ثوار الموضة وموضة الثورة

ثوار الموضة

المقال الأصلي على فيس بوك

 

اللي أخدوا الثورة موضة بدأوا يزهقوا وعاوزيننا نعلن فشل الثورة عشان يرجعوا لحياتهم الطبيعية ويشوفولهم موضة جديدة يقضوا معاها الوقت ، مغني جديد يعملوه زعيم الغناء العربي - زى ما عملوا البرادعي زعيم الثورة قبل كدة - ولا جمعية خيرية تديهم احساس بأنهم أسياد الناس ويمنوا عليهم بمساعدتهم زى ما كل شوية يقولوا ده شعب زبالة وخسارة فيه اللي ماتوا , وكأن اللي ماتوا كانوا من شعب تاني جم ماتوا عشان ناس مش أهلهم

ثوار الموضة مش عندهم مشروع حقيقي للتغيير ،، هما بس لقوا الثورة فرصة لعمل حاجة مجربوهاش قبل كدة ،، زى موضة التدين مع عمرو خالد زمان , فرصة يتنططوا في الشارع شوية ، يضربوا كام طوبة على كام ازازة مولوتوف على الشرطة ، حد منهم يتصاب ولا يموت فيعملوله تمثال ويعلنوه قديس , طبعا الكلام ده وأى كلام جاى مش مقصود بيه التعميم 

ثوار الموضة أيدوا حمدين صباحي مرشح الموضة في آخر أسبوع من الانتخابات - ومحدش فيهم كان يعرف هو شغال إيه ولا إيه مشروعه - عشان "الدولة المدنية" اللي هي برده بالنسبالهم موضة حلوة مش مشروع ولا رؤية ولا آليات ولاهما أصلا فاهمين هي إيه غير انها تبقى حاجة ملهاش علاقة بالاسلاميين

اللي مخلي ثوار الموضة مكملين غصب عنهم هو أنهم خايفين حد يزايد عليهم ، هما أصلا شغالين من بداية الثورة بمبدأ مين صوته أعلى ومش مهم نتيجة صوته ده إيه ،، المهم يبقى فيه افتكاسات ثورية روشة آخر حاجة ،، مسيرات شكلها حلو وبتسمّع على النت ،، مرشح ملوش معنى ولا فرصة بس يبقى اسمنا لينا مرشحنا اللي مش مهم يخسر ولا يكسب طالما بتاعنا احنا مش بتاع التانيين ،، اعتصام من غير أهداف ولا مطالب وشعارات محدش يعرف مقصود بيها إيه ،،، كله مباح من أجل موضة الكفاح

ثوار الموضة مسيرهم حيزهقوا أو حيجيبوا ورا لما يفهموا أن ده صراع النفس الطويل ،، صراع عض الأصابع ،، اللي حيستحمل أكتر حيكمل واللي حيتعب حيتاكل

قبل تنحي مبارك قلت جملة قصدتها كويس أوي "المزايدة هي الحل" ودلوقتي بقول حان وقت رجوعكم للمزرعة السعيدة ,, الثورة موضتها حتهدا والتغيير حيحتاج مننا زمن طويييل ومجهود أطول وصبر ،،، وعمر الصبر مايكون موضة