كلام عن الجنس هو كلام عن الأعضاء التناسلية, أصلا الأعضاء التناسلية آخر حاجة في موضوع الجنس عشان توصل لها فيه مليون خطوة الجنس عملية المفروض تكون راقية بيتمتع بيها كل حواس الانسان ، لو فهمها صح وعاش التجربة صح ، البصر ، السمع , الشم ، اللمس ، التذوق ،، لو محصلش ده تبقى بتعك وبتضيع فرصة لتجديد حياتك

أشبع حواسك , أتكلم وأسمع وافهم اللي معاك ، الدنيا مش قفش ،، أو مش طول الوقت قفش , أشبع حواسك ، اشبع نظرك بملامح حبيبك ، لو مش حابب شكله وملامحه وتبصلها تريحك أعرف ان ده مش حب , اشبع حواسك بملمسه ودفئه , عبر عن نفسك ومتخليش القيود والمفروض يتحكموا فيك 
 
وغير الحواس الخمسة فالجنس بينعش المشاعر الإيجابية المختلفة , مشاعر زى التعاطف والشراكة والثقة في النفس والحب والرحمة والاحتواء , مين فينا مش بيحب وبيستمتع بكونه مرغوب؟ مين فينا مش بيشتاق لحضن دافي لما يكون مرهق ومتضايق؟ فيه حاجات ممكن تتحس بلمسة أحسن ما تتقال بمليون كلمة

عيش التجربة بالكامل متبسترهاش , متختصرهاش في لحظة واحدة سريعة ومتخدش الموضوع على أنه واجب .. عيش الحالة واستمتع بالاحساس

4 comments:

Ghassan Zidan said...

أنا حاسك حامي هل يومين.. إتكلم إتكلم و إحنا بنسمع

Mourad Gad said...

حلو الكلام يا باد ,برغم اللى يشوفك ميتخيلش انك بتكتب حاجات حلوة ,

Ahmed Abu Elhaz said...

بجد مقال فى منتهى الروعة ...اكمل و نحن نسمعك

Medo Hussen said...

علية النعمة انت باشا