قصة حياتي يوم اعلان مرسي رئيسا

النوت ده عبارة عن تعليقات ساخرة كتبتها على تويتر عن كذا موضوع يجمع بينهم أنهم كلهم في يوم اعلان مرسي أول رئيس مدني منتخب .. اللي حيقرا النوت دي حيشوف تسلسل اليوم مشي ازاى معايا لحد بالليل ,, مقدرش أعتبرها مذكرات أوي بس حبيت أسجل اليوم لإنه من الأيام الجميلة في حياتي , حبيت كمان أكتب أسماء الناس اللي قابلتهم خلال اليوم للذكرى

اليوم بدأ بداية غريبة بمقابلة شخصية غير تقليدية هي الدكتورة هنا شمس , أعتقد المقابلة دي حتكون بداية تغيير بشكل ما في حياتي , مش حتكلم عن الموضوع ده دلوقتي عموما

بعد كدة تسلسلت الأحداث وتسلسلت تعليقاتي عليها

الأول : جه خبر من الأهرام بوصول موجة حارة لمصر:

تعليقاتي على تويتر - كنت بكتبها وانا ماشي في الشارع:

الموجة الحر دي عاملينها عشان يبوظوا علينا احتفالنا بمرسي لو نجح أو عشان الناس تقل في الميدان لو نجحوا شفيق ، حسبي الله كلها مخططات

آه يامجلس يابن الحرام ، جبت الموجة الحارة بكام ،،، مش حنخاف مش حنطاطي إحنا قاعدين والتكييف واطي

الموجة الحارة هدفها أنهم يفكرونا بإن مرسي حيمنع البكيني ،، آدي اللي أخدناه من الثورة ،، شيلي البكيني بتاعك من الهدوم الصيفي يا أم حمادة

 وفيه ناس بتقول أن الموجة الحارة دليل على فشل المفاوضات بين المجلس العسكري والأخوان

مش حتحكمونا بالسن بلوك يا صهاينة

أترى؟ حين أمنع عنك البكيني وأسيبك تتسلق في الشمس يابن المرة؟ هي أشياء لا تشترى ،،، يسقط يسقط حكم المرشد

يقدر مرسي يوقف موجة الحر اللي جاية على مصر؟ طيب ماعشان كدة قلنا لا انتخابات تحت حكم العسكر يابهايم #مبطلون

الثوار في التحرير : "ياحرية فينك فينك؟ الموجة الحارة مابيننا وبينك"

بكريمان : المشير أكد لعنان همسا في ودانه أن الموجة الحارة مخطط اسرائيلي لفرهدة الشعب المصري

الثاني : عن توقعاتنا بقيام حرب أهلية في مصر في حالة اعلان فوز شفيق بالتزوير

وليه نعمل حرب أهلية‏ ؟ مانخلي شفيق ومرسي يبارزوا بعض بالسيوف واللي يقتل التاني نحبسه وكدة ينجح حمدين صباحي نسر الثورة الغائب

وفي مكان مافي مصر، يقف أحد قيادات التنظيم السري للأخوان قصاده خريطة بمحافظات مصر بلون أحمر وازرق، الأحمر عدو والازرق صديق

الحرس الجمهوري راح بيت شفيق وبيت مرسي ، اللي حينجح حيحرسوه واللي حيخسر حيحبسوه

عاجل : المجلس العسكري يعلن عن تشكيل مجلس رئاسي مكون من شفيق ومرسي وابن أخت عفاف شعيب

الثالث : فاروق سلطان بيقول بيان النتيجة - 

قعدنا في المكتب نشوف البيان في التلفزيون كان فيه رويدة واسراء وأمل وندى وتسنيم وسلام وأحمد محمود ونجلاء وسمر طارق

ومن الجدير بالذكر أنه قاله في حوالي ساعة كاملة وكنت ناوي أنقل كلامه لتويتر بالنص زى ما بعمل في احداث كتير بس مقدرتش أستحمل سخرية الموقف

كنا قاعدين بنتفرج على فاروق سلطان في المكتب

فاروق سلطان : كنا عاوزين نفرحكم بس متستاهلوش عشان قرفتونا من ساعة مابدأنا شغل

الفيلم الهندي اللي عامله فاروق سلطان معناه ان يا اما حيقول شفيق يا اما مرسي

فاروق سلطان : أشكر أعضاء اللجنة الانتخابية وأعضاء اللجنة الفنية والشعب وعم محمد الفراش بتاع مكتبي

فاروق سلطان حيشرح أسباب استبعاد ال ١٠٠٠ وشوية مرشح واحد واحد وحيجيب ورق أبواسماعيل وحيحكي كل حاجة اصبروا بس

آدي آخرة الفرجة على المسلسلات التركي ،، دي الحلقة الأولى؟

عاوزين البرادعي يدي اللجنة كورسات تويتر ،،، كان زمان سلطان أختصر كل الكلام ده في تلات تويتات بالكتير

فاروق سلطان دخل في قضية المنظمات الدولية ،، يارب ميتكلمش عن مخطط تقسيم مصر يارب

سبب تأجيل النتيجة هو الوقت اللي أخدوه في كتابة المذكرة دي كلها

هو فاروق سلطان حياخد نسبة من الاعلانات؟

فاروق بيعد لجان الجمهورية وبيحكي كل لجنة حصل فيها إيه ومين اتخانق مع مين في كل لجنة

فاروق دخل في قصة حياة ذبابة الفاكهة ولا لسة؟

فاروق سلطان : عرفتوا الديمقراطية وحشة ازاى؟

رئيسة اللجنة الفرعية كانت حامل وولدت في اللجنة وسمت الواد شفيق فحسبنا صوته لمرسي

دي بقى تويتين عملتلهم ريتويت بس عشان يوروك الناس كانت زهقانة قد ايه

يمنى: ده قصة كفاح لجنة الانتخابات .. شوية وهيقولك احنا اللي طردنا الإنجليز

رباب : اوعي تنسى البت اللي شربت قزازة الحبر في الفيوم وبعتوا تجيبوا قزازة تانية

الرابع : بعد اعلان فوز مرسي :

مرسي كسببببببببب – مبروك ياسرحان*

*سرحان ده لو حد نسي هو المتحدث بإسم حملة شفيق ويتمتع بقدرة فظيعة على تقبل جميع أنواع النقد العفيف والغير عفيف

محمد أبوحامد , توفيق عكاشة ، بكري ، ضياء رشوان , عمرو بقلي ، داليا زيادة ، ،،،، كل الأخوة مؤيدين شفيق ،،مبروووووك عليكم الوكسة

الخامس : أنا في التحرير

رحت التحرير مع نجلاء وندى وأحمد محمود وقابلت أحمد غنيم :

 وكتبت على تويتر:

بس لسة حمدين عنده فرصة كويسة ‎:D‏ ‎:D‏

الشعب يريد صلاحيات الرئيس

في التحرير هتاف : يامشير قول الحق ,, مرسي رئيسك ولا لأ؟

إلى الفقريين وعاشقي الإكتئاب ، فيه حاجة في الحروب اسمها الروح المعنوية ، لما تحقق انتصار ولو معنوي أحتفل بيه وأستفيد منه عشان تعرف تكمل

وقد أكد الرئيس محمد مرسي أنه سوف يستعين بخبرات جميع المصريين وعلى رأسهم منافسه الفريق شفيق حيث سيخصص له قفص في السيرك القومي

عاجل ومؤكد : عساكر الأمن قصاد البنك الأهلي قاعدين مبلمين وزعلانبن ولا اللي ماتلهم ميت ،،،،،،، هما مالهم؟

قابلت واحد صاحبي* شغال مع ابراهيم عيسى قلتله ابقى لسوعهولي من حمالاته وقل له حلاوة الريس مرسي

*أحمد عيد

وصول الحرس الجمهوري لمنزل الرئيس المنتخب محمد مرسي بالتجمع الخامس ‎‪#Shorouksms‏ أوعى يكونوا تبع مبارك ويعتقلوه بس

بيقوللك شفيق حيعمل مؤتمر من على سلم الطيارة ويخاطب الشعب المصري خطبة الوداع ويقول : "طب والله ماموريكم خلفيتي هه :( "

أغلب أنصار شفيق اللي ملهمش مصالح مباشرة معاه هما الناس اللي مع السلطة أيا كانت وبمجرد ماخسر تحولوا تلقائيا للإحتفال بنجاح مرسي

أهم انجاز ممكن يعمله مرسي بسرعة هو أنه يطمن المسيحيين ويكسر القرف الطائفي اللي عايشين فيه

السادس : رحنا اتغدينا على حساب احمد محمود

ونمت واحنا قاعدين على القهوة

كان معانا محمود سايكو ومحمد عاطف وشوقي وناس تانية

طبعا مش انا اللي صورت الصور دي ومشفتهاش غير تاني يوم

 

السابع : عرض الألتراس

رحت مع ندى عزيز وحسام عيادة بإسم الشهيد عماد عفت موجودة في شارع محمد محمود فوق المكان اللي الالتراس اتجمعوا فيه واتفرجت على احلى عرض للالتراس

 المنظر من فوق تحفة والحماس ملوش حدود

وكتبت على تويتر:

هتاف الألتراس في محمد محمود حالا : الشهداااا يا مرسييي

هتاف الألتراس في محمد محمود : الكرسي ضااع الكرسي ضاااع الكرسي ضاع ياولاد الوسخةةة

هتاف الألتراس في محمد محمود : شفيق سوسو ضاعت فلوسه

هتاف الألتراس في محمد محمود : أحمد شفيق ، حرامي ، وبتاع حشيييش

هتاف الألتراس في محمد محمود ؛ ياطنطاوي أدي تحية , مرسي رئيس ، الجمهورية

هتاف الألتراس في محمد محمود : خدوا خازوووق وأخدنا الكرسيي ، قالوا شفيق وقلناا مرسييي

الرئيس محمد مرسي ،، تصدق عشان أديته صوتي مش عارف أشتمه من غير سبب ! حستنى أول غلطة يعملها عشان أطلع عينه ‎:D

بعد كدة ختمنا اليوم بسهرة عربدة بدأت في هابي سيتي أحتفلنا فيها بنجاح مرسي بطريقتنا وأتكلمنا في مليون موضوع كان فيها علي غنيم وباسم فتحي ونحاس وسايكو وريهام وشوقي وتوفيق واحمد عبدالرسول ومهند بايروفسكي وموتا وعبد الله ومهاب

كتبت نقلا عن ريهام : واحد فلول بيقول لريهام شفيق حيحجبك ياروح أمك قالت له مش حيبقى فاضي حيبقى مشغول في حبس شفيق والفلول يا تيت أمك

موتا بيقول يسقط الرئيس القادم .. قلت له ماهو خلاص جه .. قال لأ قصدي على اللي لسة مجاش .. جبان فشخ :D

وفي النهاية انتهى اليوم في شقتي في وسط البلد مع توفيق وعبد الرسول وكتبت فكرة جات لي عن (الديانة والشريعة الإغريقية) من وحى حكايات منار وفكرة عن مفهوم (القوامة) من وحى حواري الصبح مع الدكتورة هنا شمس وبعد كدة نمت